Buena Vista.
PICHINGOLO
Varios hungadó di Sòftbòl tabata bai Santa Martha Lagere school ku te keda banda di misa di Buena Vista (pega ku awor ta SKAI).
Bernadita: "Nos tabatin un tim di slagbal i nos kada unu mester a bai otro skol, skol avansá. Ami a bai Stella Maris, Silvia a bai otro skol.
Pa e kring no kibra nos a disidi di hunga sòftbòl, pero na moda di slagbal.. Nos no tabata sa muchu muchu di e sòftbòl mes. Kabando zesde klas tabata mas o menos 1971 i nos tim a sali supkampion di slagbal.
Pichingolo na Venzuela 1974
Nos a bai riba e velt kaminda aworaki tin garashi di konvoi ABC na Buena Vista. E tereno tabata greis, pieda mes, duru duru.
Nos a kuminsá ku e slgabal i nos a disidí ku nos ta bai over na e sòftbòl mes sin sa nada nada di e sòftbòl.
Mi a pidi mi tio duna nos un par di bala i wanta. Mi tio Raymundo Keep a duna nos e balanan di mas bieu ku tabatin. Mi opa tabata kose e balanan na man i e wantenan tambe.
Un biaha pa siman nos tabata trein, tur djasabra. Esei tabata aña 71 pa 72. Tur hende a kuminsá gusta i nos a kuminsá bai dos biaha pa siman en bes di un biaha.”
Silvia: " Kòrda, mayoria di mucha tabata biba den Buena Vista. Nos tur tabata biba den Buena Vista i nos tabata hopi pega na otro.”
Bernadita i Silvia: “Algun hungadó ku nos ta kòrda tabata Clara Comenensia, Annie Holder, Ivette Ali, Vera Refos, Ruperta Keep, Miluska Keep, Bernadita, Silvia, Silviani i Selma Clarcke (tres ruman Silvia i Silvania ta ohochi).
E tim no tabatin nòmber. Mi tio a bisami ku e mucha hòmbernan tabata trein i pa nos bai wak nan trein pa nos por siña. Despues nos a kuminsá bai wak nan trein i nos a pidi nan pa nos trein huntu ku nan. Ei tabata e velt di futbòl ku ainda tei. Regulo Montero i Fay Montero a disidí di bin yuda nos trein.
Pichingolo despues di a bira kampion pa di 30 biaha 20 di novèmber 2007 na Sabana Ballpark
Asina ei nos a kuminsá trein bou di Regulo i Fay (nan ta ruman !). Asina ei nos a bai velt i tiki tiki e kosnan a kuminsá bini i ami ku Silvia a kana na pia for di Buena Vista te Maduro Plaza. Nos tabatin 14 aña so i nos a kana tur e kaminda ei en buska di spònser.
Einan e mener Yankee Maduro a risibí nos i nan a bin spònser nos.
Maduro a spònser nos i nos promé sponser tabata Soberano ku ta nòmber di un bebida.
By the way, tabatin Pichingolo maskulino kaba ku ta e mucha hòmbernan ku tabata trein.
Nos a hunga algun wega di treining, tabatin ekiponan ma-nera Blue Bells, Apache ets. i nos a hunga algun wega di trei-ning.
Ke mèn na 1972 nos a haña unifòrm i na 1973 nos a inskribí. Ta Rising Trotters tabata e ekipo ku ta manda e tempu ei huntu ku Paradise ets. Trotters tabatin 10 aña siguí kampion. Tabatin solamente un liga, no tabatin Dòbel A i klase A ets.”
AÑA 1973
"Nos a inskribí i nos a bai nos promé kampionato na 1973. Nos a pèrdè tur wega i bai kas bai yora," Bernadita ta konta bou di harimentu for di su kas huntu ku Silvia Wilson.
Bernadita i Silvia: "E tempu ei tabatin Norma Carolina, Evelyn Willems, Diana Medina. Mira’ki ta hendenan ku tabata tira masha duru mes, mes duru ku Dogonan aki (Roselyn Kinburn) ta tira aworaki. Bo wak Aida Juliana flaku ei riba e pòtrèt. Bo mes sa ora e veteranonan ei bin, warda kurpa. En todo kaso nos a pèrdè tur wega.
E siguiente aña federashon a laga 5 pa 6 tim keda ariba i nos a bai A-Klas debí ku nos no a gana niun wega i outomátikamente nos mester a bai klase A.
Einan a bini e kambio drástiko.”
Silvia: "Semper nos tabatin un fighting spirit masha hatlu mes. Nos tabatia trein masha hopi. No tabatin dia di fiesta, nada, trein nos tabata trein, trein trein ketu bai.”
Bernadita: "Nos a pèrdè 10-0 kontra Norma Carolina i su tim. Mi a para komo manager, Montero komo manager ratu ratu tabata lanta loko i keda sin presentá i mi mester a para komo manager. Mi tabata e promé manager femenina den Dòbel A."
Silvia: "Mi ta kòrda e dia ku nos a pèrdè 10-0 ei nos a bai Blauwbaai. Mi ta kòrda ku semper nos tabata bai Blauwbaai (aworaki Curasol Resort) na pia i bini bèk Buena Vista na pia. 12'or di mèrdia nos a skucha deporte i tende ku nos tabatin wega e anochi ei. Nos a haña 10-0 i mesun dia Taffy a bin wak nos wega.”
Bernadita: “Mi ruman muhé a invitá Taffy bin wak wega i ela yuda nos hinka e line-up den otro. Nos no tabatin nada di line-up ets. i Silvia tabata kapitan i ami komo manager. E wega ei tabata mi promé wega i promé mucha muhé komo manager. Taffy a yuda nos henter wega pafó. Taffy a bira manager despues. Taffy a bini e wega ei huntu ku Chape Bernardus.”
