Historia di Kenley Jansen, kètcher ku a bira picher i ta destaká den Dodgers

Softballcuracao.com a saka un entrevista for di Revista Deportivo Korsou di febrüari 2010 pa laga nos lesadónan sera konosi ku e tremendo prospekto aki di Los Angeles Dodgers.
Ta trata di un hoben yu di Korsou kètcher ku a keda konverti den picher i tin hopi eksito den poko luna komo picher.

ENTREVISTA
Den edishon number 159 di Revista Deportivo Kòrsou, nos lo laga abo sera konosí ku Kenley Jansen, prospekto picher di e organisashon di Los Angeles Dodgers. Kenley Jansen lo ta riba e roster di 40 di e ekipo Los Angeles Dodgers pa loke ta trata Spring Training 2010 di Grandes Ligas di Beisbòl. Kenley Jansen lo mira aktuashon kontra ekiponan di Grandes Ligas durante Spring Training despues di e tira apénas un luna den Liga Menor di Dodgers, e ekipo di klase A haltu Inland Empire.
Fanátiko di Deporte i di Beisbòl di Kòrsou keda pendiente pa e èks-kètcher i awor picher di Beisbòl Profeshonal Kenley Jansen ku ta tira un rekta di 95 miya i tin ora ta tira 99 i 100 miya pa ora.

KENLEY JANSEN
Kenley Jeronimo Jansen a nase na Kòrsou, 30 di sèptèmber 1987 i ta biba na Kaya Kokolishi 74. Kenley ta midi aworaki 6 pia 5 (1 meter 97) i pisa 255 liber.
Kenley a bai Berg Carmel College i despues PLTS.
E tremendo prospekto picher ta yu di Isidro i Bernadette Jansen. Kenley tin dos ruman hòmber, Verni Jansen di 31 aña i Ardley Jansen di 27 aña.
Kenley: “Verni Jansen ta hunga basket i tin e tim Bandits huntu ku algun amigu. Verni Jansen, mi ruman a lanta e tim. Ardley Jansen ta hunga beisbòl den selekshon i den Santa Maria Pirates.
Antes e tabata profeshonal ku e ekipo di Atlanta Braves den Liga Menor manera mayoria hende ku ta sigui beisbòl na Kòrsou sa.
Verni a hunga un tiki beisbòl pero semper tabata mas interesá den basket.
Dor ku Ardley ‘Archie’ Jansen tabata un èksprofeshonal ku a hunga ku Atlanta Braves mi a siña masha hopi for di dje. E tabatin un bon imagen i ela splikami hopi kos.
Mi tata tabata hunga futbòl antes. Ela hunga un tiki beisbòl tambe. Mi mama a praktiká e deporte di vòli.”

KOMIENSO
“Mi a kuminsá beisbòl huntu ku mi rumannan banda di kas. Nos mihó amigu yu di Kenneth Gijsbertha, Kenneth Gijsbertha Jr. tabata hunga beisbòl ku nos.
Kenneth Jr segun mi no a hunga den tim, pero e tabata move bon si i tabata hunga ku nos den kurá di kas. Semper ela bai afó ku nos ora nos tabata bai afó ku selekshon ets. Mi a hunga semper den ekiponan di Marchena serka Shon Ki Nicasia.
Mi a kuminsá Vruminga League ku mas o menos 6 pa 7 aña, Pre-Infantil despues Little League, Junior League i Senior League serka Marchena.
Mi tabata tira links promé, e kos ei ta prèt. Mi tabata kue mi ruman su wante ku ta wante links, ke mèn wante pa hinka den man links pa hende ku ta tira rechts.
Mi tabata kue e wante ei hinke di un manera straño den mi man rechts pa tira ku links i tabata tira ku links normal.
Semper nan (mi rumannan) tabata haña ku mi mester tira ku rechts. Nan tabata bisa ku mi ta manera mucha muhe i mi mester tira ku rechts.
Mi di, lagami tira ku rechts i ya.... mi a keda ku e brasa fuerte rechts. Mi por a tira ku links na chiki. Pero despues mi no a tira links mas.
Nan no tabata ke pa mi bati links tampoko. Pero ya esei si mi a keda wanta i pesei semper mi a keda un Switch Hitter i mi tin mas poder na banda links di plato.
Mi a hunga un tiki basket tambe ku Suffisant Pittbulls serka un gai coach ku yama Milton. Un temporada kòrtiku mi a hunga basket, mi tabata mas interesá den beisbòl i tabata hunga basket e ora ei gewon pa ‘fun’. Semper den off-season sí, ke mèn ora no tin Beisbòl Little League.
Mi a hunga Beisbòl te ku Senior League, hunga dos wega den Beisbòl Hubenil pa despues firma.
Mi a firma profeshonal ora mi a kaba di kumpli 17 aña, 17 novèmber 2004”, Kenley Jansen ta konta for di su kas na Kaya Kokolishi 74.

