Happy Brothers ta benta e strea di Calabas Dream Team abao 9-4

ORANJESTAD - Despues cu Calabas Dream Team tabata tin un aña bastante bon unda nan a titula Campeon den Copa ABC reforza cu e trio Fano, Jimmy y Pierre y despues ta titula campeon di Copa Noord sin refuerzo, nan a bira masha selectivo den nan invitacion-nan y no tabata tuma mucho wega despues di lina di july y asina trata na sali for di aña 2007 cu un cara bunita. No obstante esaki siman pasa nan a bisa si na un reto di e muchanan di Happy Brothers kendenan tabata buska un wega cu Calabas Dream Team henter aña pero no a logra y aki Happy Brothers ta gana e partido cu score di 9-4. Un tremendo wega unda Calabas Dream Team tabata gana 4-2 tras di un homerun di Jonnathan Tromp pero depues Eldrick Dijkhoff y Pilin Krosendijk ta pone e bala zona pafor di parke y pitchernan di Calabas Dream Team Tata cu Jiu Kelly no tabata por a bin kla cu e bateria di Happy Brothers. Silvio "Buchi" Flanegin tabata skerpi riba monticulo y ta ricibi relevo di Poy Flanegin den di 7 entrada pa bay cas cu e victoria. Happy Brothers di e manera aki ta sera aña derotando e campeon di Copa ABC y Copa Noord y a manda bisanan , you can run but you cannot hide, pues wanta duro den 2008.