Wishelene van Heyningen tabata kinto bate regular di ekipo Pichingolo i ta kuarto bate di selekshon. Wishelene a hunga den tur selekshon di su edat.
For di 2002, e aña ku a start ku Liga Soraida Juliana, Wishelene ta hunga Sòftbòl.
Wishelene durante wega Pichingolo The One na Sabana ougustus 2008
Ela bati .436 i tabatin un sensashonal aña ku apénas 17 aña di edat.
Wishe: “Rozeline su change-up ta gaña mi mes komo kètcher.”
E ke pa Stephany i Rigmaira train mas duru!!
No tin duda ku Wishelene Van Heyningen ta un dje mihó batidónan di nos sòftbòl. Wishe den su di dos aña den Sòftbòl Dòbel A i sin a hunga e kategoria "Big League" ainda a bati .436 di averahe ku apénas 17 aña, finalisando Senior League Liga Soraida Juliana.
E temibel batidó di Pichingolo Nissan i di organisashon di Buena Vista a figurá den vários departamentu ofensivo di e máksimo kategoria di nos sòftbòl femenino klase superior. E hecho ku e no a yega e kantidat di turnonan nesesario pa por klasifiká pa ta entre e mihó batidónan a pone ku Wishe no a figurá entre e mihónan na bate, pero e tabatin un temporada tremendo ofensivo den 2008.
KETCHER
Wishelene ta un kètcher natural ku ta stima e trabou di kètcher tambe. Na vários okashon ela kètcha dos wega tras di otro sin reklamá un palabra.
Taffy de Jongh ku ta un dje dirigentenan di Wishe ta rekordá kon un biaha ela kaba di hunga kètcher den un wega di Senior League kambia di vèlt i bin kètcha den un wega amistoso ku tabatin riba Sabana Ballpark.
Wishe den e ekipo di Antia na Wega di Reino na Den Haag yüli 2007
UN DI E MIHONAN OFENSIVO
Wishelene Van Heyningen e temporada ku ta tras di lomba a anotá 15 kareda, di 9 di liga. Vanessa Winklaar tabata e lider ku 21.
Wishe a keda empatá na di 7 lugá entre esnan ku mas inkogibel a bati, konektando 17. Den kareda empuhá e batidó de-signá i kètcher di Pichingolo Nissan tabata e di tres mihó di Kòrsou, ku 16 kareda empuhá. Unikamente Vanessa Winklaar i Judinai Wederfoort a empuhá mas ku e hóben sòftbòlista. Ela figurá tambe entre e lidernan di doblete ku kuater, empatá na di dos lugá den homerun ku dos i di sinku den base alkansá ku su batasonan ku 27.
ENTREVISTA KU WISHELENE
Softballcuracao.com a hiba un kombersashon ku Wishelene ‘Wishe’ Van Heyningen, un di nos sòftbòlistanan hóben di mas destaká di nos sòftbòl femenino "fastpitch":
"Sigur, tabata un aña hopi bon, mihó ku e promé temporada. Un aña kaminda mi a haña muchu mas eksperensia tambe di sòftbòl. Sin duda tabatin dife-rensia, bo mester di eksperensia pa hunga den Dòbel A, no ta dje fásil ei. Mi mester rekonosé ku mi a siña hopi.”
“Dòbel A su picheo ta mas fuerte.
Mi a kaba awor ku mi dos añanan den Senior League. E diferensia entre Senior League i Dòbel A ta ku bo mester tin mas konosementu. E picheo di Dòbel A ta muchu mas fuerte ku esun di Senior League", na palabra Wishelene, ‘Wishe’ Van Heyningen, un di e talentonan nobo di nos sòftbòl femenino.
EKPERENSIA INTERNASHONAL
Apesar di su edat hóben, Wishe tin basta eksperensia Internashonal. Ela hunga na Puerto Rico i tambe na Ulanda den Weganan di Reino. Pa loke ta e selekshon di Puerto Rico, Wishe ta bisa ku nan ta bon, ounke e ta haña ku kisas nos ta poko mas mihó ku nan. Tin biaha nos ta pèrdè pa falta di konsentrashon. Puerto Rico tin bon picheo, e ta splika.
Pa loke ta e eksperensia di dje "Weganan di Reino", Van Heyningen ta splika ku e selekshon di sòftbòl ulandes ta bon. E ta di opinion ku nos por logra mas, pero nos ta pèrdè konsentrashon o kisas nervio ta stroba nos. Wishe ta bisa ku e ta hunga sòftbòl hopi trankil sin tantu nervio.
Apesar di hunga hopi komo batidó designá e temporada ku ta tras di lomba Wishe ta un kètcher natural. E hecho ku e ta den mes tim ku Emily Jonis ta pone ku e ta bati hopi biaha komo batidó designá. “E aña aki ma sintimi mihó komo batidó designá, pero mi ta gusta kètcha tòg mas tantu. E temporada aki mi no a kètcha hopi, pero mi ta gusta hunga kètcher.”