SELEKSHON I PAISNAN
Kenley Jansen: “Mi a hunga den tur selekshon di mi edat i semper komo kètcher i komo kètcher estelar. Mi a bai Colombia, Bahamas i Panama 2 biaha. Colombia tabata ku Little League, Bahamas ku Junior League, un biaha Panama ku Junior League i e otro biaha na Panama tabata Little League.
Ku selekshon nos a bira kampion na Panama aña 2003 i bai Bangor Maine. 2004 nos a pèrdè den Latino Americano na Kòrsou. Nos no a bai final.
Mi a biaha rònt Merka den Liga Menor naturalmente.
2009 mi a bai World Baseball Classic ku Hulanda, 2006 mi no tabata den e selekshon di Hulanda di World Baseball Classic.
World Baseball Classic tabata un eksperensia inkreíbel, bo no por imaginá bo mes. Niun hende no a verwagt nos gana un wega. Tur hende e bisa ta imposibel pa gana e grandinan den beisbòl.
For di Kòrsou, nos a train fuerte i bai pa kambia pensamentu di tur hende. Nos a pensa ku nos no tin nada di pèrdè.
Nos a bin gana República Dominicana dos bes i avansá pa e siguiente buelta.
E siguiente selekshon tabata na Mundial di Beisbòl kaminda mi a bai komo picher. Einan mi a impreshoná tur skout, ke mèn di otro ekiponan tambe.
Ei Dodgers a hañanan obligá ta pone mi riba roster di 40. Mi a impreshoná den e Mundial na Italia komo picher e hopi skout su wowo a habri, bon show case pa mi.
Dor ku mi tabata den mi rule V i mi a picha den mi último di luna di kampionato i impreshoná, Dodgers a hañanan obligá ta pone mi riba e lista di 40.
Nan mester di un picher set-up man mas riba e tim di Grandes Ligas.
Rule V (sinku) ke mèn ku bo a hunga 5 kampionato den profeshonal. Nan mester pone bo riba roster di 40 di e tim di Grandes Ligas òf nan mester pone bo riba lista di Tripel A.
Nan ta protehá bo riba lista di Tripel A, den novèmber tin un draft i otro ekiponan por draft (skohe) e hungadó òf den e kaso aki ami.
Mi por bai den otro ekipo i mi mester hunga den e otro temporada den Grandes Ligas, ke mèn di si nan no a protegá mi den e lista di 40 hungadó di Big League.”

WEGA NA KÒRSOU
“Bon mi a sinti mi hopi bon e promé wega, e djabièrnè 5 di febrüari na Tio Daou Ballpark tirando tres ponche. E di dos wega si a bai basta bon, ora mi tabata enfrentá Archie mi ruman mes, mi tabata manera kos ku mi a pèrdè rosea. No ta di emoshon ni nada, ta gewon. Mi a bira un tiki wild i danki Dios mi ruman Archie Jansen mes a yuda mi sali for di e inning. Archie a bati a dòbel plei kontra mi.
Mi a gusta e wega ku nos a hunga na Kòrsou.”

MIHO KONTRINKANTE
Kenley: “Ya, den World Baseball Classic mi a topa of kètcha na momentu ku e gainan grandi di Grandes Ligas tabata bati. Mi a topa David Ortiz, Adam Dunn, Jimmy Rollins, Hainley Ramirez ets. komo batidó. Bon ya, nos tabatin un bon scouting report di nan si, bo ta bai wak televishon i wak kiko e gainan aki ta bati. Ami, Hensley Meulens i e manager Delmonico a traha pisá riba esei. Komo kètcher mi tabata sa kiko mi tin ku hasi.
Batidó bon ku mi a topa komo picher ya.. mi no a picha hopi ainda. Mi no a haña un bon batidó òf sierto batidónan hopi biaha ets. pa mi por bisa ainda.”

