Julio “Maracucho” Hellburgh:“Mi tin kasi 60 aña den Sòftbòl”

WILLEMSTAD -Aworaki mi mester tin 55 pa 60 aña vinkulá ku e deporte di Sòftbòl", na palabra Don Julio Hellburgh, konosí tambe komo "Maracucho".

Julio ta bisa ku nunka e no tabata ousente, simplemente e tabata dediká su mes na otro trabou pa Sòftbòl.
Ela haña un yamada pa puntra si e ta deseá di yu-da i ela pensa: "Mi mester yuda, mi'n por laga e deporte di sòftbòl na kaya. Mi debe sòftbòl ku tabata bon pa mi.”
Julio Hellburgh a konta Revista Deportivo Kòrsou ku for di aña 1949 ela kuminsá empayá sòftbòl i ta rekordá ku ela bai un kurso di "American Softball Association" na Estados Unidos na 1955. Promé ku esei na aña 1952 Julio Hellburgh a bai St. Thomas ku e tim di Paradise kaminda nan a kompetí den un kompetensia Internashonal fastpitch invitashonal.
"Realmente mi tin hopi aña den sòftbòl", Don Julio Hellburgh ku tin 78 aña di edat ta konta. Hellburgh no unikamente a traha komo umpire, pero tambe komo dirigente atministrativo. E ta umpire prinsipal di Latino Amerika i Karibe for di 1991. Resientemente e gran Julio Hellburgh tabata na Olimpiada di Beijing den representashon di sòftbòl di nos region.

E ta rekonosé ku nan ta poko preokupá tambe pasobra nan ta mira e nesesidat pa haña mas dirigente i prinsipalmente umpirenan hóben.
Pa loke ta nos sòftbòl lokal Don Julio Hellburgh ta bisa ku mester re-konosé ku nos no tin aktualmente e mes nivel di antes. E ta bisa ku esei por tin hopi motibu.
Dirigente deportivo ku smak tambe ta poko skars i nan mester kompañá e deportistanan riba tereno. “E deportista mes-ter tin e smak, e deseo pa por bira bon”, Maracucho ta splika.
Ela dirigí varios wega i ta remarká ku bo ta mira ainda algun sòftbòlista veterano ku ta duna algu èkstra riba vèlt manera un Rozeline Kinburn. E deportista tin di siña ku riba vèlt e tin di duna algu èkstra, ku e tin di kore, ku e tin di hasi esfuerso.
Tambe Hellburgh a rekonosé ku nos mester invertí mas den nos deporte. Bo no por hasi deporte sin invertí sèn. Ela splika ku Venezuela a bira un potensia mundial di sòftbòl. "Nos lo tin di kumins? kompetí Interna-shonalmente atrobe. Nos mester bai kompetensia Internashonal i sigui tra-ha duru", segun e umpire i dirigente. Maracucho ta bisa ku miéntras ku e tin salú elo trata na koperá ku e deporte. Ta su deseo tambe pa yuda ku kono-sementu di regla ya ku tabatin basta kambio den Sòftbòl Fastpitch e último añanan. "Nos tin muchanan talentoso, simplemente nos mester keda traha ku nan i hinka e grasia den nan pa praktiká e deporte manera e muchanan di antes", asina Don Julio "Maracu-cho" Hellburgh a deklará na Revista Deportivo Kòrsou.

Entrevista saká for di Revista Deportivo Kòrsou.