Softballcuracao.com/Revista Deportivo Korsou e tene un entrevista ku Suhaily Vlijt pa laga nos lesadónan sera konosí ku e embahadora di deporte di e próksimo dos ananan.
Aña 2005 nos a entrevistá Shenaira Pietersz i 2002 Yurina de Caster.
Softballcuracao.com lo reprodusi e entrevista aki ku ta den Revista Deportivo Korsou edishon number 133.
SUHAILY
Suhaily Gwendoline Vlijt a nase na Kòrsou 7 di yüli 1988 i ta biba na Californieweg nst 68. Reina di Deporte ta bishitá MBO Frater Aurelio i ta den último aña di su estudio Boekhoudkundige Medewerkster. Suhaily lo sigui studia un aña mas den direkshon di Administrateur i despues nos Reina di Deporte a keda di wak kiko ta kiko.
Suhaily su mama di kriansa yama Shirley Grant i su tata Jeffrey Grant. E mayornan di Suhaily no a praktiká deporte.
Suhaily mes ta hasi e deporte di Bodybuilding i Fitness pa un aña kaba. Nos Reina di Deporte a partisipá na tres kontest e aña aki i sali den premio na tur tres okashon.
Suhaily no a praktiká otro deporte.
Reina di Deporte Suhaily Vlijt (mei mei) despues di a keda koroná dia 7 di desèmber 2007.
REINA DI DEPORTE
Suhaily: "Stanley Francisca di Federeshon di Bodybuilding a aserká mi pa mi bai representá Bodybuilding den e sertamen di Reina di Deporte. Ela bin i bisa mi ku e tin un bon kos p’ami. Mi mes no ta trein na su gym ku ta Diamond Gym, mi ta trein na Geofrey's Gym.
Stanley a bisa mi ku komo mi ta un atleta nobo den e deporte i mi a sa di destaká den korto tempu pa mi por partisipá. Mi a bisa Stanley nos ta wak e kos ei, debi ku mi ta den mi stage i bezig ta ‘studeer af’ i mi no tin masha tempu.
Stanley a bisa e ora ei: “Mi sa ku bo por e kos ei, ta di bo e ta.” Mi di ya... nan tin konfiansa.
Ela nominá tambe e atleta di 2007 pa loke ta trata Bodybuilding Femenina.
Mi a disidi di bai inskribí numa e ora ei.
Nos a kuminsá den novèmber, ke mèn, no tabatin masha tempu pa hasi hopi aktividat. E evento mes di Reina di Deporte mester a kuminsá dia 1 di desèmber.
Mi a bisanan ku mi tin ku kompetí dia 8 di desèmber i mi no por e fecha ei. 8 di desèmber tabatin kompetensia di Bodybuilding i Fitness. E ora ei nan a organisele dia 7 di desèmber i ya mi a gana.
Tabatin miss Jogging i Samirah Luis a gana, Samirah Luis ta atleta aktivo den atletismo. Samirah Luis a gana miss SMS komo esun ku a haña mas voto tambe via SMS (miss Popular).
Tabata un eksperensia úniko pa mi, tabatin 12 kandidata. Ami a gana miss Smile, tabatin tambe miss Simpatia i miss Popular.
E dia ei mes mi tabata hopi kansá, hopi kansá mes mes debí ku mi mester a trein pa e sertamen di Bodybuilding, tambe e sertamen di Reina di Deporte mes.”
E SERTAMEN
“E sertamen a kuminsá ku baile kaminda tur e kandidatanan ta baila den koreografia, despues di esei nan a introdusí nos. Despues a bini e promé presentashon ofishal kaminda nos a tira nos spich. Pa kolmo mi tabata kandidat number unu, ke mèn ta ami a tira e promé spich. Ami mester a hasi mi best komo promé kandidata i mi mester bisa ku ela bai hopi bon. E di dos presentashon tabata talento, e di tres tabata gala.
E parti di talento a bai hopi bon. Mi tabata sintá abou i mi a bisa e públiko presente ku semper mi tabatin deseo di bira atleta, subi esenario i eksponé mi muskulonan.
Mi a ‘set up’ un pida gym tambe riba stage. Dumpbell, mustrando nan kon kada kos ta funshoná.
Mi a bisa e públiko despues ku mi ta kla pa hasi mi soño realidat. Mi a kita mi paña i keda den mi zwempak i ami ku Trinidad ku tambe ta atleta di Geofrey 's Gym a pose den dou i mustra kon e posementu ta bai pa mustra bo muskulonan.