PROFESHONAL
“Semper mi tabatin deseo di firma komo profeshonal, semper. Ora mi ruman a firma ku Atlanta Braves esei a duna mi mas gana di firma.
E smak a bira mas hopi i mi a hasi mi bèst semper.
Komo kètcher mi tabata trein hopi riba e defensa. Na Kòrsou tur mainta mi tabata trein na Tio Daou ku e profeshonalnan, train ku Shaki Isenia atardi ku sa hopi di kètchamentu.
Komo picher mi no a train masha ku mi profeshonalnan na Kòrsou. Dodgers a bisami pa sosegá un ratu. Mi ta kore hopi den bario ets.
Komo picher bo mester tin hopi pia, bo tin ku gym hopi, bo tin ku kore hopi. Buikspier tambe bo mester tin hopi. Ku kore mi ke mèn kore distansia i tambe hasi hopi sprint i tambe bula kabuya.
Mi ta kere komo picher, ya.. nase mi a nase ku e brasa. Mi no mester overpower hopi pa mi tira 95 pa 96 miya. E ta bai gewon. Hopi picher mester overpower. E bala ta bai gewon, ke mèn ‘easy going’, e bala ta bai duru di su mes.”

PREMIONAN GRANDI
“Mi a yega di gana tres premio komo lider di homerun den Little League. Ya, den Little League bo no ta gana premio den bo man. Mi bate semper tabata bon, e último tres añanan mi no sa kiko a pasa.
Mi a sali mihó kètcher Junior League na Panama ku selekshon. Profeshonal mi a kai den All Star Game aña 2008 na Clase A. Mi a wòrdu invitá pa Homerun Derby tambe e aña ei.”

LO MAKSIMO
“Mi a logra komo kètcher den All Star. Semper nan tabata konsiderá mi un di e top kètchernan di e organisashon di Dodgers. P’esei tambe a dura hopi pa nan por kambia mi pa picher. Lo máksimo mes ta ku komo picher, apénas un luna komo picher den profeshonal, mi a bai pa e roster di 40 di e ekipo di Grandes Ligas di Los Angeles Dodgers.”

HOBI i OTRO KOSNAN
“Mi ta hunga hopi Play-Station 3, wega di beisbòl, un tiki wega di gera tambe. Mi no ta hunganan ora mi tin ku bai wega si. Mi ta hunga despues di wega pa mi rilèks. Promé ku wega no, e ta pressure bo mas i pone bo den stress. Ta despues di wega pa mi rilèks mi ta hunga play-station.
Promé ku mi bai tereno mi ta kuminsá focus, konsentrá pa e wega. For di kas na apartamentu mi ta kuminsá focus, ora mi yega wega mi ta di focus kaba.
Mi kolónan preferí ta blou i pretu. Mi ta gusta kome roti di mi mama, mi gusta yambo i mi kumindanan kriyoyo.
Ora mi bin Kòrsou mi ta hañami ta kome hopi stoba, kabritu, yambo ets. Roti di mi mama mi ta kome mas.
Na Merka bo no ta haña e kosnan ei. Na Merka ta restorant i bo ta haña bo ta kome hopi fastfood, bo mes tin ku hasi algu, yama mama na Kòrsou puntra kon ta hasi e kosnan den kushina ets.”

BON EKSPERENSIA
“Bo ta konosé masha hopi lugá bèrdat. Bon eksperensia ta sinta ku hendenan di Grandes Ligas. Mi a yega di sinta i papia hopi ku Russel Martin, e kètcher estelar di Dodgers.
E ta yama mi ‘Curacao’ e no ta yama mi na mi nòmber. Nos ta hopi será ku otro, bo ta siña hopi for di nan. Mi a sinta ku Brad Asmus hopi. BJ.Ellis tambe mi a kombersá hopi kun’é. Kombersá ku gainan manera Charlie Hough i Tommy Lasorda. Chuck Cream tremendo middle reliever di Dodgers. Aron Sele ku a sali kampion ku Los Angeles Angels na 2002. Nan ta gewon papia ku bo.
Pa loke ta trata bon eksperensia tempu di Little League, mi ta kòrda na Senior League nos tabata pèrdi 2-0 i awaseru tabata bini pa kai duru mes. Bo tabata mira na e wer. Si awaseru lo a kai e momentu ei nos lo a pèrdè. Mi a dal homerun empatá e wega i e wega a keda empatá despues ku awaseru a kai. Despues nos a bin bira kampion na Panama.
E otro bon eksperensia ta, saka Willie Tavares out na tersera den World Baseball Classic komo ketcher kontra República Dominicana. Un out klave ku a kambia henter e wega ku a pone ku nos a gana. Willie Tavares ta un di e mihó robadó di base den Grandes Ligas i pa kolmo ela kue hopi riba e picher tambe i mi a saké out tòg.
Mi a saka Henley Ramirez tambe out robando segunda den World Baseball Classic.”

