Primos, Catpower, Max Power, Buena Vista Power, Swift, GGD i Destroyers ta klasifiká

WILLEMSTAD - Ocho ekipo a klasifiká pa e kuart final di Torneo Kopa Joy Alberto ku lo tuma lugá djasabra awor na Cirilo Chirino Ballpark.
E kuater ekiponan ku gana lo kompetí den semi-final djadumingu den oranan di mainta i mèrdia. Atardi lat lo tin e gran final entre e ganadónan di mainta.

Ekiponan ku a klasifiká ta Baranka, Primos, Catpower, Max Power, Buena Vista Power, Swift, GGD i Destroyers.
Nos tin resultado di e ocho weganan di siman pasá.

Djasabra 23 di yanüari
Baranka Napa Autoparts 8, GGD 7
Baranka a bati 7 hit i nan a hunga impekabel.
Kenrick Hellement tabata e picher ganadó i Reginald

Pietersz a bai di 2-1.
GGD tabatin 15 hit i nan a hasi 1 eror.
Willem Felicia tabata e
picher pèrdèdó i Sherrintley Da Costa Gomez a bati di 2-2.
Regino Winklaar a konektá 1 homerun.

CITCO ta nòkout Douane/Cems i klasifiká invikto den Torneo Refineria Isla

WILLEMSTAD - CITCO a nòkout Douane / CEMS maskulino ku skor di 12-0 djadumingu den kontinuashon di Torneo Komersial Refineria Isla.
Den otro wega maskulino Polis a gana Kooyman pa klasifiká ku rekòrt di 2-1.

RESULTADONAN
Djadumingu 24 di yanüari
CITCO 12, Douane/CEMS 0
CITCO a konektá 15 hit i hasi 1 eror. Armand Michel
a gana i Lennart Ricardo a bati di 3-3. Anthony Leonora a konektá un homerun.
CEMS a konektá 2 hit i kometé 4 eror.
Oswin Hansen a resultá e picher pèrdèdó i Gerschwin ‘Gregg’ Juliana a bati di 2-1.

Polis 7, Kooyman 3
Polis a konektá 10 hit i hasi 2 eror. Axel Gomez a gana i Rudsel Martina a bati di 1-1. Rudsel Martina tabatin un homerun. Sherdon Rombley i Jurnick Floranus tambe a konektá un homerun.
Kooyman a dal 6 hit i kometé 1 eror. Kenneth Cornelia a pèrdè i Terrence Garcia a bati di 2-2.

Sint Jozef VSBO den final eskolar Femenino i Maskulino

WILLEMSTAD - Sint Jozef VSBO ta den final di Sòftbòl Femenino i Maskulino atrobe den Sòftbòl Eskolar.
E ekiponan bou di direkshon general di Ralph Pereira ta fuerte manera e último añanan den Sòftbòl Eskolar. Djaluna lo tin dos wega di semi-final miéntras e gran fnalnan lo ta djaweps. Tur wega ta tuma lugá na Suvek Ballpark.

Djaluna 25 yanüari
Semifinal Femenino
15.00 Regina Pacis a gana Radulphus College 6-4
(Ganadó A).

Semifinal Maskulino
16.30 St. Paulus a gana Marnix 14-7
(Ganadó B).

Djaweps 28 di yanüari
FINAL Femenino
15.00 Regina Pacis - St. Jozef.

FINAL Maskulino
16.30 Sint Paulus - St. Jozef.

Curtney Doran ta gana Homerun Derby i entregá chèk na Rode Kruis

Curtney Doran a gana Hainley Statia den final di Homerun Debry djasabra anochi na Stadion Post 6.
E Homerun Derby orga-nisá pa ekipo Refineria Isla a resultá un éksito rotundo ku bon asistensia di fanátiko. Despues e ganadó Doran a entregá e chèk na Rode Kruis.

Liga van Engelen tin lugá pa un ekipo mas

WILLEMSTAD - Liga van Engelen ku na e momentunan aki tin 10 ekipo tin lugá pa un ekipo mas.
E liga mas prestigioso di Slowpitch lo start den luna di aprel.