Mi no tabatin dje tantu fanátiko manera Judeska Cicilia ku a representá beisbòl. E tabatin hopi fanátiko mes i ela sali promé finalista i mas popular.
Nan a hasi algun pregunta espontaneo ku a resultado fásil. Nan a puntra mi kua tabata e último yu di Kòrsou ku e representá nos den Bodybuilding na Alemania. Esei tabata Richard Rosales. Nan a puntra mi ken tabata e personanan ku a yudami ku ta Richard Rosales i Steven Trinidad.
Riba e parti di Richard Rosales mi mester a amplia riba esaki.
Mi spich a bai over di.... ku nunka nan no a tende di un deporte, kaminda bo ta eksponé bo muskulonan pa bai ku un titulo. Mi a puntra nan den spich ku nan no ta ripará esei na mi figura atlétiko i ku mi ta bezig ta trein ya pa un aña kaba.
Mi ta bisa nan ku ora nan ta bai kompetenisa ku nan mester tene un dieta pa mas ku tres luna, ke mèn mantené un dieta estrikto i ku fuera di e dieta bo mester di hopi motivashon ets.
I e parti spiritual i mental ta hopi importante.”
SPEECH
“Bo a yega di tende di un deporte kaminda bo ta eksponé bo muskulonan pa gana un titulo?
Of kisas despues di algun luna di preparshon físiko i mental bo ta demostrá desaroyo di bo muskulonan riba ensenario?
Wèl, esaki ta mi deporte. Palabranan manera back lead spread, front double bicep, abb doubleness & ties ta zona bo konosi?
Riba e anochi deportivo aki kargá ku energia, muskulo, deportistanan i un kompentensia sano ami Suhaily Vlijt di 19 aña di edat ta representá e deporte dinámiko di Bodybuilding & Fitness.
Ya pa un aña kaba mi ta profilando riba e tereno di Body Fitness.
Bisami ku bo no a ripará esaki na e figura atlétiko di mi aki?
Ta asina ku e deporte aki ta eksiguí hopi ehersisionan intensivo i un dieta ekstrikto na momentu di kompetensia.
I komo Bodybuilder ta inserá ku bo mester train diariamente i tene un dieta di mas o menos 3 luna dependiendo di bo kurpa.
Pa por ehersé e deporte aki bo mester tin hopi motivashon i resistensia.
Kòrda ku aparte di forsa muskular, forsa mental i spiritual tambe ta importante.
Hinka semper den bo mes ku bo por i lo bo logra. Esaki tabata e spich durante e sertamen di Reina di Deporte.”
PREMIASHON
"Despues di e presentashonnan aki a bini ku show, pa despues tumamentu di desishon.
Nan a yama nos tur dilanti pa despues nan kuminsá saka premionan manera esun ku mihó sonrisa, sms, ets. ets.
Di einan nan a sigui ku pre-miashon di kuarta finalista ku eseinan ku tabatin for di promé, pa despues bini ku e ganadó absoluto. Ke mèn, ela bai si.
E tenshon ta drenta, pasobra bo ta bisa, e..e... mi no a kai den e kwaternan. Ora nan a yega na e promé ku ganadó, einan mi a shòk mas, pasobra bo ta pensa ta den kiko mi ta awor.
Pero despues tòg mi a kwe un konfiansa, pasobra mi a kuminsá hari mas, anto toevallig mi a bira wak e huradonan duru den nan kara, anto djei mi a kwe e konfiansa i mi di O.K. kai aden òf no kai aden, e eksperensha ta ku bo a siña.
Ora nan a eligími, mi a shòk. Mi no a verwagt e pasobra semper mi a bisa ku lo mi duna mihó di mi parti.
Ounke mi tin e kompetensia di eks-reina di teenerparade, reina di teenerparade di e aña aki ku promé finalista di teenerparade di e aña aki ku tambe tabata den e kompetensia. Anto ami ku nunka a yega laga nos bisa di tira spich dilanti hende riba ensenario, ku eseinan i duna show, manera ku bo ta haña aandacht, pero tòg mi a sabi di destaká i mustra ku mi por", Suhaily Vlijt ta konta for di su kas na Californieweg.
GASTUNAN
Suhaily: "E kos aki tin gastu mará na dje, esei ta trata paña. Awor aki mi tin 'cadeaubon' ku mi a haña pa mi kumpra paña i mi ta bai hasi uso di esei, pero mi no ta kere ku paña lo ta mi
problema.
