First Curacao Anual International Baseball Showcase 2007

WILLEMSTAD - Djaweps 29 di novèmber den oranan di anochi den Coach Sportsbar a tuma luga un rueda di prensa organisá pa Curacao Baseball City Foundation
( C.B.C.F. ) huntu ku Future Stars Baseball Academy di U.S. Virgin Island a bini huntu pa asina nan informa prensa tokante e grandioso Showcase Internashonal di Baseball 2007 ku ta tuma luga djasabra i djadumingu awor henter dia den Tio Daou Ballpark na Santa Rosa.
E Showcase aki ta un konsepto nobo pa Korsou i area di Karibe pa rekluta prospektonan di baseball pa nan por drenta skolnan na Merka ku posibilidat di wordu di draft den futuro pa organisashon nan di baseball di liga grandi.
Si e hungado no logra yega liga grandi alomenos su futuro lo ta sigura pasobra el a finalisa un estudio haltu na Merka den un College of un Universidat.
Pa e motibu ei mes ta presente aki na Korsou diferente coach di skolnan di Merka pa partisipa na e Showcase di baseball aki i wak hungado pa nan bai ku ne pa hunga baseball pa nan skol ku e speransa ku den un futuro serkano nan lo wordu di draft pa ekiponan di liga grandi.

E siguiente coachnan ta presente aki na Korsou: Perry Keith di West Oklahoma State College, Kevin Tucker di Kansas State University,
Timothy Haynes di Virginia Commonwelt College, Robert Lucas di Florida A & M University, Brett Richardson, Steve Appel i Anthony Pla di Bridgeport University Connectitut.
Tur esakinan ta di skolnan na Merka.
For di U.S. Virgin Island tambe bo tin coachnan di Future Stars Baseball Academy entre nan e presidente ku ta Darron Canton huntu ku Rowan de Castro, Alvis Christian i Dharryl Russel ku lo ta e Field Coordinator pa e Showcase 2007 aki.
Pa pone e cheri riba e bolo ta aki na Korsou Sr. Ronaldo Peralta ku ta Manager International Baseball Operations Latin America for M.L.B.
E Showcase di baseball aki ta konta ku un total di 60 partisipante di kual 4 ta di U.S. Virgin Island, 2 di Bonaire, 5 di Aruba, 3 di Ulanda i sobra ta di Korsou mes.
Djasabra mainta pa 9 or lo tuma luga e apertura ofisial i despues di esei lo tin hopi wega kuminsando 10 or di mainta te ku 9 or di anochi.
Djadumingu weganan ta kuminsa pa 10 or di mainta i lo dura te ku 6 or di atardi kaminda ku despues pa 6.30 lo tuma luga e klousura di e Baseball Showcase 2007 den Tio Daou Ballpark na Santa Rosa.
Pueblo di Korsou en general ta keda invita pa bin gosa di tremendo weganan di baseball na nivel haltu trese pa prospektonan entre 16 pa 19 anja di edat.
Tambe lo tin posibilidat pa gana masha hopi premio durante di e dos dianan aki pa tantu grandi komo chikitu.Lo tin animashon i tambe grupo di baile presente den stadion tur dos dia. Jair Jurjjens tambe lo ta presente pa saka potret i parti firma pa tur su fanatikonan. Bo ta keda kordialmente invita pa presensia e grandioso Baseball Showcase 2007 aki. Un gradisimentu di kurason ta bai tambe na tur e sponsernan ku a kopera ku e tremendo proyekto aki , ku ta:
Xerox, Rumbera Network, Pinacle Sports, H.B. Management, Napa Outoparts, Curacao Tourism Board, Coach Sportsbar, Lovers, A.J. Sports i Tio Daou Ballpark.