Liga van Engelen ku pa hopi fanátiko di Slowpitch ta e Grandes Ligas di Slowpitch a kaba 2009 eksitosamente ku Swift birando kampion despues di 5 aña sin sinti e sabor di kampion.
Nos a risibí e informashon di e presiden-te di Liga van Engelen, sr. Sergio Leon.
Nos ta kere ku sigur lo tin varios ekipo interesá.
Esun ku yega promé ta bebe awa limpi naturalmente.

SGR Groep ta sorprendé Kooyman den Torneo Refineria Isla

WILLEMSTAD - SGR Groep a hunga balente djasabra i gana e super ekipo di Kooyman den Torneo Refineria Isla kategoria femenino.
E wega a terminá ku skor di 2-1.
Djasabra Kooyman ta presentá fuerte atrobe i dal e kombinashon MCB/Fatum ku skor di 9-4.
Wikènt aki Torneo Refineria Isla ta sigui na Stadion Post 6.

Den siman no tin wega en konekshon ku Festival di Tumba.

OTRO RESULTADONAN
Djasabra 23 di yanüari
SVB 10, BAB/BNA 6;
CDM 13, RBTT 3;
SGR Groep 2, Kooyman 1 (F).

Djadumingu 24 di yanüari
Polis 7, Kooyman 3;
CITCO 12, Douane/CEMS 0
Kooyman 9, MCB/Fatum 4.

Swift Amstel Challenge Tournament ta start dia 26 di febrüari

WILLEMSTAD - E aña aki e tradishonal Swift Amstel Challenge Tournament lo ta di 26 di febrüari pa 14 di mart.
Ekiponan poderoso di Slowpitch di Kòrsou lo kompetí den e torneo.

Tambe lo hunga Kampion de Los Kampiones den e Swift Amstel Challenge Tournament.
Aña pasá Swift mes a bira kampion di nan torneo.
E torneo lo hunga dianan 26,27 i 28 di febrüari, 5,6 i 7, 12, 13 i 14 di mart.

KOMERSIAL
Pa no kompetí ku otro torneonan e ekipo di Swift a opta pa no organisá komersial pareu ku e weganan kompetitivo manera tabata e kaso aña pasá. Ke mèn, e aña aki no tin komersial den Swift Amstel Tournament.

KAMPIONES
Ekiponan ku ta partisipá na e
parti Kampion de Los Kampiones ta Swift di Liga van Engelen, Skarlo di Liga Amstel, Revelation Stars di Liga Amistad, Jandoret Raiders di Liga Un i Tur i Kima Liga di Liga Endrew Polar.
Promé ku 1 di febrüari ekiponan mester konfirmá nan partisipashon i paga inskripshon. Keda pendiente pa mas informashon.

Torneo Refineria Isla a start

WILLEMSTAD - Djabièrnè 8 di yanüari e tan sperá Torneo Komersial Refineria Isla a start na Stadion Post 6.
10 ekipo komersial femenino i 17 ekipo komersial maskulino ta kompetiendo en e torneo. E weganan di djabièrnè ta den e kategoria maskulino.

Nos a risibí e skèdjel di e buèlta regular kompletu. Play-off lo start despues di Karnaval. Tur wega ta tuma lugá na Stadion Post 6.

Torneo Pim Fangman lo sigui 20 di febrüari

WILLEMSTAD - E tradishonal Torneo Union Komersial ‘Torneo Pim Fangman’ organisá pa Terremaster lo sigui dia 20 di febrüari.
Debí ku tin 2 otro torneo, direktiva di e ekipo Terremaster a disidí di organisá e torneo riba otro fecha. Softballcuracao.com ta haña e desishon unu tremendo. Keda pendiente pa mas informashon.

Kampion de Los Kampiones fin di febrüari na Suvek Ballpark

WILLEMSTAD - Fin di febrüari lo tin un kampion de Los Kampiones na Suvek Ballpark.
Informashon ku nos tin ta indiká ku ekiponan kampion di Liga van Engelen, Liga Amstel, Liga Un i Tur, Liga Amistad i Liga Polar lo kompetí den e kampion de los kampiones.

