“Pa motibu di tempu un hungadó di Swift a retirá i no tin problema den Swift”

WILLEMSTAD - “No tin problema den Swift manera ta aparentá. Ta un tékniko i un hungadó a tuma retiru”, Sergio Leon, presidente di Swift a konta Softballcuracao.com
“Emile Haswell ku ta nos manager pa basta aña kaba lo no bai tin tempu pa motibu di trabou i Erling Gosepa pa motibu di su trabou iregular a tuma retiru”, e popular presidente a sigui konta.

Sergio: “Mi a tende asuntu di J.J. tambe i mi ta asumí ku ta Jolly Juliana.
Den e reunion di djarason 12 di desèmber último mi no a mira Eldred ‘Jolly’ Juliana. Jolly no a entregá retiru i ta den La Prensa mi a lesa e informashon ei.
Mi mester bisa ku mi no tin hopi tempu pa Swift, pero pa otro aña un hòmber grandi di nos lo ta bèk na Kòrsou pa traha komo direktiva i tékniko den e ekipo Swift.”