Sera konosí ku Tsade Joubert, sòftbolista ku a risibí scholarship pa studia na USA

WILLEMSTAD - Softballcuracao.com a kombersá ku Tsade Joubert, sòftbòlista di e ekipo di Pichingolo i selekshon Senior/League Hubenil ku resientemente a risibí un Scholarship pa studia i hunga Sòftbòl na Estados Unidos.


TSADE
Tsade Marie Joubert a nasé na Kòrsou 11 di yanüari 1990 i ta bibá na Troepiaalweg 24, Julianadorp. Tsade ta alumna di Peter Stuyvesant College den klas VWO 6.
Tsade Joubert ta yu di Eric i Ludgarda. Tsade tin un ruman hòmber ku yama Andre ku ta studiando na Hulanda.
"Mi tata a hunga un tiki beisbòl sí, pero no den tim. Mi tionan por ehèmpel Steven Phelipa, ruman di mi mama tabata hunga beisbòl i sòftbòl den tim, mi mama no a hasi deporte", Tsade Joubert sòftbòlista ku resientemente e risibí un 'scholarship' pa studia í hunga sòftbòl na Estados Unidos ta konta Softballcuracao.com.


KOMIENSO
Tsade: "Mi a kuminsá for di chikí. For di chikí mi kier a hasi deporte pero mi no tabata sa kua deporte mi hasi. Mi tabata hunga sòftbòl huntu ku mi ruman hòmber i primunan den kurá di kas.
Mi tabata fangu ku wante ets kaba. Mi a kuminsá move den kurá di kas ku mi primunan for di dia mi tabatin 5 aña. Mi tabata interesá pa hunga tènis tambe pero nunka mi no a hunga tènis ofishal.
Mi mama tabata konosé un señora i e señora ei konosé Taffy de Jongh. E señora yama Carlintje Cleofa i ta traha na 'Financiën' huntu ku mi mama. E señora a puntra mi mama ku mi ta interesá pa hunga sòftbòl i asina ei ku 11 aña mi a kuminsá trein den e ekipo di Buena Vista. Por bisa ku asina ei mi a kuminsá ku e deporte di sòftbòl den tim. Aworaki mi ta 6 aña ta hunga sòftbòl den e ekipo di Buena Vista. Mi a kuminsá aña 2002 ku Buena Vista i biaha mesun aña ei ku selekshon pa Puerto Rico.
Dor ku mi tabata hunga ku mi ruman i primunan den kurá ora mi a drenta tim ya mi tabata por a fangu ku wante i bati kaba.
Mi no a hasi otro deporte."

EKIPONAN

Tsade Joubert: "Mi promé aña mi a hunga den e ekipo Gomez Enterprises. Ekipo di Little League di organisashon Buena Vista. Despues mi a pasa pa Junior League den e ekipo The Bear. Despues di dos aña den Junior nos a pasa pa e ekipo di Senior League Hotel Otrabanda. Un aña so e ekipo di Senior League a keda ku e spònser Hotel Otrabanda i despues nos a bira Fundashon Sedreko. Mi a keda dos aña mas ku Fundashon Sedreko, ke men tres aña den Senior League debí na e kambionan den edat ku Little League a trese.
Mi a hunga aña pasá den Hubenil di Pichingolo ku e ekipo Kia i nos a bira kampion. E aña aki den mi di dos aña den Hubenil nos a bira supkampion.
Mi a hunga aña pasá i e aña aki tambe mi ta hungando ku e ekipo Pichingolo.
Mi a hunga komo shortstop for di komienso den tur e timnan ku mi a hunga. Den selekshon tin biaha mi ta hunga shortstop i tambe na segunda. Mi a hunga na segunda ora Jenny Kinburn ta hunga short òf tabatin biaha den selekshon tambe Varesie Servania tabata hunga short."

SELEKSHON
Tsade Joubert tabata den tur selekshon for di dia ela kuminsá ku sòftbòl na lantamentu di Softbol Little League na aña 2002. Tsade a bai ku selekshon Little League Puerto Rico na aña 2002 i sali supkampion. 2003 na Aruba ku selekshon Junior i bolbe sali supkampion. 2004 na Puerto Rico (Maunabo) atrobe i sali supkampion atrobe ku selekshon Junior. 2005 atrobe na di dos lugá. 2006 Tsade a sali kampion na Mayaguez (Puerto Rico).
Tsade: "Tabata un eksperensia inolvidabel aña 2006 dia nos a bira kampion. Un tim hopi uní mes. Si bo tin un tim uní bo tin hopi chèns. Mi tabata den selekshon di Weganan di Reino tambe dos biaha. Na aña 2005 na Kòrsou i e aña aki na Hulanda. 2005 no a bai masha bon, nos a sali último, pero 2007 por poko nos a bira kampion. Nos tabata ganá te den di 6 inning, pero ya.. nos a pèrdè. E wega ei a duel mi hopi, pero mi tin ku bisa ku e tim di 2006 tabata muchu mas uní ku e tim di 2007.
KONTRINKANTE FUERTE
"Na Kòrsou..... picher... Suliviendra Hooi. Mi tin rèspèt p'e. E ta keda esun ku mas velosidat. Pa loke ta trata batiadó mi ta kere Jenny Kinburn.
Pa loke ta e timnan rival fuerte mi ta kere ta Persio. Ta nan sa gana nos di Buena Vista mas tantu", Tsade Joubert ta sigui papia ku Softballcuracao.com den un entrevista ekslusivo.

