Kenneth Gijsbertha ku speech impreshonante na okashon di introdukshon di 5 dirigente i deportista den Salon di Fama

WILLEMSTAD - Kenneth Gijsbertha dirigente deportivo tabata e oradó di anochi durante e seremonia di introdukshon di Salon di Fama den ouditorio di Banko Sentral di Antia Hulandes. Revista Deportivo Kòrsou a reprodusí e teksto pa nos lesadónan.

"Awe nochi ta un anochi hopi spesial i mi ta sintimi privilegiá di por hiba palabra promé ku instalashon di algun depor-tista i dirigente grandi ku a nifiká masha hopi pa nos deporte en general i pa e ramo di deporte spesífiko ku kada un di nan a praktiká i/òf ta praktiká.

Mi kier gradisí direktiva di Curacaose Sport Federatie (CSF) inmensamente pa e honor di skohe mi komo Oradó di Órden i tambe mi ta
gradisí tur 5 nominado ku a nifiká asina tantu pa nos deporte, nan famia i demas invitado ku mi por ta huntu di boso awe nochi.
Danki pa e privilegio i honor.

Tin algun di e nominadonan, grandi(nan) di nos deporte, ku awe nochi ta bai keda instalá den Salon di Fama di Kòrsou
ku físikamente ya no ta huntu ku nos mas, pero mi ta sigur ku loke nan a nifiká pa nos deporte lo keda rekordá i graba i mester sirbi komo reflekshon pa semper.

Dios, ku ta É deportista di tur deportista, ora ku e tabatin mester di e mihó vòlibòlista di Kòrsou i Antia di tur tempu pa forma parti integral di su selekshon di vòli di su Reino, É a selekshoná Errol Rooi. Dios tabatin nesesidat di un dirigente íntegro, luchadó i trahadó inkansabel pa yud'é ku preparashon di su selekshon di basket di su Reino i É a manda yama Niels Liberia. Laga nos duna rèspèt i honor na e dos gran deportistanan aki ku ya no ta huntu ku nos mas. (momentu di silensio). Danki! Nan tur dos ta felis den Reino di Señor i ta wak riba nos.

Na Soraida "Aida" Juliana, Julius "Maracucho" Hellburg, Ricardo "Kid" Elhage i nan respektivo famia i famia di Niels Liberia i Errol Rooi, for di awor mi mas sinsero i profundo palabra di felisitashon ku e logronan di kada un di e 5 grandinan di nos deporte ku meresidamente ta bai keda instalá den nos Salon di Fama.

E amor i dedikashon pa deporte di kada un di e sinku nominadonan a hasi kada un di nan bira pida historia di nos deporte i awe nochi nan ta bai risibí máksimo distinshon i honor ora ku nan keda instalá den nos Salon di Fama.

Ora ku mi a keda aserká pa direktiva di CSF pa hiba palabra riba e anochi speshal aki, mi a pensa ki privilegio, pero dikon ami? Pero, mi a siña den bida tambe pa nunka puntra dikon ami i mi a akseptá. Ora ku mi a kaba di sera e telefòn, mi a kuminsá pensa kiko ta e tema / tópiko ku mi lo bai toka riba un anochi tan bunita asin'aki. Ku boso pèrmit i indulgensia, mi ta bai trata na toka dos di e balornan ku ami ta kere ta di mas importante ku un dirigente deportivo i depor-tista mester tene bon kuenta kuné den su
karera deportivo. E ba-lornan ku lo mi trata ta:
KARAKTER i AMOR PA PATRIA!

Pero, promé ku mi drenta riba kontenido di kiko ta nifiká KARAKTER i AMOR PA PATRIA den deporte i bida di kada ser humano, laga nos para ketu un ratu promé i reflehá kiko realmente ta nifiká keda eligí pa drenta Salon di Fama i e balornan mara na esaki.
Ta masha normal ku ora un hóben kuminsá hasi deporte mayoria biaha e ta kuminsá soña i hasta bisa ku e kier bira mane-ra tal òf tal gran depor-tista den su ramo di deporte ku hopi biaha ta alabes su ídolo.
Djis pa duna algun ehèmpel. Esnan ku kuminsá hunga gòlf awendia, posiblemente lo kier bira manera Tiger Woods; e futbòlista di ántes kier bira manera Rei Pele i e basketbòlista kier ta Michael Jordon òf Magic Johnson. Nos kampionnan di Little League, nan ídolonan ta Andrew Jones i Jair Jurrjens.

Sinembargo, no ta fásil, manera bo ta chupa un preimu, un deportista ta desaroyá i bira grandi den su ramo di deporte i riba un dia manera awe risibí honor máksimo pa drenta Salon i Fama.
Pa un deportista logra den su karera deportivo, banda di su abilidat i kualidat tékniko, ta eksigí guia adekuá, hopi training, esfuerso, sakrifisio, dedikashon, disiplina, perseveransha i e mester ta stima e deporte ku e ta praktiká.

Anto ku tur esaki ainda no ta sufisiente ni ningun garantia pa keda eligí un dia pa drenta Salon di Fama. Pasombra, e kriterionan pa por drenta Salon di Fama no ta solamente ku e deportis-ta òf dirigente mester tabata un tremendo deportista òf dirigente sino mas bien e kontribushon general duna pa engrandesé e ramo di deporte na un manera positivo i eksitoso, su integridat, su komportashon riba i pafó di tereno, konsistensha, su aporte duna na representá bandera di pais i "last but surely, not least" manera mi a indiká:

KARAKTER di e deportista òf coach i mester sirbi komo
MODELO.
Ta p'esei mes, no ta tur gran deportista òf tékniko tampoko ta drenta Salon di Fama.

