Un hóben pelotero super ehemplar ku a skohe pa un Scholarship riba firma beisbòl profeshonal i ku a terminá su estudio aña pasá i destaká mesora engrande den Beisbòl Profeshonal ku su diploma den su man. Un entrevista basta ekstenso i ta saka for di edishon number 147 di Revista Deportivo Korsou.
CURT SMITH
Curt Sciene Smith a nase na Kòrsou 9 di sèptèmber 1986 i ta biba na Kòrsou na Weis Afo 460.
Curt a bai Jasinta Kleuterschool na Janwe, despues skol básiko na Sint Franciscus College na Janwe. Despues di skol básiko Curt a sigui pa Triniteit Mavo i mas despues di MAVO-4 pa Peter Stuyvesant College. Na 2004 Curt Smith a terminá su Havo -5 i haña Scholarship pa studia na Universidat di Maine.
Curt ta yu di Claudette Mourillon i Claudius Smith. Tata Claudius Smith tabata praktiká e deporte yudo i mama Claudette si no a hasi deporte. Curt su tionan, Norman 'Slobbo' Sloop i Percey 'Pim' Sloop si a hunga beisbòl i sòftbòl.
"Banda di mi kas aki semper tabatin hopi deportista manera primu di mi mama Eddie Sloop i tambe Van Gurp nan aki. For di chiki mi a kuminsá hunga beisbòl huntu ku nan", Curt Smith ta konta Revista Deportivo Kòrsou for di su kas na Weis Afo 460.
KOMIENSO
Curt:"Den kura di kas mi a kuminsá hunga beisbòl i mi tio Norman Sloop mihó konosí komo Slobbo
a hiba mi pa mi drenta tim serka Shon Ki Nicasia. Mi tabatin 9 aña i mi a partisipá na Pre-infantil ku e ekipo Marchena Hardware. Mi a hunga Pre-infantil un aña i sigui den Little League mesora mes un aña. E tempu ei no tabata Minor League ainda. Mi promé weganan kos tabata un tiki slou i despues mi a kuminsá bati te awe. Mi a bringa yudo promé ku beisbòl i tabata bai hopi bon mes. Mi a kansa di dje i mi a gana hopi medaya. Mi tabata trein yudo na Buurtcentrum Janwe serka un gai ku yama Kenneth Vinck."
Curt Smith na bate durante wega ku Universidat di Maine
SELEKSHON
"Mi a bai kasi tur selekshon ku eksepshon di un selekshon Junior League ku mi a keda afo. Mi no a bai ni pre-selekshon. E selekshon ku mi no a bai tabata e promé den Junior League. Nan no a manda mi ni pre-selekshon i mi a keda straño, pero mi a tuma e kos trankil. Siguiente aña mi a bini bèk i kai aden atrobe... trankil.
Ku beisbòl mi a bishitá paisnan manera Aruba, Pañama, Bahamas, Puerto Rico, Sint Maarten, Merka i Meksiko."
Curt Smith huntu ku su mama Claudette na nan kas na Weis Afo
KONTRINKANTE
"Un picher bon ku mi a enfrentá semper tabata Shairon 'Shai' Martis. For di chiki e tabata do-miná nos un tiki. For di Little League te ku Senior League, nos tabata gana Shai nan aki."
AÑA 2002
"E aña ku nos a gana e kam- pionato Mundial tabata un aña hopi bon pa nos, un aña importante.
2002 ora Jair Jurrjens tabata picha mi tabata hunga tersera base. Otro weganan mi tabata hunga den outfield, mi tabata picha tambe ora tin mester. Mi tabata echt un utility player pa mi tim.
E di dos aña mi rol tabata muchu mas aktivo, mi tabata picha i hunga tersera. Nos a gana Latino pero nos a kai chiki den semi-final."
PREMIONAN GRANDI
Curt: " Den little League no tabatin masha premio, bo no ta sa mes kasi ken a sali kampion bate ets, kampion picher ets. Den universidat si mi a sali All American mi promé aña, mi a sali Hungadó di Aña mi delaster aña, mi a kai den e Rookie Team, mi a sali All Regional Team. Mi a gana hopi premio si riba nivel di universidat."
LO MAKSIMO
"Lo máksimo pa mi ta e diploma di bachelor ki mi a risibí aña pasá. Hopi importante ta tambe e Hungadó di Aña den Rookie League aña pasá. Pa mi esei ta hopi importante ora nos ta papia di beisbòl. Sali Hungadó di Aña den Rookie League i gana e Mihó Hungadó di e Liga di mi skol atrobe.”