PROFESHONAL/SCHOLARSHIP
Tsade: "Mi ta deseá di hunga profeshonal un dia. Na Merka tin sòftbòl profeshonal i si mi haña un chèns lo mi hunga profeshonal.
Mi a risibí un full 'Scholarship' pa start aña eskolar 2008 na Louisiana Sint Nicholls State University. 4 pa 5 aña lo mi hasi accounting i naturalmente hunga sòftbòl. For di chikí mi tabata kier a bai Merka i haña un scholarship pasobra studia na Merka ta hopi karu.
Lo mi bai hunga short i segunda na Merka. Ta tur bon ku tin, ta hopi hende yu di Kòrsou, Merikano ta soña pa haña un Scholarship.
Mi ta hasi mi bèst pa mi kaba mi VWO pa mi start despues di fakansi na Merka. Tur kos ta wòrdu kubrí, ta mi ticket so no ta wòrdu kubrí."

PREMIONAN
"Mi no a gana premio kasi nunka debí ku no tin premio den Little League. Mi a sali mihó segunda base na Puerto Rico 2006. Mi a yega di kaba ku averahe mas haltu tambe pero sin gana premio"

LO MAKSIMO
"Pa mi ta e 'scholarship'. Ta algu grandi mes, algu ku semper mi a soña kun’é. Hunga sòftbòl i studia na Merka esei pa mi sigur ta lo máksimo. Bon, e kampion na Puerto Rico di 'Senior League' aña 2006 tambe tabata hopi great i bai hunga na Mundial na Merka, e trato ku nos haña ets. tambe un di e kosnan máksimo ku mi a logra."

OTRO KOSNAN
"Mi hòbi ta kushiná, mi gusta kushiná. (promé biaha ku nos a tende un hóben ku tin e hòbi kushiná: tremendo!!RED).
Mi ta kushiná vários kuminda krioyo. Mi gusta lesa i deskubrí kosnan nobo, wak televishon tambe.
Mi gusta kolónan blou i ros. Mi gusta kome pizza i tur kos ita-liano manera lazaña, pero kuminda krioyo tambe manera yambo ets."

BON EKSPERENSIA
Tsade: Naturalmente ora mi a risibí e notisia ku mi a haña e scholarship. Dia nos a bai World Series (Mundial) e manera ku nan a trata nos. Masha bon mes nan a trata nos i hunga den un Mundial ta un eksperensia úniko i bon.
Na Hulanda tambe durante Weganan di Reino nan a trata nos bon. Nan ta pone bo sinti bo importante. Esei tambe ta bon eksperensia pa mi.
Mi tin ku bolbe hasi menshon di e trato ku nos a haña na Merka, hopi dushi mes. Hopi otro for di Puerto Rico."


MAL EKSPERENSIA
"Ta hopi tin", Tsade ta bisa ku un sonrisa riba su kara. "E loke nan ta hasi na Puerto Rico. E kosnan di 'oneerlijk' ku umpirenan ta hasi i e dirigentenan, bo ta haña gana di yora pero bo tin ku bai duru. E wega ku nos a pèrdè na Hulanda den Weganan di Reino tabata un sla duru, un mal eksperensia", Tsade ta konta redaktor di Softballcuracao.com.

PARTI FUERTE
"Mentalmente mi ta fuerte. Mi ta keda lucha te na último. Ora kos ta bai malu mi ta purba pensa ku nada no a pasa, purba keda focus riba e wega.
Ora mi hasi fout mi no ta keda riba e fout, mi ta purba pèp mi mes up, pa sigui di focus den e wega.
Físikamente mi mes ta haña mi ta move lihé tras di e bala nan. Pa mi posishon ku mi ta hunga mi mester move hopi.
Mi ta kere den union den tim. Nos tabatin timnan masha bon mes ku a pèrdè. Si bo tin un par di mucha kurpa grandi i bon ta-lento esei no ta nifiká ku bo ta gana. Bo mester di union pa bo gana", Tsade ta sigui konta for di su kas na Troepiaalweg.

MENSAHE
"Pa esnan for di deporte, semper lucha pa loke bo ke logra. No hasi nada si bo no ke. Si bo no ke hasi deporte bo por hasi otro kos positivo. Deporte ta dushi si, deporte ta great. Ora bo drenta , trein fuerte i lo bo logra. Meskos ku den bida si bo traha duru bo ta logra.
Esnan den deporte sigui hasi bosnan bèst. Ora kosnan ta bai ménos bon no kibra, keda lucha i kere den bo mes. Deporte ta dushi."

FUTURO
"Hasi mi bèst pa mi kaba VWO pa mi bai studia i hunga sòftbòl na Merka ku e 'scholarship' ku mi a haña.
Ta un oportunidat úniko.
Mi mester probechá i hasi'é bon.
Lo mi bolbe bèk Kòrsou si ora mi kaba.
Un danki speshal na coach Taffy ku a trein mi ku asina tantu smak. Hopi danki Taffy”, Tsade Joubert ta terminá e entrevista ku Softballcuracao.com.