Silvia: "Taffy a bini ku un sinta kòrá mará na su kabes. E tempu ei e disku 'change is gonna come' tabata na moda. Despues ku Taffy tabata trein nos semper e tabata keda bisa e palabra ei.
Te awe nos ta mirando e kambio ei ketu bai. Taffy i Chape tabata amigu for di e tempu ei.”
AÑA 1974
"Taffy a tuma over i nos a bai promé aña den klase A. Asina ei e era ganadó a kuminsá. Tabatin mas o menos un seis tim den klase A. Nos a lucha duru pa bira kampion e aña ei, aña 1974. Trabou hopi duru tabatin. Tabatin masha hopi tim tabatin. Nos tabata e tim mas hoben. Tabatin timnan den klase A ku muchanan muchu mas veterano ku nos. E play-offnan tabata serie mihó di tres i no tabata fásil. Segun nos, nos a sali pèrdè promé wega. Tin biaha bo tabata asta keda sin bai skol debí ku e wega tabata hopi duru.
Nos a bira kampion i gana promoshon/degradashon, segun nos ta kontra Sint Joris i bai
Dobel A”, Bernadita i Silvia ta konta Softballcuracao.com.
AÑA 1975
Bernadita i Silvia: "Nos a bira kampion ganando Rising Trotters den final. Rising Trotters tabata kampion pa 10 aña siguí. Nos tabata uní, nos tabata trein fuerte, e fighting spirit tabata tremendo.
Nos tabata trein hasta Dos Dia di Pasku. Pasku nos tabata respetá. Kasi tur dia nos tabata trein. Taffy tabata trein nos bon mes i fuerte huntu ku Chape. Otro kos ta ku henter bario di Buena Vista tabata nos tras, masha hopi hende mes tabata bin wak wega. Nos tabata saka kasi henter bario di Buena Vista trese tereno.
Di einan nos a keda kampion te aña 1985. Na 1986 nos a pèrdè e titulo kontra Cardenales. Tabatin algun hende ku karakter fuerte ku Taffy mester a lucha kun’é. Pero por ehèmpel mi ruman muhé tabatin karakter fuerte. Nidia Daal tabata pega ku Taffy formal i ta masha hopi biaha Taffy a kore ku Nidia Daal na mal òrdu i bisele no bini mas. Tòg Nidia tabata bini bèk i nos tabata sigui normal manera bon ruman ku otro.
Taffy a bini haña un fundeshi fuerte, muchanan ku hopi disiplina i ku un winning spirit. Taffy mester a perfekshoná nos.”
KAMPION
"Hopi titulo kampion tras di otro. Ta yega un dado momentu ku mester bini kambio pa hobennan bini.”
Softballcuracao.com ta puntra kon tabata hasi tantu intensivo asina ku e kasa, famia i yunan.
“Nos famia tabata full nos tras. E famia tabata konosé nos na tereno i nan tabata hopi envolví. Nos tambe tabata hasi nos bèst pa tur kos ta OK."
Tabatin un hugada ku mi mes tabata aden (Silvia Wilson) ku a bòltu e serie i Cardenales a bin bira kampion. Despues di algun aña a bini un grupo nobo i hóben manera Brunaila Felipie, Lucerita Hooi, Lisette Hooi, Nathaly Lourens ets. kasi niun di nos no tabata tei mas.
Nos tin algun nòmbernan ku a bini despues di esnan ku tabata tei for di kuminsamentu.
Soraida Juliana a bini un pa dos aña despues, Jenny Poulina, Diana Bosk. Merelyn Windevelde, Rugela Hazel, Marjorie Gerardus.
Hungadónan ku tabata bin dj’afó pa studia òf traha manera Cassandra Baptist. Mildred 'Milly' Zingel, un makamba bon kètcher. Añanan 80 Taffy a bini ku Rosa i Fatima Muskus di banda di su kas.
By the way, Cecil Garcia a bini huntu ku Taffy nan aki pero ela traha den background. E ta traha den direktiva kedando semper atras si bini den publisidat, pero hasiendo masha bon trabou. Despues a bini Bloem i tambe Ralph Pereira ku ta hasiendo un tremendo trabou.
GANAMENTU
For di tempu ku nos a kuminsá gana hopi hende no tabata gusta nos, ounke nunka nos a hasi nan algu. Eigenlijk nos a meresé di gana, e treiningnan ku nos tabata hiba ets.
Nos tabatin hopi 'fighting spirit', nos tabata konserntrá hopi riba e wega. Nos no tabatin ku nes ku nada ei f’ó, ta riba nos wega nos tabata konsentrá. Regulo Montero tabata bisa nos no wòri ku nada ei f’ó. Ni maske bo mama yama bo na waya bo no ta bai serka dje. Bo ta hunga bala pa bo gana.
E éksito ta e dedikashon i treining fuerte. Taffy i Chape tabata klave den e eksitonan. Nos tin wega atardi pero nos ta sali kas for di mainta.Taffy tabata eksiíi rèspèt pero e tabata duna rèspèt tambe. E tabata eksigí hopi.
GRADISIMENTU
"Nos ta yama nan,Taffy i Chape, hopi hopi danki pa tur e añanan ku nan a yuda nos ekipo. Dios dunanan forsa pa nan por sigi. Nos ta boga tambe pa bini kapasitashon di teknikonan di Sòftbòl manera tin por ehempel den beisbol pa asina hisa nos nivel i pa otro timnan tambe por komparti.
By the way nos a haña masha great ku Pichingolo a invita nos esnan di antes pa bin duna un aporte i bini bek den selebrashon di 30 aña kampion."
Bernadita Geerman i Silvia Wilson Clarke ta termina e entrevista ku Softballcuracao.com.
No comments:
Post a Comment