hoben ku un forsa inkreibel pa dal e bala di Sòftbòl. Vanessa Winklaar ku apénas 17 aña ya a forma parti di diferente selekshon di grandi di sòftbòl femenino. Vanessa kariñosamente yama Nèta ta forma parti di e ekipo Pichingolo Kia.
VANESSA
Vanessa Coromoto Winklaar, mihó konosí komo Nèta a nase na Kòrsou 7 di septèmber 1985 i ta biba na Kaya Krisokola 23. Vanessa ta midi 1.72 m i ta bishita MBO Ban Bria.
Vanessa ta ruman di Djuric Winklaar ku tabata hunga ku Lecce ekipo di Futbòl Italiano.
Vivian Winklaar- Kwidama ta mama di Vanessa. Tata di Vanessa, Erwin Winklaar a fayesé algun aña pasa.
Djuric a hasi deporte for di tempu e tabata chikitu ku e ekipo di Vesta te ku awor e ta ku Lecce. Djuric tin 20 aña. Erwin Winklaar (QEPD) tata di Vanessa a hunga vòlibòl den e ekipo Jumps di Suffisant. Mientras e Vivian sa trein muchanan slagbal na skol. Vivian su rumannan tabata hunga vòli.
KOMIENSO
“Mi ruman Djuric tabata bisa mi mama ku mi ta floho. Ku mi ta sinta den kas so sin hasi nada. Djuric a bisa mama, hinka Vanessa den un deporte. Dor ku yu di Taffy de Jongh tabata bai mi mama su skol, mi mama a puntra Taffy ku ami por kuminsá hunga sòftbòl serka nan den Pichingolo.
Asina ei mi a kuminsá den Hubenil. Mi a kuminsá na aña 1998, mi tabatin 12 aña. Anto e ora ei mi a kuminsá den Pichingolo Hubenil. Mi tabata sinta banki i tin biaha mi tabata haña chèns di bin bati.
Siguiente aña Pichingolo a traha dos tim den Hubenil ya esnan mas chikitu ta haña mas chèns di hunga. E ora ei mi a haña mas chèns di hunga i haña mas eksperensia E aña ei mes, aña ’99 mi a bai ku selekshon Caracas, Venezuela. Esei tabata U-17 mi a sali di 4 lugá
Mi a praktiká atletismo tambe un tiki tempu mi tabata flaku.Mi no tabata regular, mi tabata bin bati komo pinch-hitter i tin biaha designa. Mi a praktiká atletismo tambe un tiki tempu mi tabata flaku.” Vanessa ta sigi konta.
Vanessa Winklaar ta konektá hit fuerte pa senter durante wega di su ekipo di Skol Ban Bria
PICHINGOLO
Vanessa: “Aña 2000 ya mi hunga den dòbel A kaba den Pichingolo Nissan e aña ei mes nos a bai ku selekshon na Hubenil Bahamas i bira kampion. Mi promé aña den dobel A mi a hunga ku e Pichingolo grandi mi tabata bati DH na lugá di Dògònan aki ora ora. Mi no por tabata hunga primera base pasobra Asila tei.
E aña ei mes 2000 mi a bai Bahamas. Einan a bati hopi bon mes. Na Bahamas mi tabatin 15 aña i den U 19. Boelijn ku a djoin e selekshon e tempu ei den lat ta algun luna mas chiki ku mi.
Mi no sa kon bin mi ta dal e bala duru asina, por ehèmpel na Bahamas ta swing mi ta swing anto e bala ta bai masha leu mes. Tabatin un par di hende di ambulans ku mi no konosé mes tabata bisa Vanessa come on, come on Vannesa over de Fence.
Aña 2000 ku Nissan mi a bira kampion.
2001 mi a bai Pichingolo Kia. Den Kia (e tempu ei, e ekipo Kia no tei mas, Pichingolo tin solamente un ekipo ariba.) si mi a hunga regular den KIA.
Einan mi a kuminsá hunga bon, dal Dògò nan aki tambe. Awor si Dògònan aki a kuminsá ta tirami kosnan straño, ‘change up’ ku ta yega kai masha straño mes. Mi no haña bala règt fásil mas pa bati.
E fildeo tambe a bai hopi bon, mi a hunga den outfield tambe, den left ku right. E fildeo sigur a bai hopi dilanti asta nan a meshoná mi aña 2001 ku wante di oro na primera.
Vanessa den akshon na tersera, banda di Vanessa otro estreya di Sòftbòl Femenina, shòrtstòp Jenny Kinburn.
SELEKSHON
“Promé tabata na Venezuela aña 1999, despues 2000 mi a bai Bahamas ku e selekshon aya ku a bira kampion despues ku hopi hende no por a hunga. Na Venezuela nos a sali number 4.
2001 mi a bai Koninkrijkspelen na Hulanda i sali na di dos lugá. Despues a bini e biahe ku Pichingolo na Santo Domingo. Aña 2002 mi a biaha hopi. Promé nos a bai Puerto Rico pa un treiningscamp, pre-selekshon. Mi mester a bai Santo Domingo tambe pasobra mi pasport a kaduká. Ke men mi no por a bai Treiningscamp, pre-selekshon na Santo Domingo promé ku bai Puerto Rico tambe debí na pasport.