No tin e nòmber ofishal di e kompetensia, pero ta trata di e kampionnan di tur liga.
En todo kaso ekiponan ku lo partisipá ta Swift, Skarlo, Jandoret Raiders, Revelation Stars i Kima Liga..
Liga Trai Seru no tin kampion ainda i parse ku no tin fecha ainda pa e final tuma lugá.


SWIFT
E ekipo di Sergio Leon ta parse fuertísimo pa e kompetensia aki.
E hungadónan di Swift mester hunga pa Swift promé ku tur otro ekipo.
Den kasi tur e otro ekiponan tin hungadó di Swift.
Naturalmente ta e lista ku e ekipo tabatin aña pasá ta konta.
Ultimo biaha ku tabatin un kompetensia di kampionnan tabata Super Cup na mart 2007. Keda pendiente.

Reunion pa ekiponan ku ta partisipá den Torneo Isla

WILLEMSTAD - Djaluna, 4 di yanüari pa 7.30 pm lo tin un reunion pa ekiponan ku ta partisipá na e grandioso Torneo Komersial di Refineria Isla.

E reunion lo tuma lugá na tereno di Isla na Post 6.
E torneo ta start djabièrnè dia 8 di yanüari i terminá fin di luna di yanüari. Ekiponan komersial femenino i maskulino lo partisipá den e torneo.
E picheo di e torneo lo ta bala pone i no modified slowpitch manera rumornan ta kore den kaya. Tin varios empresa ku lo tin ekiponan tantu den femenino komo maskulino.

Sòftbòl Maskulino Fastpitch ta start djamars 5 di yanüari

Kampionato Maskulino di Sòftbòl Fastpitch ta start djamars 5 di yanüari na Suvek Ballpark. 7 ekipo lo kompetí den e kampionato di 2010.
Lo hunga riba djaluna, djamars i djaweps i si ta nesesario djasabra.

EKIPONAN
Suffisant Eagles, Harlem Power, Survivors, Clase Aparte, Awa Limpi, Eagles i Carpatula lo partisipá na e kampionato 2010.
Ta pidi tur ekipo pa zorg ku nan ta uniformá manera reglanan ta preskribí i ku tur ekipo ta na ora na velt pa weganan por kuminsá na ora. Kòrda ku fairplay i disiplina lo ta nos lema pa 2010.

Tin un selekshon di Sòftbòl Maskulino Fastpitch pendiente pa un kompetensia na Isla San Andres den luna di febrüari.

Swift, Baranka, Catpower, Buena Vista Power, Destroyers i Jaws a konfirmá pa Torneo Kopa Rotativo Joy Alberto

WILLEMSTAD - Grandinan di Slowpitch manera entre otro Swift, Baranka, Buena Vista Power, Catpower i Jaws a konfirmá nan partisipa-shon den torneo Kopa Joy Alberto 2010.
11 ekipo a konfirmá nan partisipashon i tin algun ekipo pendiente.
E torneo lo tuma lugá di 15 di yanüari pa 31 di yanüari na Cirilo Chirino Ballpark.

EKIPONAN
Catpower, Jaws, Destroyers, Latin Caribe, Buena Vista Power, GGD, Navegantes, Max Power, Gamers, Swift i Baranka a konfirmá nan partisipashon.
E organisadónan ta pendien-te di Dalpega, Cicoza i algun ekipo mas.

SIN KOMERSIAL
Baranka a konfirmá pa nos ku lo no tin e parti komersial e aña aki. Keda pendiente pa mas informashon.

Jaws ku dos Dream Team den Liga 50 den 2010

WILLEMSTAD - Jaws di Kid Boca Chica lo ta tremendo den Liga 50 otro aña.
Di bon fuente La Prensa Slowpitch a tende ku Jaws lo tin dos ekipo fuerte den Liga 50. Varios èks hungadó di GGD lo forma parti di Liga 50 di Jaws.