Pa transporte esei mi tin mi mama, ku lo yudami ku esei.
Pa lokual ta trata sierto kosnan ku mi no por alkansá CSF lo yuda mi i si mi no por bai un kaminda, e promé finalista lo bai pa mi. P’esei awor aki nos dos ta trahando huntu, pa e por wak, por si akaso mi no tei e por
representá mi. "
BODYBUILDING
"Den Body Shape, dia 2 di yüni mi a sali Miss Beautifull Body. Esei a tuma lugá na Holiday Inn. Na ougùstùs dia 25 mi a partisipá na Kompetensia Kòrsou manera nan ta yamelé.
Einan mi a sali na di dos lugá den Fitness, anto lastu aki, 8 di desèmber mi a sali na di dos lugá atrobe den Body Shape, Best Poser Couples anto di dos finalista tambe den Couples."
HOBI
"Mi gusta eigenlijk tende radio. Esei ta mas parti mi hòbi. Mi gusta baila, no bai fiesta masha, pero baila si, baila mi so asin'aki. Mi baila mi so asin'aki ta mas ku sufisiente. Si, eseinan dos ta echt echt echt mi hòbi.”
OTRO KOSNAN
"Mi kolónan faborito ta ros anto ku blou. Pa loke ta kuminda,
waw, mi gusta jambo. "
EKSPERENSIA
"Pa loke ta deporte te awor aki mi tin bon i tòg malu den e parti di ..... Mi tin e mal impreshon kaminda nos komo atleta di e gym, dependé kwa gym bo ta bai, doño di e gym no ta representá bo echt bon, manera guia bo hopi bon. Bon ya ..... bo bai representá su gym ta su gym ta bini mas den publisidat, esei ta e úniko mal eksperensia ku mi tin. Bo no ta haña nada bèk, ke m&n e doño di gym no ta duna bo por ehèmpel un luna gratis na e gym ets.
Anto pa loke ta trata diputado ku eseinan , nan no ta bini hopi bin wak bo. Laga nos bisa si bo destaká hopi e ora ei si nan ta kore bin wak.
Pero nan no ta bin tira un bista wak den sierto kos nan kon nos hobennan ta positivo bezig. Nan no ta bin wak e desaroyonan. Bin wak ku kiko nos ta bezig. Puntra e deportistanan kiko mester drecha, ets. ets.
Bon eksperensia sigur ta hasi bon papel den kompetensianan di Bodybuilding i Fitness i naturalmente keda eligí komo Reina di Deporte.”
PARTI FUERTE
"Pa loke ta trata den kompetensia di Reina di Deporte, mi smile", Suhaily Vlijt ta splika Softballcuracao.com.
Den e deporte ku mi ta praktiká mi parti fuerte ta mi pianan i mi disiplina pa trein.
E parti mental tambe mi ta fuerte, semper mi ta pensa mi ta bai p'é. Mi ta gana sigur i si mi no a gana, mi a kue un eksperensia mas.”
MENSAHE
“Esnan pafo di deporte, kòrda deporte no ta algu pa bo bai bisa gewon ku ta den.
Deporte ta bon pa bo físika i bo parti mental. Bo ta tene bo mes yòng tambe, e ta yuda bo muskulonan. Ora un hende ta bira grandi e ta kuminsá sinti yen di kos, esnan ku ta hasi deporte ta sinti menos kos i nan ta mas salu.
Hasi deporte, drenta deporte, e ta algu sano.
Pa loke ta esnan den deporte sigui duru pa dilanti, pone bo metanan, sigui positivio, saka kara di Kòrsou i di bo mes.
Wak, bo po logra bo meta ku kara na laria, nada di kos di golos i sigui trein fuerte.”
FUTURO
"Mi tin pensá di bai e kompetensia Vento ku ta bai kuminsá pronto.
Ta trata di un kompetensia fuerte kaminda tin algun atleta di otro paisnan.
Mi ta bai trein fuerte, mi ta bai pa e titulo. Mi ta bezig ku mi stage manera mi a bisa. Otro aña sigur ta bai ta un aña fuerte. Pero un biaha mas, lo mi trein fuerte i kombiná e treining bon ku mi estudio.
Ora mi kaba di studia mi ta bai traha òf ya...... mi ta pendiente pa algun asuntu", Suhaily Vlijt, Reina di Deporte resientemente eligí, ta terminá e entrevista ku Softballcuracao.com.
No comments:
Post a Comment