MAL EKSPERENSIA
“Nunka mi no ta kòrda e mal eksperensianan. Algu malu pasa mi no ta bai kordé. Esnan malu ku a pasa mi no ke kòrda nan mas. Siguiente dia bo mester ta riba vèlt. Si bo kòrda e kosnan malu hopi biaha e por stroba bo.”

PARTI FUERTE
“Mental semper mi tabata fuerte. Mi brasa tabata fuerte, semper mi bate tabata bon, ta último añanan e bate a kai un tiki. Semper mi a kere den Dios. Ku Dios dilanti nada no por pasa bo. Semper wak padilanti i ku bon relashon ku Dios semper mentalmente bo no ta kai. Dios lo no laga bo na kaya nunka.”

MENSAHE
Kenley “Pa esnan for di deporte, anyhow pa tur anto, skol na promé luga. No tuma nada ‘For Granted’. Zorg pa bo ta den bon kaminda. Skohe bon, semper tuma bo tempu.
Pa esnan den deporte tambe skol na promé lugá. Kaba bo skol promé, kaba wak e karera profeshonal. Pone bo metanan, bai pe tur tur. Bisa semper bo por i lo bo logra.”


AWORAKI
“Mi ta saliendo pa Big League dia 18 aki. (Revista Deportivo Kòrsou a tene e entrevista dia 15 di febrüari na kas di Kenley Jansen na Kaya Kokolishi). Mi ta bai hasi mi best pa mi logra konvensé e hendenan di Dodgers ku mi tin kalidat di picher den Grandes Ligas. Por ta lo mi no keda ariba mesora, pero ku chèns di subi na sèptèmber si tur kos bai bon ku poder di Dios.
Semper mi tabata ke hunga beisbòl. Kòrda si ku beisbòl ta parti di bo bida i tin muchu mas kos despues. Pero mi ta bolbe bisa e hobennan, skol na promé lugá.
Mi ta spera ku lo mi hunga den Grandes Ligas un dia. Mi no sa ki dia lo mi stop. Ora mi mira ku mi kurpa disidí ku mi tin ku stòp. Ora mi mira ku mi no por bai mas lo mi stop.
Ami lo biba na Kòrsou sigur. Den off-season na Kòrsou lo mi ta i nunka lo mi no laga mi isla na kaya. Danki pa e entrevista i ku Dios dilanti nos tur lo logra.



KAMBIO DI KETCHER PA PICHER

Promé ku nos entrevistá Kenley Jansen riba su karera kompletu kuminsando for di Little League bin ariba i otro detayenan, nos a kombersá riba aña 2009, kon a bai den komienso i den detaye kon e kambio di kètcher pa picher a bai.

AÑA 2009
“Mi a start komo kètcher den klase A fuerte i bai kaba den Tripel A. Akinan na Tripel A tambe aktuashon tabata tremendo. Tabata bon eksperensia i esei tambe a yudami ku nan a wak mi brasa komo kètcher pa despues konvertími den picher. Mi brasa a ‘market’ mi komo picher pa despues hopi hende kier a mira mi komo picher.
Semper for di chiki mi brasa tabata fuerte.


