WILLEMSTAD - Djasabra, 24 di yanüa-ri 2009, den oula di Banko Sentral, Curaçaose Sport Federatie, (C.S.F.) a instalá sinku deportista i dirigente ofishalmente den Salon di Fama.
Durante un seremonia impreshonante dilanti famia, dirigentenan deportivo i deportistanan CSF a honra i instalá deportista- i dirigentenan. E nominadonan a yega den un limousine na Ofisina di Banko Sentral di Antia Hulandes kaminda e seremonia a tuma lugá. Pa e anochi aki e duo di sr. Frank Rosina i Murielle Meyer, tabata maestronan di seremonia.
Himno di Kòrsou a keda interpretá pa sra. Roxienne Albertina.
E promé persona pa hiba palabra pa e anochi aki tabata sr. Eduardo "Dito" Vlieg, ku ta presidente di C.S.F.
Sr. Vlieg den su diskurso a bisa ku e último biaha ku tabatin introdukshon di miembronan den Salon di Fama tabata na 1997, pues 12 aña pasá.
E promé miembronan ku a drenta Salon di Fama tabata na 1984, ora ku entre otro sr. Mordy Maduro i Myrna Anselma a drenta.
Un gradesimentu a bai pa sr. Geofrrey Goede i sr. Frank Mathilda huntu ku Female Jaycees ku a yuda pa e introdukshon di e aña aki.
Despues a hiba palabra diputado di Deporte, Kultura i Enseñansa, sra. Marilyn Alcalá-Wallé.
E orador di anochi tabata sr. Kenneth Gijsbertha.
Su diskurso a bai tokante di Karakter i Amor pa Patria.
Ela pidi un momento di silensio pa dos di e nominadonan ku ya no ta ku nos mas ku ta srs. Errol Rooil i Niels Liberia.
Ela papia ku e karakter di e deportista/coach mester sirbi komo modelo. Ta p'esei no ta tur gran deportista òf tékniko tambe por drenta Salon di Fama.
Algun ehèmpel ta Pete Rose, pa falta di karakter i Diego Armando Maradona, tambe pa falta di karakter.
E Amor pa Patria ela mustra riba Churandy Martina ku no a skohe pa kore pa Ulanda.
E sinku nominadonan ku a drenta Salon di Fama djasabra tabata:
-sr. Ricardo Elhage, ku a nase dia 30 di ougùstùs 1931.
Sr. Elhage tabata presidente di NaBaFe, NAOC, FeBeKo i tambe miembro di IBA, ODECABE i COPABE.
E ta tambe presidente di Sta. Rosa Indians Baseball Club i tambe di Stichting Tio Daou Ballpark. Ela keda representá pa su yu Shaheen Elhage.
-Sr Julius "Julio", Oscar Hellburg, deportista/Dirigente/Árbitro, a yega Kòrsou na 1936. Pa un periodo sr. Hellburg a hunga
tantu Beisbòl, komo Sòftbòl. Tambe ela hunga komo kiper den futbòl.
Despues sr. Hellburg a bira empayer i tabatin un konosementu profundo di reglanan. Esaki ku yudansa di sr. Clovis Lodewijks, ku tabata presidente di CONPASA, a pone ku sr. Hellburg a sirbi komo "Umpire-In-Chief di e II Kampionato Panamerikano di Sòftbòl Femenino na Lima, Perú. Despues ela fungi tambe komo instruktor di empayer internashonal.
--Sra. Soraida "Aida" Juliana, Deportista, ku a nase dia 18 di yüli 1960. For di 1973 sra. Juliana ta forma parti di "Pichingolo". Ela hunga di 1976 te ku 1991 ku "Pichingolo" i a titulá kampion 17 biaha den 18 aña. Sra. Juliana a sali Hungadó Mas Balioso i kam-pion picher na 1978, 1979, 1981, 1982,i 1983.
Deportista di Aña na 1988 ets.
-Sr. Niels Francisco Liberia, Deportista/ Dirigente ku a nase dia 4 di yüni 1938. Ela bin fayesé dia 31 di mei 1998.
For di prinsipio di añanan '50 ela kuminsá praktiká e deporte di Basketbòl komo miembro di Sithoc. Despues ela lanta e sekshon di Damas di Sithoc i Olympic Damas. Durante di dékada '70 i '80 ela fungi komo entrenadó i coach prinsipal di e selekshon di Basketbòl di Kòrsou.
Sra. Maria Liberia Peters i su famia tabata presente.
-Sr. Errol Rooi, Deportista, a nase dia 5 di yüni 1953 i a fayesé dia 27 di mart 2008. Na 1969 ela kuminsá hunga Vòlibòl den e tim di Super Cleaning. Na 1978 ela bai biba na Ulanda i a hunga Vòlibòl den e divishon máksimo di Ulanda ku e tim di Brevok.
Na e okashon aki su kasá Petronella A.M. Vermeulen i su famia tabata presente djasabra anochi
Despues di e seremonia di introdukshon por a sigui kombersá amenamente.
No comments:
Post a Comment