Febeko ta informá i pone nomber di Hungadonan di Beisbol ku ta liber

Softballcuracao.com pa medio di e karta di Federashon di Beisbol di Korsou (Febeko) aki ta informa e hungadonan ku ta liber i e prosedura ku mester sigi.

E KARTA
Muy distinguido organisashonnan di beisbòl.
Manera boso ta na altura, di akuerdo ku nos karta di fecha 29 di desèmber 2008, awe dia 15 di yanüari 2009 nos ta publiká lista di e hungadónan ku ta liber despues di temporada 2008.
Manera nos a informá boso, mirando ku kampionato di beisbòl di Kòrsou organisá pa FEBEKO ofisialmente a kaba djadumingu último dia 11 di yanüari ku e último wega di promoshon i degradashon, awe dia 15 di yanüari 2009 nos ta publiká e lista di hungadónan di liber.
Tur hungadó ku ta firma na 2006 i ku a partisipá den kampionato 2008, ta liber i lo mester bolbe firma ku un ekipo si nan ke partisipá den kampionato.
Tambe nos ta publiká hungadónan ku no a partisipá den kampionato 2008 ku outomátikamente, konforme artíkulo 45, insiso 13 ta bira liber outomátikamente. E hungadónan aki ta keda denominá komo N.A.H. (No a Hunga)
FEBEKO ta informá tambe ku tur hungadó di e organisashon di beisbòl Banda City tambe ta hungadónan liber, pa e echo ku e organisashon aki a pèrdè dos wega pa default i a kai for di kampionato.
FEBEKO ta rekordá ekiponan miembro riba e siguiente fechanan importante:
• 29 di yanüari 2009 ku ta siere di fecha pa e promé traspaso di hungadó
• 5 di febrüari 2009 ku ta publikashon di e promé traspaso di hungadó
• 19 di febrüari 2009 ku ta entrega di lista di hungadónan

Direktiva di FEBEKO ta hasi un apelashon riba organisashonnan miembro pa nan tene kuenta sigur ku 19 di febrüari 2009, kual ta e dia pa hasi entrega di e lista di hungadónan di kada organisashon.

Por último direktiva di FEBEKO ta rekordá organisashonnan miembro riba e reunion general di e di dos parti di aña 2008 ku lo tuma lugá dia 28 di yanüari 2009 na WTC pa 7or di anochi.

Huntu ku e karta aki, boso ta risibí tambe attached e lista di hungadónan liber.

Si tin kualkier pregunta, nos lo tende for di boso

Sperando di a informá boso sufisiente, nos ta keda

Atentamente



Giovanni Atalita
Sekretario