WILLEMSTAD - Softballcuracao.com lo laga lesadónan sera konosí ku Jurickson Profar, prospekto di Beisbòl Little League ku ta hungando promé aña den divishon Senior.
Jurickson Profar komo picher pa Liga Pabou Senior a tira vários lansamentu di 93 miya durante wega di play-off kontra Liga Pariba djadumingu 17 di mei den Little League Ballpark.
JURICKSON
Jurickson Bartholmeus Profar a nase na Kòrsou dia 20 di febrüari 1993 i ta biba na Bahamasweg A – 4 i ta bishita Sint Jozef VSBO den klas 3.
Jurickson Profar ta yu di Judeska Offerman i Desmond Profar. E tremendo pelotero aki tin dos ruman hòmber, Juremi (12 aña) i Jurdrick (1 aña).
Jurickson su mama no a hasi deporte. Miéntras tata di Jurickson a hunga beisbòl den Little i Senior League serka Shon Ki i Hubenil serka Tonchi Martina (QEPD). Despues Desmond a hunga Slowpitch den ekipo di Domi, Forti i Chez Suzenne.
Juremi ruman hòmber di Jurickson tambe ta un tremendo hungadó ku ta den selekshon di Little League Liga Pabou.
KOMIENSO
“Jurickson a kuminsá move un tiki den beisbòl mas o ménos ku 3 aña. Jurickson tabata bai wega ku su tata i tabata move i hunga ku bate i wante hungando ku e otro muchanan chikitu ku ta bin wak nan mayornan hunga Sòftbòl. Ku 5 pa 6 aña Jurickson a kuminsá hunga beisbòl den tim den e ekipo di Marchena Hardware di Shon ki Nicasia.
Jurickson a kuminsá hunga den Liga Pre Infantil.
Jurickson semper tabata filiá bon, for di chikitu, bon brasa tambe for di chikí. E tabata hunga shòrtstòp masha bon for di chikí. E bate si no tabata masha bon na chikí pero despues sí for di den Minor League e bate a kuminsá zona bon”, Desmond Profar tata di Jurickson huntu ku Jurickson ta splika Softballcuracao.com for di nan kas na Bahamasweg.
SELEKSHON
“Promé aña den Minor mi a bai ku selekshon, nos a bai por nada, esei ta 2002, pornada debi ku nos a bira kampion. Na 2003 nos a bira kampion na Puerto Rico.
Na 2004 mi a bira kampion di Mundu na Williamsport, hopi dushi mes bira kampion Mundial. Promé ku esei nos a bira kampion di Karibe na Aruba. E kampion Mundial mi no a mir’é bin, nos a hunga hopi bon, e tim nan ta fuerte, no tabata fásil.
Ami a picha e semi-final kontra Mexico. E wega ei mi a picha i gana 4-0 di e tim di Mexico ku tabata hopi duru pero mi a picha bon. Esei ta e final internashonal.
Den e gran final nos a gana Merka i mi a bati un homerun di dos kareda for di den promé inning.
Mi ta kòrda un hugada ku mi a bula kabes na tersera den último inning, tira un tiru un tiki habri ku Christopher Garia tambe a bula kabes i saka out ku pia riba primera base. E Merikanonan a kere ku Garia no tabatin pia riba base pero den ‘slowmotion’ tur hende por a mira despues ku Garia su pia tabata riba base.
Na 2005 na Williamsport faltando tres out pa bira kampion pa di dos aña sigui na Little League World Series, nos ta pèrdè e wega den final den último inning. Hopi duele si pero mi a tuma e derota numa no tin moda di hasi
2006 na Sint Thomas ku Junior League nos a bai final pero pèrdè, mi no a keda kontentu pasobra nos tabatin tim pa gana. 2007 na Panama tampoko nos no a logra bira kampion”, Jurickson Profar prospekto grandi di beisbòl ta sigui konta Softballcuracao.com
Paisnan ku Jurickson a bishita ta Aruba, Panama, Sint Croix, Puerto Rico, Virgin Islands, Williamsport (USA) dos biaha.