Dia 17 di novèmber aña 2004 mi a firma komo kètcher ku Dodgers i mi tabatin 17 aña .
Pa loke ta e kambio di kètcher pa pitcher: Mi mes no por a pensa ku mi lo a bira un picher dje bon ei manera nan ta bisa, dje efektivo ei den korto tempu.
Mi tabata duda hopi, mi a hinka tur kos den man di e hendenan ku sa hopi mes di beisbòl. Den komienso mi no tabata sigur dje kos, mi a duda. Mi a tuma kontakto ku mi famianan tambe pa konseho.
Dia 30 di yüni 2009 nan a sinta papia ku mi den Tripel A. Ami ku mi farm direktor De John Watson. Mi a papia hopi mes ku nan. Mi kier a a sigui komo kètcher.
Nan a bini ku kontrakt i ehèmpelnan di yen di gai ku tabata hungadó di posishon ku despues a bira picher, Guillermo Mota ets. i hopi di e gainan aki a resultá.
Nan a bisa mi ku mi ta yega mas lihé komo picher. Nan a bisa ku komo kètcher mi tabata bon defensivamente, pero nan no sa ki ora òf ki aña mi por a yega i nan a segura mi ku komo picher lo mi yega mas lihé.
E último dos añanan e ofensiva no tabata bai dje bon ei. Mi a bai klase A Fuerte bèk.
Nan a bisa mi ku mi no tin nada di bai hasi den Rookie i ta klase A Fuerte mi tin ku bai.
Nan a pone ku mi ta bai klase A Fuerte, train komo picher un aña numa, ke mèn lo mi no a picha den wega. Nan tabata ke pa mi train ku e pitching coach Charlie Hough.
Charlie Hough su karera tambe a bai mas o menos manera esun di mi, ela keda konvertí den un picher den beisbòl profeshonal. E tabata shortstop ku no tabata masha eksitoso.
Tommy Lasorda a konsehá Charlie Hough. Un picher ku tabatin un bon brasa e tempu ei, komo picher e tabata tira duru. Despues ela leshoná su brasa i einan Tommy Lasorda mes a siñé tira knukle ball. Ela logra komo picher i gana masha hopi wega den Grandes Ligas.

Charlie Hough ta mi picher coach na klase A Fuerte. Mi a trein un luna i nèt un luna despues nan a kombersá ku mi komo picher.
31 di yüli 2009 mi a tira mi promé wega den profeshonal. E intenshon tabata pa den 2010 mi kuminsá tira den wega.
Den e promé wega mi a tira 10 bala, un ponche sali masha lihé for di e inning. Mi a tira un bola so, nan a dal mi un hit, e promé batidó mi a tira tres rekta siguí i ponché.
Nan ke mira desaroyo, nan no ke wak ponche ni nada, nan a wak ku mi ta keda tira den zona. Nan ke pa mi ta agresivo tirando strike i keda den zona.

Mi a picha de pre-infantil, ke mèn promé ku Little League. Despues mi a tira un wega den e kampionato Latino Americano di Little League na Colombia i nunka mas mi no a picha.
E wega ei tabata e wega final kontra Venezuela.
Mi a keda komo kètcher semper”

TRAINING KOMO PICHER
Komo picher mi a sinti mi gewon natural i e kosnan tabata bai hopi bon. Den klase Fuerte mi a tira 11 base por bola den 11 inning. Ya kon ku bai bini e kos tabata nobo tambe.
Mi a tira 11 inning i 2 tersio, 19 ponche, 11 base por bola, mi a tuma un homerun i 5 kareda. Nan a konektá mi 11 hit i un homerun. E dos otro balanan batí tabata flai pa outfield.
E liga ta unu mas difísil, parkenan ta chikitu. Klase Fuerte ta un kompetensia bon fuerte, espesialmente e Liga di West.
Mi picheo a habri wowo di hopi scout tambe. E Mundial ku mi a bai na Oropa a habri hopi skout su wowo tambe. Den Instructional League mi a dominá atrobe.
Den Arizona Fall League tambe a bai hopi bon, mi a tira hopi bon enfrentando varios hungadó ku a hunga den Grandes Ligas. Mi a tira 4 inning i 2 tersio. Mi a tira 9 ponche, ke mèn kontra hungadónan di Grandes Ligas, Tripel A i Dòbel A.
Pichamentu no ta asina asina. Un kètcher semper ta kontrolá su tirunan pa e tira un bon tiru espeshalmente pa segunda.

BIG LEAGUE CAMP
Aworaki mi ta bai Big League Camp ku e ekipo di Los Angeles Dodgers, djaweps dia 18 di februari mi ta Sali pa Merka.
Ta algu historiko pa un hungado ku no tin ni un aña komo picher den profeshonal, un picher konvertí por bisa ku ya despues di algun luna ta huntu ku e tim grandi riba roster di 40 pa bai Spring Training. Apenas mi a tira un luna.