Ehèmpel: Pete Rose, èks super pelotero di Liga Grandi ku sifranan ku no ta laga ningun duda di su abilidat i kualidatnan, su kandidatura pa drenta Salon di Fama na Merka no ta gosa di sosten. Motibu: Falta di KARAKTER.
Diego Armando Maradona, super estrea di futbòl, pero hamas bo por referí na su persona komo MODELO pa futuro futbolista. Motibu: Falta di KARAKTER.

(ingredientenan di karakter)
Ora ku nos ta trata e tema di KARAKTER di e deportista, ta bon pa nos realisá ku dirigentenan tékniko ta esnan promé yama pa traha riba karakter di e deportista. Simplemente, pasombra ta nan ta esnan ku tin mas influensha riba bida deportivo i desaroyo di e deportista. Pa e hóben deportista ta su Coach-nan e ta mira komo su "role model". P'esei, coachnan mester ta honesto ku nan mes i ku e deportista i siña e deportista, banda di konosementu, téknika i táktika di e deporte, di ta honesto ku su mes i ku otronan; pa no rekurí nunka i tampoko kai den deshonestidat dor di saka mentira, desepshon òf apliká triki / astusia di ningun forma. Tantu e dirigente tékniko i e deportista mester ta konfiabel(promé ingrediente pa karakter). Coachnan mester eduká e deportista di ta habrí i franko i semper kla pa na un manera honesto di akseptá su fayo(nan) i asina demostrá integridat.

Coachnan mester siña e deportista kiko ta rèspèt (di dos ingrediente pa karakter). E deportista mester respetá su mes, respetá su kompañero i kontrinkante, respetá rèfri / umpire, wes i respetá fanatikada. Nunka humiá un rèfri pa motibu ku kisas e por a faya i hamas rekurí na insulto bien sea ku palabra òf pa medio di "body laguage”.

Tantu e dirigente komo e deportista mester ta kla pa karga su responsabilidat propio (di tres ingrediente pa karakter) pa tur su eskoho, malu òf bon.

E dirigente deportivo i deportista mester trata otro manera e mes kier pa wòrdu trata(di kuater ingrediente pa karakter). Hopi importante ta pa Coachnan realmente "care" pa nan atletanan(di sinku ingrediente pa karakter).
Finalmente, mester pèrkurá pa e deportista bira un bon suidadano(di seis ingrediente pa karakter).

Un otro balor ku, na un manera masha kòrtiku, mi kier toka awe nochi, ta e orguyo òf mihó bisá e AMOR PA PATRIA ku kada deportista mester tin i demostrá na momentu ku e keda selekshoná pa defendé su bandera. Tur ku tabatin e privilegio i honor pa representá su patria sa kiko ta nifiká ora bo ta para riba kancha di deporte i himno di bo pais wòrdu toká i su bandera keda hisá. Pa chikitu ku bo pais por ta i ounke limitá na infrastruktura i rekurso kompará ku otronan, bo ta krese i bira grandi ora ku himno di bo pais wòrdu toká i e bandera di bo pais bai laira.

Mi a sigui e diskushonnan último dianan tokante ún solo posibel futuro selekshon di beisbòl di Reino Hulandes. Konsientemente mi a skohe pa no drenta den e diskushonnan ei. Mi no a profundisá den konte-nido di e intenshon, pero mesora a pasa den mi kabes ku tur logro ku beisbòl di Hulanda tin ta danki pa gran parti na nos peloteronan yu di tera. Pa años selekshon di beisbòl di Hulanda a hasi uso di nos peloteronan i si awor bèrdat nan kier hasi algu bèk, anto hasié. Punto! Asina tin asuntu di sera kombenio, ta nifiká tambe "voor wat, hoort wat". Esei ta ense-rá ku lo mester tin konseshon di nos banda di un manera òf otro. Pero, manera mi a indiká kaba ku mi a skohe pa no drenta den diskushonnan, pero si mi kòrdá hopi riba nos Churandy Martina. Churandy Martina ta ehèmpel klásiko di un deportista ku ta stima su pais. Nos tur ta orguyoso di Churandy.
Orguyoso di Churandy, no solamente pa lokual nan ku ela demostrá i logra riba kancha na Beijing durante último Weganan Olímpiko, pero mas tantu pa e sintimentu di orguyo propio, amor i lealtat demostrá na su himno i bandera ora ku no opstante nos limita-shonnan, konsientemen-te a skohe pa sigui kore bou di bandera di Kòrsou i Antia. Aki, plaka sigur no a hunga un ròl den su desishon.
Sino, e AMOR PA PATRIA i KARAKTER firme di e gran yu di tera, Churandy Martina.

Nos deportistanan tin
talento pa parti, esei a keda demostrá na nume-roso okashon kaba. Mi ta hasi un apelashon fuerte riba prinsipalmente nos dirigentenan tékniko den tur ramo di deporte pa banda di guia, instruí táktika i téknika di wega, na mes momentu, traha riba e balornan ku ta KARAKTER di e deportista i siñ'é kiko ta nifiká AMOR PA PATRIA!

Na mi humilde opinion, Soraida "Aida" Juliana, Julius "Maracucho" Hellburg, Ricardo "Kid" Elhage, Niels Liberia i Errol Rooi a modelá i demostrá KARAKTER i AMOR PA PATRIA durante i despues di nan karera deportivo i awe meresidamente nan ta drenta nos Salon di Fama.

Soraida "Aida" Juliana, Julius "Maracucho" Hellburg, Ricardo "Kid" Elhage i respektivo famia, masha pabien i na famia di Niels Liberia i Errol Rooi tambe un pabien speshal ku entrada di sinku gran depor-tista den nos Salon di Fama. Kada un meresé!