Wednesday, April 7, 2010

Onderwijs kontra Viva/PSC i Isla versus Omni djaweps 8 di aprel na Suvek Ballpark den Torneo SBAB

WILLEMSTAD - Torneo Soshal SBAB 2010 ta sigi den gran forma djaweps 8 di aprel 2010 na Suvek Ballpark.
Den e promé wega pa 7’or Onderwijs ta topa ku Viva/PSC den wega number dos Isla ta dal den Omni. E wega number dos ta start 8.45 pm.

Djamars 6 di aprel tabatin dos wega tremendo na Suvek Ballpark., Den e promé wega den sekshon femenino SBAB femenino a gana den un wega amistoso. Despues Price Waterhouse Coopers a gana di Ernst & Young.
Nos tin varios resultado kompletu di wikent pasa.

CDM 14, CPA/KTK 4 (Mask.)
Curacaose Dok Maatschappij a bati 19 hit i a kometé 6 eror. Richard Koeiman a gana. Ivan Balentina a bati di 5-4. Richard Koeiman tambe a bati di 5-4. Bertison Ignatia tabatin un homerun.
CPA/KTK a konektá 7 hit i a kometé 3 eror.Marlon Felida a pèrdè. Farley Lard i Rantys 'Terry' Rosina a bati di 3-2.

Palabra di sr. Casper direktor di SBAB den kuadro di Torneo SBAB 2010

E aña aki nos ta selebrá e promé lustro di nos torneo di sòftbòl. Mi kier a gradisí tur ekipo ku a aseptá nos invitashon pa partisipá den e torneo di sòftbòl ku SBAB ta organisá. Ku e torneo aki SBAB e aña aki atrobe kier realisá e siguiente metanan.

Hasi kosnan positivo i kontaminá otro organisashonnan pa nan tambe hasi kosnan positivo;
Haña e oportunidat di konosé e empleadonan di otro organisashonnan den un esfera informal i duna nan e oportunidat pa konosé e otro kara di SBAB;
Hasi uso di e oportunidat pa den un esfera deportivo tende di e organisashonnan kiko SBAB por hasi diferente i den ki forma SBAB por drecha su servisio;
Aksentuá ku SBAB i e organisashonnan ku ta partisipá, banda di metanan ekonómiko i komersial, mester tin komo meta prinsipal pèrkurá pa un Kòrsou positivo i uní.


Den un komunidat chikí manera di nos, éksito personal ta basá riba “ who knows me”. Pues usa e torneo aki komo un oportunidat perfekto pa amplia bo “netwerk”, sigur mirando e kantidat di ekipo ku ta partisipá.

Mi ta spera ku huntu ku bosonan nos lo por hasi e torneo aki esun mas grandi den Caribe si e no ta kaba. No mas grandi so na kantidat di ekipo, pero mas grandi pa loke ta trata, deportivismo, mas komprenshon i rèspèt pa otro, estímulo pa trata otro bon riba tereno i den ambiente di trabou, fraternidat, oído pa opinion di otro, transparensha pa loke ta trata e torneo, nos empleo i nos forma di biba...!

Let’s play ball and have a lot of fun in this tournament, in which benchwarmers will become stars.

Palabra di Komishon Torneo SBAB 2010

Apresiabel amigunan i koleganan deportista,

Danki pa ta partisipando na e torneo di sòftbòl ku ta pa tur i ta uni tur; SBAB Social Softball Tournament 2010!
E aña aki nos prestigioso torneo ta kumpli su promé lustro demostrando asina’ki ku union semper ta hasi forsa.
Anualmente ta ku bosnan aporte i sosten, e torneo aki a krese i bira e torneo di sòftbòl tan grandi i eksitoso ku e ta awe. Mirando kon nos a kuminsá na aña 2006 i na unda nos ta awe 5 aña despues, ta dimas menshoná ku trabou duru ta paga...!

