WILLEMSTAD - Den edishon number 157 Revista Deportivo Korsou a kombersá ku Vernon Isabella, dirigente di Little League destaká ku 7 titulo di Karibe siguí, un título Mundial i varios premio grandi mas den su karera komo dirigente.
Softballcuracao.com lo reprodusi e entrevista aki pa nos lesadonan.
Dia 10 di desèmber 2009, Maduro & Curiels Bank a skohe Vernon Isabella komo Personahe di Aña 2010. Un logro gandi pa un hóben dirigente ku a logra hazaña sin presedente komo coach riba nivel di Little League.
Nos lo laga abo, lesadó, sera konosí ku Vernon Isabella djaserka.
VERNON ISABELLA
Vernon Vicento Isabella a nase na Kòrsou, dia 27 di òktober 1981 i ta biba na Cyprusweg 24. Vernon ta traha komo sportleider na Fundashon Sedreko. E ta-lentoso coach i hungadó di beisbòl ta yu di señora Ludmila Isabella i Erwin Pourier.
Vernon a konta Revista Deportivo Kòrsou ku ela haña e nòmber di Tripel A dor ku tempu e tabata chikí i tabata trein den e organisa-shon di Santa Maria serka Frank Curiel semper e tabatin un flanel i un pèchi di Tripel A (Kantor di Number) bisti.
Vernon: "Tur training mi tabata bai ku e pèchi i flanel sin falta ningun, tur biaha ku e pèchi i flanel. Pa e coachnan i Frank por yama bo i hala bo atenshon mas fásil nan tabata yamami Tripel A. Un tanta di mi tabata traha na kantor di number Tripel A i ela trese e flanel pa mi."
Ludmila Isabella mama di Vernon no a hasi deporte, miéntras Erwin Pourier a hunga bon futbòl den Vesta i otro ekiponan i tambe e ta hungando den Futbòl Veterano aworaki.
"Mi tio Oswald 'Yuchi' Isabella a hunga beisbòl i Sòftbòl i ainda e ta hunga tantu Sòftbòl Slowpitch komo Beisbòl Veterano", Vernon 'Tripel A' Isabella a sigui konta Revista Deportivo Kòrsou den un entrevista for di Frank Curiel Ballpark.
KOMIENSO
"Mi a kuminsá den kurá di kas. Mi tio Yuchi Isabella tabatin tur su kosnan di beisb1l, e tabata kècha den e tim di A klas i di mes e tabatin su kosnan di kètcher. Mi ta kue e kosnan di dje den outo i hunga ku nan den kura. Mi tabata dal bala den kura, bati bala den muraya. Mi wela tabata bisa mi wak pa mi no kibra e muraya ku di mes tabatin un parti di palu i parti di bloki.
Mi tabata bai vèlt na Suffisant ku mi mama, despues mi a keda kas, keda kas. Mi tio a disidí di hibami Frank Curiel e ora ei.
Mi a hasi otro deporte tambe, pero no ofishal.
Mi ta gusta hunga basket, mi por hunga futbòl tambe, pero ta beisbòl mi a hunga den tim.
Mi a kuminsá hunga beisbòl ku 8 aña, mi a kuminsá den Liga Vruminga. Normalmente tur mucha ta kuminsá for di 5 aña, pero ami a kuminsá ku 8 aña.
Mi a kuminsá serka Frank. Mi a kuminsá den e tim Super Sport Shop, despues nan a kambia e nòmber i tim su nòmber a bira Promac.
Mi a kuminsá hunga bou di Luis Provacia i Earny Isabella. (Earny ta famia djaleu. Red).", Vernon a bisa Revista Deportivo Kòrsou.
Vernon a konta nos ku despues ela pasa pa Little League i keda tres aña den Little League. E tempu ei no tabata Minor ni Junior League.
Vernon a keda den Little League 3 aña den e ekipo Kiwanis i sigui pa Senior League 3 aña tambe den e ekipo Kiwanis.
SELEKSHON
"Semper mi a hunga den selekshon, mi a hunga den tur selekshon di mi edat sin falta niun.
Mi tabata hunga short, segunda i kètcher. Mi a bai Puerto Rico, Virgin Islands i Panama.
Mi a bati semper terser i kuarto bate. Hubenil tambe mi a bai ku selekshon.
Mi a topa varios hungadó i tim bon.
Den selekshon nos ta gana Pariba kasi tur biaha i bai afo pa representá Kòrsou.
E ekipo semper rival i fuerte tabata Marchena.
Hungadó fuerte i bon ku mi a topa tabata Maiky Isenia di Santa Rosa. Den selekshon mi tabata topé komo picher i den Hubenil di mes no tin asuntu di Pariba i Pabou mi tabata topa Maiky Isenia mas tantu. Bon hungadó ku mas o menos mesun edat ku mi.
Den Hubenil tabata mas dushi tambe, debí ku tabatin hopi kompetensia. Den Hubenil e kos a bira mas kayente. Bo tabata topa e gai di Pariba mas tantu.