OTRO KOSNAN
"Ya ... mi ta riba mi kòmpiuter hopi òf pafó mes ta bati bala. E kosnan ei mi gusta hasi. Mi gusta koló blou.
Mi gusta kome kasi tur kos i e kuminda di kas ta smak muchu mas dushi ku esun na Merka aya. Ora mi bini Kòrsou ta kuminda di mi mama so mi ta kome kasi. Aya na Merka ta kan kan di Mac Donalds i Kentucky nan aki tin i ora mi bini Kòrsou mi ta probechá kome kuminda krioyo bai gol", e profeshonal Curt Smith ta konta Revista Deportivo Kòrsou ku un kara sonriente.
BON EKSPERENSIA
" Mi tabatin muchu mas eksperensia bon ku malu. Naturalmente ora mi pèrdè, òf dia nos a kai afó den semi-final den e Mundial Senior League di aña 2003.
Mi ta bisa un biaha mas ku mi tabatin hopi mas bon eksperensia. Dia nos a gana Pariba ku pa nos bai afo i nos a pèrdè despues pa regla nobo ku nan a kaba di bini kune den Little League i keda sin bai pafó. Esei tabata un mal eksperensia mes. Gana riba tereno i pèrdè riba papel i keda afó.
Un bon eksperensia tambe tabata un dia ku mi dal un homerun pa kaba wega kaminda nos tabata pèrdí te den último inning. Esei tabata mi di dos aña den Junior League. Nos tabata pèrdí 5-3 te den último chèns i mi a dal e homerun pa leftfield. Shon Ki a bisa ku te awe nan ta buska e bala," Curt ta sigui splika.
Curt Smith a akaba di konektá un homerun i ta risibí felisitashon di su kompañeronan na home plate.
PARTI FUERTE
"Mentalmente mi ta fuerte, semper mi ta pensa padilanti. Si bai malu mi ta bini fuerte bèk, purba kalma mi mes. Mi sa ki mi ke.
Bateo ta mi parti fuerte, bo tin ku ahustá konstantemente. Semper mi a bati bon i mi sa ku esei ta mi parti fuerte. Mi ta sintimi bon den kaha di bateo, mi sa kiko mi ta bai hasi eiden."
MENSAHE
"Pa e hóbennan for di deporte, loke bo ke, bai su tras i duna 100% na loke bo ke.
Den deporte bo tin ku bai serio, tuma training na serio.
Wak ami kon ku deporte nan a paga mi estudio pa mi i mi tin chèns awor di yega leu den profeshonal tambe, ke mèn deporte ta bon. Bo por yega leu si bo hasié serio."
FUTURO
"Hunga beisbòl so, mi ta bon di focus riba esei. Mi ta bai duru pa un dia mi logra mi soño pa hunga den Grandes Ligas.
Ora mi kaba di hunga beisbòl tambe mi tin e diploma pa mi por bai traha tambe si mi ke.
CURT NA MERKA
(SCHOLARSHIP)
Curt Smith: "Mi a hunga den e ekipo di Senior League ku a sali kampion Mundial na 2002, despues mi a bolbe bai na 2003 na mesun suidat Bangor Maine. Na 2003 nos a pèrdè den semi-final i einan e coach di e skol e temporada ei a wak mi hunga i e konosé Mike Kessoc (ex doño di Mac Donald na Kòrsou RED). Ela bel mi i ela puntra mi ku mi ta interesá di hunga pa skol i mi a aseptá. E asuntunan a bai hopi lihe di e kaso aki si. Mi a terminá mi HAVO-5 na Peter Stuyvesant tambe net e tempu ei.
Tabatin tim di Major League Baseball ku tabata papia ku mi pa firma pero e Full Scholarship aki mi no por a lage bai. Mi ta konsehá hóbennan tambe ku nan haña sufisiente sèn pa studia den un scholarship pa tuma e scholarship promé ku profeshonal.
Mi tabata hunga tersera base e promé aña, despues mi a bai shortstop, di tres aña shortstop plus tersera base i e último aña mi a hunga primera base dor ku no tabatin primera base i mi a purba hunga einan i ela bai hopi bon. Einan Cardinals tambe a wak mi hunga.
Mi ta preferá hunga tersera debí ku te einan mi a hunga semper i mi ta sintimi kómodo einan. Pero mi ta hunga primera tambe. E tin su kosnan: bo ta konstant den wega, hopi bala ta bin einan,
picher ta tira pabo konstant ora tin hende na base. Bin aden ku toke i ora nan bati riba bo, kue e bala i flip primera pa picher ku ta kore kubri ets. No ta hugadánan fásil.