Yüli 2002 nos a bai Canada, e pichernan einan ta mahos. Bo no por tuma strike, un hit so mi a bati. Nan ta tira poko kos manera ‘Yoyo’ bo no bo bati e hendenan ei fásil.
Leonise a dal e pichernan ei bon, e la dal un homerun den e promé wega. Ei no ta wega, kontra Chinese Tapei mi a hera di dal homerun. Tur biaha ku mi dal e bala leu e fileadonan ta hunga leu i para net dilanti fens kue e balanan.
E pichernan den Mundial no ta tira bo masha rekta, bala ta kai, bala ta lanta, bala ta bini masha duru mes.
Si e bala no bin duru mes, e bala tin yen di kos den dje.
Despues di Canada nos a bai Brazil, einan nos a hunga den e kampionato Odesur. Einan nos a bira kampion, einan tabata ménos fuerte i mi a bati hopi mas mihó, segun mi riba .300.
MIHO KONTRINKANTE
E mihó picher ku mi ta enfrentá lokal ta Rose Kinburn. Internashonal ta un picher di Merka ku mi no ta kòrda su nòmber aworaki. Komo ekipo e tim ku ta duna Kia mas dolo di kabes ta Nissan, sigui pa Baretta. Idelienne Martis tambe ta picha bon nunka mi no por a dal’é manera mi ke.
Vanessa Winkaar sigiendo e wega ku atenshon for di dugout.
PREMIONAN INDIVIDUAL
“Mi a sali kampion bate di skol i tambe gana keda nominá pa wante di oro di Sòftbòl aña pasa.”
HOBI
“Landa, mi gusta landa mes, mi gusta baila tambe, pero bo mes sa baila mi so pasa prèt mi no sa bai fiesta masha.
(Vivian mama di Vanessa ta bisa ku un tempu Vanessa tabatin e hòbi rabia tambe, tur kos e tabata rabia. Aworaki e deporte e pone ku e no ta rabia hopi mas. Figura bo kada biaha ku nan kue un bala òf un kos no bai bon den deporte bo ta rabia, rabia ketu bai no por. Aworaki Vanessa ta hari so i tur hende ta bisa ku e ta hari hopi.) Mi mes ta haña ku mi a kambia hopi i mi no ta rabia hopi mas”, Vanessa Winklaar a splika nos ku un kara sonriente.
OTRO KOSNAN
Pa loke ta kos di kome Vanessa ta bisa: “Spare ribs mi gusta spare ribs stoba mes. Delasternan aki mi a kuminsa kome spare ribs stoba eh eh.... e kos ei ta baha.
Mi outo preferi ta ... ya.. outonan ku nan ta drecha ku mac reem ets i mi gusta bròmer . Mi kolo preferí ta pretu espesialmente paña pretu.”
TREINING
Vanessa :”Mi ta trein 3 biaha pa siman. Ora di selekshon, tempu ku tabatin hopi selekshon tas di otro, selekshon tabata trein banda di otro pero hopi biaha mes tereno.
BON EKSPERENSIA
Vanessa Winklaar: “E selekshon di Bahamas di mes, mi no a bai pa hunga na primera base, mi a bai pa DH i dos ku pa motibu di malkomprendementu asuntu di edat, mi a haña mi ta hunga primera base e kosnan a bai masha bon mes.
Ora mi ta bai afó tambe, e tio ku tantanan ta koperá masha bon mes ku un kos chikitu. E ta yuda sigur i mi ta hopi agradesido na mi famia ku ta koperá masha bon mes. Esei tambe ta un bon eksperensia òf nò.
Otro eksperensia great ta dia mi a bai Brazil. Mi tabata sinta den dugout, mi ta tende Chapè Chapè, un hende ta papia Papiamentu i grita Chapè Bernardus nos coach.
Despues e resultá ta un tio di mi ku yama Franklin ku tabata na Brazil pa trabou. Mi no tabata sa mi a haña e kos ei masha leuk mes. e tabata echt un sorpresa.
Mi tio a bini ku un par di hende i mi a firma masha hopi mes pa nan, masha great mes.
Mal eksperensia mi no tin òf mi no ta kòrda.
FUTURO
Mi ke sigui den direkshon di administratie i lo mi bai MBO den direkshon di administratie. Lo mi sigi hunga sòftbòl tambe. Te kaminda e kurpa ta duna lo mi keda hunga sòftbòl
MENSAHE
“Esnan ku ta afó drenta deporte, deporte ta dushi mes. Deporte ta siña bo ta uni ku otro hende, kon pa dominá bo mes, bo ta siña komprondé bo mes, bo ta siña yen kos bo ta haña eksperensia, disiplina tambe no den deporte so pero den bida tambe bo ta siña.
Esnan ku ta den deporte sigui dal bai, deporte ta hopi dushi. No bisa ku bo no ta bon anto keda sin bai mas. Keda lucha, ta masha poko hende a kuminsá bon, Mi tambe no a kuminsá bon, despues mi a drecha i kosnan bon a kuminsá bini.
Pone bo kabes den e deporte, trein anto e kosnan ta bini di mes.”
No comments:
Post a Comment