Tempu di mi tempu no tabatin masha asuntu di scout manera aworaki. Ami lo a firma sigur i yega tambe. Mi tabatin hopi fé den esei pero ya, mi no tabatin e suerte", Vernon 'Tripel A' Isabella a sigui splika Revista Deportivo Kòrsou.
PREMIONAN
"Mi a yega di sali kampion bate na hopi okashon den Little League, sali kampion bate den Dòbel A. Mi a yega di sali MVP den final di Dòbel A den e ekipo supkampion. Mi tabata den Santa Maria i nos a hunga kontra Wild Cats. Mi a bati 21 hit den 6 wega di play-off final e aña ei. No ta wega, pesei mi a sali MVP tòg di final. E tempu ei mi tabata den Hubenil ainda i mi a bati 100 piku hit repartí den Hubenil, Klase A i Dòbel. A.
Lo máksimo ku mi a logra den mi karera ta e kampion Mundial 2004 i e supkam-pion Mundial 2005 na Williamsport."
VERNON ISABELLA,
DIRIGENTE
"Mi kuminsá komo dirigente tékniko. Mi a kuminsá den Junior ku Frank Curiel komo coach na aña 1999 i mesora mi a bai ku selekshon tambe Puerto Rico.
2000 mi a bai komo coach Colombia, último aña di Little League di Latino America. Nos a pèrdè den final kontra Venezuela ku Charlie Cijntje komo manager i Lo Celestina komo coach.
2001 mi a bai Junior ku Frank Curiel.
Nos a bai Puerto Rico. 2002 mi tabata komo coach den Liga Pabou Little League i nos a pèrdè kontra Pariba. 2003 mi a bira manager di selekshon di Little League Liga Pabou."
FAI SILLE
"Pa mi a bira manager pa promé biaha di Little League na un edat hóben di 21 aña, Fai tabata hopi importante. Ta Fai a para ariba ku t'ami mester bira manager di Little League. Masha hopi hende, masha hopi dirigente i coach a ninga i Fai a para ariba. Fai a bisa:"Mi ta kere den e hòmber aki."
Tur hende a kuestioné, mi mes a bisa Fai bo ta loko, bo no ta mira kuantu kos bo ta haña bo aden dor ku bo a nombra mi komo coach.
Mi ta hopi kontentu ku mi a tuma aden i mi ta hopi gradesido na Fai tambe. Mi ke pa menshoná esei tambe den e entrevista aki.
Mi a bira na Kòrsou e manager di mas yòng ku a bai ku Little League."
2003 - 2009
"Manera mi a splika kaba for di 2003 mi a keda apuntá komo manager pa promé biaha.
Mi a gana Pariba, gana Karibe i despues sali number kuater den Mundial di Little League pa promé biaha. Nos a bai Williamsport i sali number 4 pèrdiendo den final internashonal i semi-final Mundial.
Mi a pensa ku 2004 si mi ta bai pé. 2004 e ora ei nos a bira kampion di Kòrsou, ganando Pariba pèrtá den tur dos wega.
E aña ei e Kampionato di Karibe a tuma lugá na Aruba i nos a gana atrobe pa bai Williamsport.
E aña ei nos a bira kampion. No tabata fásil, nos tabata atras 8-4 den e wega kontra Hapon i nos a bini bèk i bin gana e wega despues.
2005 nos a gana Pariba, gana Karibe i yega te final di Mundial atrobe.
Nos tabatin un out faltando dos out pa gana pa 3 kareda pa bira kampion, pero einan fayonan chiki i kosnan a bòltu. E kosnan ei por pasa, nos tambe a bòltu skor kontra Hapon e aña promé i bira kampion despues ganando Merka. Esei ta beisbòl, bida mester sigui.
2006 mi a haña un aksidente i mi no a bai ni Karibe na Puerto Rico ni World Series. E muchanan si a bai bou di direkshon di Lo Celestina.
2007 tambe nos a bai Williamsport atrobe i keda na di 4 lugá den un bon presentashon.
2008 nos a gana na Boneiru. Un final kandela kontra Puerto Rico. Kada un swing di e gainan di Puerto Rico e aña ei, bo kurpa ta kue rel. Nos a gana tòg i yega number 6 den Serie Mundial
2009 na Kòrsou, tremendo eksperensia.
Dos tim di Kòrsou den final. Mi a pone un tiki preshon riba dirigentenan pa nos bai ku dos tim i esei a resultá un éksito rotundo tambe. Mi ta hopi kontentu ku a bai asina."
FAMA
"Bèrdat mi a haña fama dor di Little League, segun mi, mi a keda meskos, meskos meskos, ya.. segun ami anto. Na 2004 ku mi a bira kampion e fama a bini di mes. E muchanan apesar ku nan ta hopi hóben nan a haña hopi fama. No tin moda di hasi.