Tin 'trikinan' hungando primera.Ta mi promé aña hungando primera pero e asuntunan ta bai bon si den defensa. Bateo manera tur hende sa ta OK.”
KOMBINASHON ESTUDIO KU BEISBOL
"Nan ta prepará bo bon pa esei manera bo yega. Bo tin ku organisá bo mes hopi bon. Nan ta pone tur kos bon kla pa bo ora di treining, ora di wega ets. Bo mes tambe mester hinka bo tempu bon den otro si. Nan ta tene nan mes na ora, ke mèn ora bo tin ku kaba bo a kaba. Bo ta wak kon bo ta hasi yena bo dia.
Pa loke ta un dia mes, ya tin dia lèsnan ta kuminsá mas lat. Tin dia skol ta kuminsá 8’or, bo ta lanta 7'or baña i kome ets. Tin dia bo ta kuminsá 11’or, bo ta lanta un tiki mas lat òf bo ta lanta tempran tòg i hasi bo lèsnan, ya atardi bo no tin muchu kos di hasi.
Training ta kuminsa 3'or di atardi i nos ta kaba 6’or pa 6.30’or. Esei ta tur dia. Wikent nos ta kuminsá un tiki mas tempran 10’or pa 11’or mas o menos.
Ora tin wega nos ta trein hopi duru 3 pa 4 dia promé ku e wega, despues dos dia promé ku wega nos ta bai mas suave, hopi batting practice, hopi swing.
Dia di wega mes nos ta yega vèlt dos ora i mei promé, bisti dos ora promé, nos ta kuminsá batting practice, un ora promé ' fielding practice' di infield, despues bai bisti otro paña atrobe (unifòrm di wega) strech atrobe pa kuminsá ku wega. Nos ta hunga 4 pa 5 biaha pa siman, ta basta wega pa siman", Curt splikando kon kos ta bai ku treining i estudio na Universidat.
"E añañan a bai basta vlòt. Den e promé aña mester a ahustá un tiki, pero despues kosnan a bai basta vlòt. Mi a pasa skol vap den 4 aña. Mi a kaba Bachelor den Bussiness Administration i spesialisá den Marketing.
Mi por a skohe pa bai traha òf bai profeshonal, naturalmente nan a konsehamí pa bai profeshonal debí ku mi no tin nada di pèrdè. Purba bo chèns wak kon ta bai i si e kos no traha, semper bo por bai bèk pa traha trankil e ora ei ku e estudio ku bo tin.
Te ainda e parti profeshonal ta bai bon, e sifranan ta bon, nan ta kontentu ku mi ets. Hopi tim di Grandes Ligas a kuminsá bèl mi hasta promé ku draft, Cardenales a skohemi dje lat ei.
Mi no a tende mi nòmber den e draft, den e draft (e skohementu di hungadó) tin yen di kos tambe.
Tin hungadónan ku bo ta sigur ku bo ta muchu mas mihó ku nan ta kai den ròntnan mas promé. Ya, e draft tin su kosnan kuné. Mi a kai den di 29 rònt, te den kabamentu, tin 52 ront.
E coachnan di Cardenales di Sint Louis ta puntra
dikon mi no kai den ròntnan mas promé.
E promé pick den e promé rònt tabata Timothy 'Tim' Beckham ku a bai Tampa Bay Devil Rays."
SINT LOUIS CARDINALS
"Despues ku Sint Louis Cardinals a skohe mi, di mes mi a start un karera profeshonal. Un kontrakt normal i nan ta duna bo 5 aña. Mi a kuminsá den Rookie League, e first pick first round ta hasi diferensia, pero esun ku kaba e universidat lastu aña no ta hasi diferensia, lastu rònt pa lastu aña no ta hasi diferensia.
Si bo no a kaba skol ainda, nan ta stroba bo di kaba skol pa firma. Bo ta bai negoshá ku nan mas pisá e ora ei.
E añanan promé mi a haña hopi tim pa papia ku mi pero mi a skohe pa kaba mi skol promé. Den último aña bo ta haña kasi mesun kontrakt ku tur hende.
E di tres aña mi a haña masha hopi oferta mes, masha hopi tim a papia ku mi, pero mi a preferá di kaba skol.
Den Rookie League ku Cardinals mi a haña algun gai mas yòng ku mi i algun gai mas grandi ku mi tambe.