Meta prinsipal di e torneo aki ta pa nos interkambiá un ratu riba tereno deportivo i sosialisá ku otro, lubidando asina’ki tur loke ta trata trabou. Di e forma aki nos ta pone tur e preshon i strès un banda, pa nos dibertí sanamente ku otro. Kompetiendo nos ta sera lasonan di amistat nobo, fortifiká esnan eksistente i asina alabes kontribuí na union di nos Kòrsou.

Boso aporte ta di mayor importansha pa nos logra e meta aki. Ta p’esei nos ta ferwagt di kada un di boso ku boso lo akudí riba e fechanan stipulá. No lubidá di bini ku bo mihó beis i un aktitut hopi positivo...! Ku boso sosten i alabes esun di e fanátikonan nos por hasi e luna aki unu sumamente alegre, plasentero i eksitoso kaminda union i un aktitut spòrtif a prevalesé un biaha mas.

Ku un saludo deportivo nos ta finalisá.

Komishon organisadó di SBAB Social Softball Tournament 2010

Thursday, April 1, 2010

Torneo SBAB ta ranka sali djasabra 3 di aprel na Suvek Ballpark

WILLEMSTAD - Torneo Soshal SBAB 2010 ta start djasabra 3 di aprel na Suvek Ballpark ku
partisipashon di un kantidat rèkòrt di 66 ekipo.
39 ekipo den e sekshon Maskulino i 27 ekipo den Femenino.
E aña aki ta di 5 aña ku ta organisá e torneo.
Na 2006 e promé torneo e keda organisá.

Djamars tabatin un reunion kombiná ku un konferensia di prensa ku a keda bishitá pa kasi tur ekipo. E komishon organisadó enka-besá pa Ryan Isebia a duna un splikashon amplio i ekiponan por a hasi pregunta. Skèdjel i tur detaye ta kla pa ranka sali ku e tremendo torneo tradishonal aki 10’or di mainta djasabra ku e partido entre CDM -CPA/KTK. E pulnan ta partí e aña aki den Male Sosial, Male Challenger, Female Sosial i Female Challenger.

CITCO ku tres título i MCB ku dos título di Torneo Soshal SBAB

CITCO a bira kampion di torneo SBAB na tres okashon miéntras MCB a bira kampion di SBAB na dos okashon.
La Prensa Slowpitch ku lo dediká hopi na e torneo SBAB manera ta e kaso den pasado tin tur e kampion-nan.
CITCO a bira kampion tres biaha den Maskulino i un biaha den Femenino, miéntras MCB a titulá kampion dos biaha den femenino.


KAMPIONNAN
2006
CITCO Kampion Maskulino
MCB Kampion Femenino

2007
SBAB Kampion Maskulino
UNA Kampion Femenino

2008
CDM Kampion Maskulino
CITCO Kampion Femenino

2009
CITCO Kampion Maskulino
MCB Kampion Femenino
Avila Hotel Kampion Maskulino Soshal
BC/Konseho Insular Kampion Femenino Soshal

Aña 2009 a bini ku e sekshon Soshal pa ekiponan ku menos hungadó aktivo.

Apertura ofishal Torneo SBAB djasabra 6.30 pm na Suvek

Apertura ofishal di Torneo SBAB lo ta djasabra 3 di aprel pa 6.30 pm na Suvek Ballpark.
Weganan ta kuminsá for di 10’or di mainta tantu riba tereno A komo tereno B.

Despues di apertura ofishal lo tin un tremendo partido entre CITCO 2006 i SBAB 2007 den Maskulino.
CITCO tabata e promé kampion di Torneo SBAB den Maskulino miéntras SBAB tabata di e di dos torneo.
E ekiponan aki lo presentá ku e ekiponan ku nan tabatin e añanan ariba menshoná.
Ta varios di e hungadónan no ta traha mas pa e empresanan ei pero lo bini bèk pa e wega aki. Keda pendiente pa mas informashon.