Mi a deal normal ku e fama. Naturalmente hopi hende ta kuestioná e manera di maneho.
Tin ora nan ta kritiká mi manera di manehá, pero mi no tin problema. Dependé kon bo hasié. Tin algun hende ta hasié di un manera destruktivo.
Jef...bo mes ta papia ku mi hopi, bo sa dje kos. Semper mi a skucha i bisa bo dikon tal i tal kos. Mi a yega di bisa bo flet, bo tin rason einan i mi ta dreché tambe.
Mi ta skucha di tur hende. Hopi hende a kontribuí pa mi yega kaminda mi a yega aki. Frank Curiel, Charlie Cijntje tin su kosnan bon. Lo Celestina tabata hopi importante den tur mi logranan, semper e tabata banda di mi. Mi a siña hopi di hopi hende. Di coachnan i di dirigentenan atministrativo tambe.
Shon Ki Nicasia. Sin Shon Ki su muchanan tabata imposibel, Charlie Cijntje i su muchanan. Liga Pariba.
Mi ta kòrda dia mi a gana Gordo van Zanten promé biaha, Gordo a bin ku su muchanan bèk pa wega di training pa asina nos por prepará pa e kampionato di Karibe.
Sedreko, Prensa, spònsernan, mayornan, fanátikonan, tur tabata importante", Vernon ta konta Revista Deportivo Kòrsou durante play-off semi-final di Liga Vruminga na Frank Curiel Ballpark.
KONTENTU
Vernon: "Mi ta hopi kontentu ku mi a skohe pa ta un dirigente tékniko. Mi a logra hopi. Mi a logra haña trabou tambe, haña hopi rekonosimentu pa mi kapasidatnan tékniko, siña masha hopi kos den bida tambe. Mi ta keda traha komo tékniko di mucha hopi aña mas. Mi ta coach adultonan tambe, mi ta coach a muchanan di sòftbòl di UNA, mi ta coach un tim di trabou di BDO tambe."
OTRO KOSNAN
"Mi hòbi ta deporte. Deporte ketu bai i mi ta gusta wak deporte, hasi deporte ets., dushi mes.
Mi koló preferí ta blou i mi kumindanan preferí ta porkchop, spare ribs ets.
Mi parti fuerte ta ora mi kai pa un kos, mi ta bai fuerte p'é i sigur di mi mes."
MAL EKSPERENSIA
"Bon ya ....., mal eksperensia ta e aksidente ku mi a haña aña 2006 i mi a keda for di sirkulashon pa algun tempu. Final Mundial tambe kaminda nos a pèrdè kontra Merka. Nos tabata ganá te den último inning faltando dos out pa bira kampion di Mundu pa di dos biaha siguí."
BON EKSPERENSIA
"Little League sigur. Bira kampion, tur lokenan ku mi a siña di Little League komo hungadó i tambe komo dirigente. Yen di kos bon Little League a trese pa mi. Konosé mas hende, kon e hendenan ta mira e kos. Famianan ku a para mi tras semper. E otro hendenan ku a para mi tras, mi coachnan, mi fanátikonan, mayornan. Sea gana of pèrdè, nan ta keda para mi tras."
MENSAHE
"Si por duna un man, duna un man na e hóbennan, duna algu bèk di loke bo a logra den deporte. Pa hopi hende deporte a nifiká hopi, pone nan logra hopi kos den bida. Bo a logra eseinan, pues duna bo aporte bèk pa e hóben-nan ku ta nos futuru tambe por haña bo eksperensia pa nan tambe por logra den bida i den deporte.
No beisbòl so, pero tur otro deporte. No bai ku bo konosementu. Frank tambe a duna mi konosementu i ora Frank no tei mas mi mester sigui aportá na desaroyo di e hóbennan.
Ami ta pasé over pa e muchanan, mi ta kue algun idea di Frank pone huntu ku esnan di mi pa mi pasé over.
Mi a siña hopi kos di yen di coach, coachnan di otro tim di Pariba manera Gordo van Zanten, Lando Chirino i otronan.
Un biaha mas, mi ta hopi kontentu di a drenta Little League i duna mi kontribushon.
Por último danki na tur ku a yudami den mi karera", Vernon 'Tripel A' Isabella ta terminá e entrevista.
FRANK CURIEL
Frank tambe a bisa algu, despues ku nos a entrevistá Vernon Isabella.
Frank: " Un di e mihó trahadónan ku mi tabatin di tur tempu, bon trahadó, bon konosementu, traha duru mes. Naturalmente e tin su kosnan kuné tin ora, pero esei ta tur hende."
Tur aña e ta klasifiká e timnan. E timnan di edat mas abou, esta Minor, Vruminga i Little ta su spesialidat. E ta traha masha bon mes ku nan. E ta un luchadó i un gai ku no ta huma ni bebe, un gai ehemplar. Mi ta orguyoso den tin e Vernon 'Tripel A' Isabella den mi organisashon."
No comments:
Post a Comment