LANSAMENTUNAN
Mi tin un fastball, mi di dos picheo ta mi slider i change up.
Tommy Lasorda ta traha ku mi tira e kurva. Tommy no ke mira mi tira muchu slider debí ku e por daña bo brasa.
E último biaha ku mi a bai Los Angeles den luna di yanüari mi a traha hopi ku Tommy Lasorda. Di mes semper ela gusta mi stail di hunga bala, e gusta mi brasa mes.
Semper e tabata gusta komo ketcher. Semper Tommy a bisa ku e ke mira mi riba montikulo pa e brasa fuertismo ku mi tin.
Mi ta kòrda un biaha tirando den bullpenn, ela bèl e hendenan abou bisa e front direktor pa ora mi kaba no laga mi bai, e ta baha bin abou serka mi.
Su ofisina ta nèt ariba, riba e bulpenn.Ela bisa ku e ta bini abou pa nos traha riba e kurva.
Mi tabata gewon impreshoná debí ku tur hende a bai kaba i ami ku e ketcher so a keda pa un homber di nivel di Hall of Fame manera Tom Lasorda keda traha ku mi so.
Nos a keda 20 minut trein kurva.

VELOSIDAT
Mi fastball ta 95 plus. Ora mi kue velosidat e ta bai 99 miya pa ora.
Mi a yega di tende ku nan a klok mi 100 miya pa ora. E otro skoutnan por a bisa ku mi a tira 100, pero riba mi sheetnan ku e scoutnan ofishal ta nota mi a yega di klok 99 miya pa ora.
Mi mes no ta bisa ku mi a tira 100 debi ku mi mes na sa. Dodgers tin basta gai den relevo of relevo korto ku ta tira duru asina.
Dodgers tin Broxton, Belisario ets. ku ta tira hopi duru. Manera kos ta kanando mi tin chens di subi ariba ku Dodgers.
Mi a papia ku a assistant General Manager di Dodgers, e sa papia hopi ku mi.
E ta bisa mi ku e ke mira mi bon den shape, e ka pa mi kuida mi man. E ta pensa ku mi por haña e call promé ku sèptèmber.
E ta haña ku e desaroyonan ta hopi bon i ku sèptèmber lo mi lo ta riba sigur. Mi mes ta pensa ku mi mester desaroya un tiki mas komo picher pa Big League, pero ya.. ta nan ta miré. Ami ta sinti ku mi mester traha hopi mas pa yega, pero ya..
Nan ta pensa ku Dodgers mester di un set up man, i den futuro nan ta mira mi komo un closer.
Na Kòrsou mi tabata tira 80%. Mi tabata kere mi tabata tira 93 pa 94 miya. Por ta mi a primi un biaha 95 pero mi no a bai pa tira mas duru.
Mi no ta bai primi aworaki. Bo mester built up tiki tiki pa despues kue e velosidat.
Na Big League Camp ke men na Spring Training si mi ta bai primi un tiki ora mester. Naturalmente bo mester impreshoná, pero semper kuidando e brasa si.
Nunka mi tabatin problema ku brasa i nunka mi no a hanja dolo di brasa. Mi ta zorg di kuida mi brasa semper.

PROFESHONAL I SALARIO
Rookie te ku Klase A fuerte tamesun pay-roll tin. Mi ta bisa e kos manera e ta pa esnan ku ta firma na Kòrsou no kere ku ta masha hopi plaka ta lora.
E sen ta mas o menos 1100 dollar pa luna. Den Dobel A e ta bira mas. Mi no ta krode for di mi kabes pero e ta mas ku 2000 piku dollar pa luna. Tripel A tambe a e sen ta subi mas.
For di bo mes sen bo tin ku paga bo luga di keda. Pa kinsena bo ta haña i 500 piku dollar i bo tin ku ora kune. Bo tin bai pega meskos ku e bida di studiante tin ora.
Riba roster di 40 aworaki bo ta bai gana 32500 dollar pa aña. Pa luna bo tin ku partie den 12 luna. E dos dos aña e ta bira 60.000 i algu pa aña i e di tres aña riba roster di 40 90.000 dollar. Big League si bo kai riba e roster di 25 bo ta kai riba 400.000 dollar pa aña.

Den beisbòl Profeshonal bo ta struggle hopi. Beisbòl por laga bo na kaya, miho bo studia i si bai malu den beisbòl of deporte profeshonal mes bo por tin papel den bo man pa bai traha un bon trabou despues.
Mi tin un ehempel den Archie Jansen. E kos ta suerte tambe, leshon por para bo karera gewon di un manera overwagt.” Kenley Jansen a bisa nos den e prome parti di e entrevista.