WILLEMSTAD—Algun dia pasá Amateur Baseball Bond Aruba i FEBEKO a dal e promé paso den e proseso pa restablesé e lasonan di koperashon entre e dos federashonnan. Tabata despues di mas ku 22 aña ku selekshonan di Kòrsou i Aruba a enfrentá otro. E promé interkambio aki a konsistí di dos partido komo parti di ‘double header’. E partido ku mester a tuma lugá djabièrnè no a tuma lugá pa motibu ku e maletanan ku unifòrm i material di e selekshon di Aruba no a yega (na tempu). Dirigentenan di e dos selekshonnan a akordá pa riba djasabra hunga dos partido.
E promé partido: Kòrsou 10, Aruba 1
Kòrsou ku bateo oportuno a pone e wega riba eis ya den e promé 4 entradanan anotando 10 kareda pa al final gana ku anotashon di 10 kontra 1. Aruba a kibra e blankeo den e di 6 entrada. Menshon speshal ta bai na e 4 pichernan hóben Girigori, Daou, Bito i Lambertina kendenan a kombiná pa permití 5 hit i sero kareda limpi. Mihó batenan tabata Randolph Kirindongo di 3-2 i Ludwin Obispo di 4-2.
E segundo partido: Kòrsou 5, Aruba 4
Den e di dos partido Kòrsou a sali kue un bentaha di kareda i a logra mantené esaki pa gana ku anotashon di 5 pa 4. Mihó batenan tabata di Rafael Jozefa (4-2) i Ludwin Obispo (5-2).
No comments:
Post a Comment