Jaws lo bai ku un ekipo ku varios hungadó ku ta net na rant di 50 aña. Hungadónan ku ta moviendo den gran forma den Liga 40 apesar ku nan a yega 50 aña.

Buena Vista Power den Torneo Kopa Joy Alberto 2010

WILLEMSTAD - Buena Vista Power tei fuerte den Torneo Kopa Joy Alberto organisá pa Baranka Napa Auto Parts.
Nos a kombersá ku Roy Jacoba ku ta general manager di Buena Vista Power.
Roy a bisa nos ku Buena Vista Power lo hunga va-rios torneo den 2010 atrobe i por lo pronto nan lo no partisipá na niun liga.

Roy: “Nos tin nos hungadónan hoben i algun profesho-
nal ku ya tin varios aña ta drei ku nos.
Nos ta bai fuerte pa e torneo Kopa Joy Alberto i algun torneo mas kompetitivo ku tin den komienso di aña.”

GGD super kontentu ku e título supkampion di Liga Amistad

WILLEMSTAD - GGD ta kontentu ku nan sup-kampionato. Despues di e wega finalísimo nan a sinta bou di palu na Ricardo Elhage Ballpark te lat den oranan di atardi. Sidney Pieter fundadó i general manager di e tim a mustra na varios okashon ku e ekipo ta bai pa diber-tí. E aña aki nan a buska algun hungadó simplemente a klasifiká i nan no a spera di yega dje leu ei.

FINALNAN GGD
Pipi Pieter a konta nos un tiki di historia e último añanan.
“Mi ta mira algun trofeo ku mi tin na kas. Basta mi a duna spònser i algun hungadó a bai ku algun. Wim mes tin esun di Torneo Kampion Joy Alberto (Baranka).
Esun mas prinsipal:
1. Supkampion di Liga Amistad na 1997.
2. Kampion regular Liga Amistad na 1998. E aña ei nos a bai ku kasi tur premio. Pitcher tabata Carrol de Palm (èks polis), Beer a bai ku homerun i bateo.
3. Supkampion di Liga Amistad 1999.
Tambe mi tin varios 3er i 4to puesto.
Pues e aña aki ta di 3 biaha ku GGD ta bai final Liga Amistad.”

Revelation Stars kampion Liga Amistad

Liga Amistad 2009 ta gradisí un i tur pa un tremendo kampionato


Revelation Stars a bira kampion Liga Amistad den tereno huntu ku nan fanátikonan. E wega a kaba 15-5 riba homerun di Pong Pong Martijn dia 15 di desember 2009 na Ricardo Elhage Ballpark.
Liga Amistad 2009 a bai tremendo. Bon asistensia durante kasi henter e kampionato i un tremendo final ku a kaba deportivamente.
Un punto menos bon tabata e retiro di Domi, ku finalmente a presentá i tuma nan premio number 4. Domi a anunsiá tambe ku aña 2010 nan lo tei kompletu atrobe.

Direktiva ta gradisí un i tur ku di un manera òf otro a koperá pa e kampionato por ta eksitoso. Ta gradisí umpire, skorer, fanátiko, hungadó, trahadónan den bar, drechado di tereno ets.
Liga Amistad lo ta kompletu atrobe den 2010.

NUMERITO WEGA FINALISIMO

Revelation Stars 15 , GGD 5
Revelations Stars a dal 17 hit i hunga sin eror. Willem Felicia a gana den relevo pa Raylison Gijsbertha.
Merieldo Trinidad i Abigail Vilchez a bati di 3-3.
Helary ‘Pong Pong’ Plantijn a dal 2 homerun, Abigail Vilchez, Edmar Cornelia i Silvio Cruz a dal un homerun.
GGD a konektá 7 hit i hasi 1 eror.
Gregory Martijn a resultá e picher pèrdèdó.
Tjark Valies i Norvaniel Aniceta a bati di 3-2. Norvaniel Aniceta tabatin un homerun.
E wega a terminá den inning number 5.