REKORT
Jurickson tin un rekòrt difísil pa kibra. Den e kampionato di Karibe na Sint Croix kontra di Sint Maarten Jurickson Profar a pone un rekòrt di ponche. Jurickson a enfrentá 12 batiado di Sint Maarten i poncha tur pa Korsou gana Stin Maarten pa nòkout. Kemen tur batiado ku a bin bati a poncha. Esei ta un rekòrt ku kualke picher por empatá pero kibra si no por kibra e rekòrt ei. Esei tabata na 2005 na Sint Croix den kampioanto di Karibe di Little League.
KAMPIONATO
Jurickson: “E aña aki mi a dal un homerun so den kampionato, mi sa bati 3 pa 4 homerun den kampionato. Den play-off mi a tira un wega i gana esaki. Nan a bisa mi ku mi tabata tira hopi duru 93 miya pa ora. Nan a yega di midi mi den e bisendarionan ei esta 92 pa 93 na tereno di Shon Ki.”
PROFESHONAL
Jurickson tin deseo di firma profeshonal. “Mi tin deseo di firma profeshonal semper mi a soña di firma profeshonal pa despues hunga den Grandes Ligas manera andruw Jones, Jari Jurrjens i otro yunan di Korsou.”
PREMIONAN
“E mayor premio ku mi a gana ta bira kampion di mundu den Little League na aña 2004.
Mi a gana hopi premio individual den Little League. ( Bo no ta haña un hungado di Little League ku hopi premio individual RED.)
Lider di doblete na Puerto Rico, lider di homerun na Puerto Rico, Hungadó Mas balioso na Puerto Rico Minor, Kampion Bate tur na Puerto Rico den Minor 2003.
Junior Hungado Mas Balioso na Sint Thomas Virgin Islands, Mas Homerun Sint Thomas Virigin Islands, Mas Kareda Empuha, Kampion bate na Sint Thomas Virgin Islands, Kampion picher Torneo Creme de La Creme 2004, MVP Torneo Creme de La Creme 2004. Premio Estímulo Homerun Fundashon Kosecha, Kampion Homerun Derby Torneo Creme de La Creme.” Jurickson ta sigui konta.
HOBI
Jurickson “Mi hòbi ta futbòl,mi ta gusta hunga futbòl. Mi ta hunga den Genesis Boys ku ta pertenesé na Jong Holland. Mi ta hunga den U-15. Mi ta gusta atletismo tambe.
Mi ta hasi beisbòl promé, despues atletismo i tambe futbòl. Mi ekipo di atletismo ta Rising Stars.
Mi tabata gusta hunga Ninetendo ántes pero awor nos mas. Mi ta gusta kolo kòrá i gusta kome kuminda krioyo, yambo banana, kòmkòmer, bonchi i otro kosnan.
Mi gusta kuminda krioyo mes mes.”
EKSPERENSIA
“Mal eksperensia pa mi ta aña pasa ku e tim di Junior League. Nos mester a sali kampion. Mi a sinti ku nos mester a bira kampion. Mi ta bisa tur dos aña den selekshon Junior League ta mal eksperensia pami. Mi ta haña ku nos por a bira kampion tur dos biaha.
Bon.... eksperensia ta e kosnan dushi di beisbòl, biaha afo representa mi pais ets.”
PARTI FUERTE
“Mi parti mental ta hopi fuerte, mi ta pensa ku e hendenan ei ( e tim kontrali) no por gana mi. Mi sa di mi brasa mi poder mi fildeo i picheo pero e parti fuerte di mi ta mental.
Mi mensahe ta pa e hendenan den deporte pa na sigui traha duru, traha duru tur dia i un dia lo bo logra. Hobennan sigui traha duru, e deporte riba su mes ta dushi tambe. No hasi deporte pa basilá.
Esnan for di deporte djòin deporte, ami ta pasando hopi dushi den deporte, konosé hopi hende hopi pais.”
AWORAKI
“Mi ta hunga mi beisbòl trankil, mi tin un aña mas den Senior League. Ya.. tin hopi scout mi tras pero mi ta keda trankil i hunga beisbòl riba un rust. Ya.. lo mi ta kla pa firma profeshonal otro aña. E interes di skoutnan ta hopi grandi kasi 10 organisashon di Grandes Ligas pero mi ta keda hunga mi bala trankil, masha trankil den Little League ora e dia yega otro aña nos ta wak’, Jurickson Profar, super prospekto di Beisbòl Little League ta terminá a entrevista.
No comments:
Post a Comment