WILLEMSTAD - "No a bai manera e dos añanan promé ku mi a bin. Naturalmente mi ta poko desepshoná paso sigur lo mi tabata ke pa nos tim lo a hunga den play-off loke no a resultá asina", e tremendo deportista i pitcher venezolano di Sòftbòl Femenino Fastpitch ta bisa den un kombersashon ku e tabatin ku bo Revista Deportivo Kòrsou.
1 aña sin hunga
"La Bella" Mariela ta konta ku ela bin Kòrsou i tabatin kasi 1 aña sin hunga, ya ku for di dia ela sali for di selekshon di su pais e no a hunga. "Mi tabata pitcha kontra hende hòmber, pero no ta meskos. Huntu ku esei m'a subi tambe algu di peso", Mariela ta splika. Ela bisa ku e no a pensa ku nan lo buskele for di Venezuela pa bin pitcha atrobe na Kòrsou.
Retiro for di sòftbòl
E tremendo pitcher venezolano ta rekonosé ku a pasa den su kabes pa retirá di sòftbòl aktivo i dediká su mes "full-time" na training di mucha. E ta splika ku na Venezuela e ta train mucha pa Estado Carabobo.
E ta bisa ku e hecho ku Venezuela a hunga den Olimpiada a lanta e interes pa sòftbòl den e pais i tin hopi mucha ku ta interesá di hunga sòftbòl.
Mariela ku tabatin su bon momentunan ku selekshon di sòftbòl di su pais no a keda muchu kontentu ku e trato ku ela haña na final. E ta pensa ku ela meresé di bai Olimpiada tambe ku e selekshon di su pais. "Mi ta kere ku mi a meresé esei", e ta añadi.
Na 2007 ela bai un gira na Brazil i pa su sorpresa e no a wòrdu yamá mas pa selekshon. Ela bisa ku e selekshon ta kasi e mes grupo ku tabatin 8 aña huntu ku eksepshon di algun sòftbòlista hóben.
Selekshon di Venezuela
Mariela ta splika ku e pitcher estelar di Venezuela aktualmente ta Mariangi Bogado. Ela kuminsá na Venezuela den kategoria Junior, ela bai Canada ku un entrenadó Canades i despues ela haña oportunidat na Universidat na Estados Unidos kaminda ela sigui desaroya su pitcheo. E selekshon di Venezuela su nivel a subi hopi, den Bogado i Johana Gomez nan tin dos pitcher hóben di bon nivel.
Sòftbòl di Kòrsou ta mehorando
Ounke di a keda poko desepshoná paso Sta. Rosa Angels no a kai den play-off, Mariela ta rekonosé ku e kompetensia lokal ta bon i ta mehorando.
E no tabata konosé e tim di Paradise, ni tampoko esun di Soto. "Bo ta mira ku e nivel di e sòftbòl femenino di Kòrsou ta subiendo.
Tin hopi material na Kòrsou
"Ku poko mas motivashon Kòrsou lo por tin un selekshon di sòftbòl bèk bon manera antes. Tin hopi "material", ta traha mester traha ku e muchanan, motivá nan pa hunga sòftbòl i train fuerte. Kòrsou su selekshon mester kuminsá bai kompetensia internashonal atrobe. Ta e úniko forma pa bo lanta bo nivel. Loke ta bon aki na Kòrsou ta ku tin mucha ta train, tin e ánimo", e ta remarká.
Lo mi ta mihó prepará
Mariela ta sigur ku si e regresá Kòrsou otro aña elo ta mihó prepará. E hecho ku e no a bin den mihó kondishon a pone tambe ku ela haña poko leshon i no por a pitcha manera e mester a pitcha o kier a pitcha.
Mariela ta splika ku nunka e no ta adelantá. "Mi ta sigur ku ainda mi ta sirbi komo pitcher i si mi haña e oportunidat otro temporada lo mi demostrá esei", e deportista venezolano ta bisa.
Loke Mariela ta pensa mesora
Revista Deportivo Kòrsou a pidi Mariela pa kontestá kòrtiku kiko e ta pensa ora e tende lo siguiente:
The One: Mi ta gradisí nan, pasobra nan a tresemi promé biaha.
Korsou: Semper duna lo maksimo.
Leones di Caracas: Ami ta Magallanes.
Selekshon Softbol di Venezuela: Esfuerso, Konsistensia.
Selekshon di Softbol di Antia: Un selekshon ku ta duna bataya. Hopi rekuerdo...
Judith Piña: Gran pitcher Venezolano.
New York Yankees: Gran potensia di baseball.
Pichingolo: Un organisashon di disiplina, tremendo ekipo.
Miho pelotero Venezolano: Edgardo Alfonso.
E miho pelotero aktivo di Venezuela: Francisco Rodriquez/Carlos Zambrano.
(Entrevista saká for di Revista Deportivo Korsou edishon 143).
No comments:
Post a Comment