IMPRESHONA KU ROZELINE KINBURN
Wishelene a yega di kètcha vários picher, entre nan Rozeline Kinburn. Riba e pregunta kon e ta haña Rozeline ta picha e ta kontestá mesora: "Bon Picher". E ta bisa ku tin biaha e "change-up' ku Rozeline ta tira ta "gaña" e mes ku ta sintá tras di plato.
TRAINING FUERTE
Wishelene tambe ta kètcha e pichernan mas hóben. E ta pensa ku Stephany Henriquez i Rigmaira Paulina tur dos por bira tremendo picher. Sinembargo pa nan logra esei nan tin di train mas tantu. "Nan tin di stòp di hasi kos di floho", e
kètcher ta remarká. E kètcher ku ta masha será ku tantu Stephany komo Rigmaira ta rekonosé ku e ta papia hopi ku nan dos. E ta pensa ku si nan train nan por ta mes o mihó ku Suliviendra Hooi, pero nan mester tin e deseo di train mas fuerte, i hopi.
Segun Wishe, e si no ta floho. "Mi ta gusta hunga sòftbòl, sigur kètcher", e ta añadí.
Wishe ta konta ku e tin 9 aña ta hunga sòftbòl. Ela kuminsá ku sòftbòl ku 8 aña di edat. "Mi a kuminsá hunga sòftbòl den "T-Ball", e ta splika. E ta kòrda ku sr. Romeo Coenraad ku tabata train nan aerobics a manda e ku su prima Rigmaira bai train sòftbòl. Asina su karera di sòftbòl a start.
Wishe tambe tabatin algun bataso hopi klave. Den e último wega di kampionato ku su tim atras 6-5 den di sexto inning Wishe a konektá un doblete pa empuhá dos kareda pa bòltu e skor i duna su klup e triunfo i e título di kam-pion di Korsou pa di 31 biaha.
Wishe ta rekonosé ku ora e tabata bai bati e tabata poko nervioso, pero despues ela pensa ku e mester por i a dal e doblete.
SHURELLA MERKIES
Pa Wishe Van Heyningen
e mihó picher ku ela kètcha ta Rozeline Kinburn i e mihó di Kòrsou ku ela bati kontra di dje ta Shurella Merkies. E ta rekonosé ku Shurella ta tira fuerte, úniko kos ku e mester drecha kisas ta su kontròl.
SCHOLARSHIP
E soño di Wishelene Van Heyningen semper tabata di por haña un "scholarship”. Lo ta algu grandi, e no ta pèrdè speransa di hañ'é.
Van Heyningen ta bisa ku skol ta bai bon. Aktualmente e ta bai e skol "Ban Bria". Ela finalisá VSBO i ta den su promé aña di estudio.
WENDLEY ‘CHAPE’ BERNARDUS
E manager di Pichingolo/Nissan a bisa: “Mara nos por haña mas mucha ku ta gusta sòftbòl manera Wishe”.
Wendley ‘Chape’ Bernardus ku ta manager di e tim di Pichingolo Nissan kampion di Kòrsou i i tambe manager di e prospekto Wishelene Van Heyningen ta di opinion ku Wishe ta tremendo prospekto.
Bernardus ku ta un dje téknikonan di e organisa-shon Buena Vista i tambe di Little League Softball tin hopi eksperensia ku Wishelene.
E konosedó di sòftbòl ku tin hopi aña metí den e deporte ta konsiderá ku Wishelene ta un dje tremendo prospektonan di sòftbòl ku nos a haña e último añanan. Komo kètcher e ta e mihó prospekto for di dia ku Emily Jonis a subi.
Bernardus ta splika ku Wishelene tin tremendo brasa. Fuera di esei e ta gran batidó i ku forsa ku ta pone ku e por saka e bala kualke momentu. Defensivamente tambe Wishe ta hopi bon. Naturalmente e ta hóben ainda i lo por siña muchu mas.
E tékniko rekonosé di Sòftbòl Femenino Fastpitch tin masha bon palabra pa Wishelene su aktitut tambe. Wishe ta gusta kètcha. "Bo no tin di kore su tras pa e kètcha niun picher. Ta bin aserka ku e ta un tremendo "Team-Player" tambe", Bernardus ta splika.
Bernardus a dirigí Wishelene Van Heyningen den selekshon di Senior League i tambe selekshon di sòftbòl di reino. “E ta un sòftbòlista ku bo no tin problema kuné, paso
simplemente e ta "softball minded". Mara nos por haña mas mucha ku ta gusta e sòftbòl manera Wishelene Van Heyningen.” Pa e dirigente e úniko parti débil di Wishe ta su peso ku e tin di vigilá.
Ta duel Bernardus ku Wishelene no a alkansá e turnonan ofisial pa ta entre e lidernan di bateo di nos sòftbòl. Ela bati 17 hit den 39 turno pa un averahe di .436 ku lo mester tabata entre e mihónan di Kòrsou. Ela haña tambe 5 base por bola, 1 deadball i konektá 3 fly di sakrifisio. "Nos ta hopi kontentu ku Wishe", e tékniko kapasitá a deklará.
Pa potret di Wishelene van Heyningen klik riba potret i bai na Sera Konosi ku Wishelene van Heyningen
No comments:
Post a Comment