Despues di un periodo poko largu ku dr. Jerry Semper (40) tabata inaktivo den beisbòl lokal, despues di a militá pa va-rios aña den Santa Rosa Indians, e luna di sèptèmber aki a bini bèk den Beisbòl Dòbel A ku e ekipo di Curacao Yankees.
Jerry Semper a splika ku e mester a atendé ku trabou komo dòkter i otro asuntunan personal loke no tabata duné sufisiente tempu pa trein beisbòl, pero e deporte aki ta fasiné i e no por a keda afó. Una bes ku ela haña tempu liber pa dediká mas na su deporte ela kuminsá evaluá e ekiponan. Despues di esaki ela opta pa Curacao Yankees, en bista dje nesesidat ku e ekipo aki tin pa hendenan di mas eksperensha. Jerry Semper a splika ku ketu bai e tin kondishon, e ta trein i kore, loke ta indikashon ku e por duna hopi ainda den deporte.
E ekipo di Yankees tin hopi talento hóben ku no mashá eksperensha i p'esei ela skohe pa e ekipo aki di Ronnie Inecia i Oscar Bolivar pa asina e por aporta ku su eksperensha den e ekipo. Segun Jerry Semper Yankees tin su farmsystem i esaki ta alentadó pasobra aki poko tempu nos lo mira e fruta dje desaroyo aki. Aworaki e ekipo mester di hende ku eksperensha pa guia nan, p'esei e trabou di Ronnie Inesia meresé apoyo i esei ta e intenshon di Jerry tambe pa kontribui na e bon desaroyo aki den Curacao Yankees.
No comments:
Post a Comment