Mayoria gai den mi edat pero tin algun gai di High School i algun gai firmá di Repúblika Dominikana. Gainan Latino semper ta mas yòng, gainan di High School ku 18 pa 19 aña.
Un gai di mi skol a wòrdu di draft, e tabata den su di tres aña i ela disidí di kaba su skol.
E kambio di College Baseball pa profeshonal Rookie League mi a ripará mesora, e picheo di Rookie League ta mas fuerte.
Na College bo ta haña timnan ku no ta dje bon ei, pero na profeshonal den Rookie League bo ta mira bon picheo tur dia.
Esei a yuda mi hopi tòg. Mi a bai bon ku bati di palu. Den zomer mi a hunga den algun liga ku tin bate di palu so, ke mèn mi a kustumbrá.
Rookie League mi a kuminsá dia 18 di yüni i mi a kaba dia 2 di sèptèmber 2008. Mi ke mèn Rookie League i Klase A. Mi a subi klase A dia 26 ougùstùs.
Mi a kaba Rookie League ku un averahe di .378, mi a dal 8 homerun den 40 i algu wega.
Nan no tabata kere ku mi por a bati dje tantu ei, mi no por a hunga mesora, mi tabatin problema ku visa i mi a pèrdè e promé dos simannan.
Mi a hunga primera base tur dia. Nan a keda hopi sorprendí, no ta fásil pa bati .378 den e profeshonal. Mi a bati 4 homerun den e promé kuater weganan. Tur hende tabata sorprendí i nan a kere ku mi no por keda mantené e trènt ei.
Mi a hunga primera base tur dia. Di mes e salida ei nan a kuminsá picha difísil i mi a ahustá bati pa hit. I mi a bati 4 homerun mas den mi sobra temporada den Rookie League i kaba ku 8 homerun.
Despues di klase A mi a hunga den Midwest League i kaba ku averahe di .244 den 45 turno. Mi a dal e bala bon fuertisimo pero e gainan tabata bon pará riba tereno, e averahe por gañabo. E ponchenan tambe ta normal pa un bon batiadó.
Mi ta spera di kuminsá e klase A di aña pasá òf e klase A haltu. Mi ta spera di kaba den Dòbel A e aña aki. Mi a kai den e tòp 30 prospektonan. Mi tabata number 25 den e prospektonan. Mi ta usa mi chèns pa yega Grandes Ligas, esei semper tabata mi soño i e trainingnan di Kòrsou a bai hopi bon huntu ku Hensley. E klinikanan tambe a bai bon," Curt Smith kontando su último aña na Universidat i pase pa profeshonal.
SIFRANAN NA UNIVERSIDAT
"Mi a yega na ougùstùs 2004. Weganan a kuminsá na mart 2005. E promé dianan no a bai dje bon ei, mi tabata un poko nervioso i hopi leu for di kas, mi a kuminsá na tersera base.
Mi a kustumbrá hopi lihe i kaba ku averahe di .348 ku 3 homerun i 38 empuhá den 52 wega i anotá 35 kareda.
2006 mi a terminá ku ave-rahe di .390 ku 5 homerun i e aña ei riba 50 RBI.
Tur aña mi tabata den e lidernan di mi tim.
Den mi promé aña mi tabata number dos i un gai ku tabatin 4 aña den e tim a kaba mas o menos 5 punto riba mi. Den e di dos aña mi tabata mas haltu ku tur hende, di tres aña mi tabata di dos lugá i lastu aña di tres lugá.
2007 mi a kaba .351 ku 48 RBI, ku 8 homerun. Nan ta pensa ku tabata un downseason pa mi, nan ta kere ku mi por a bati muchu mas haltu.
For di chiki mi tabata bati si, semper mi a bati, mi ta ataká e bala fuerte semper, hopi agresivo na bate. E bala bon tin ku dal, anto fuerte.
2008 mi a kaba ku averahe di .403 ku 11 homerun i 38 kareda empuhá. Semper mi a bati terser òf kuarto bate den mi tim di skol.
Temporada 2008 a kaba den mei, College ta hunga den mart. Tin algun ku ta kuminsá den febrüari pero tur ta kaba den mei. Si bo bai play-off i yega World Series di College bo por kaba te yüni. 2008 so mi skol no a klasifiká, pero e otro tres añanan si nos a klasifiká.
2005 i 2006 nos a avansá pa e NCAA (National Colleggiate Athletic Association RED) regio-nals, pero nos a kai afó einan." Curt Smith ta konta di su sifranan ku smak.
COLLEGE BASEBALL
"Tin 32 diferente Conference, kada Conference (Pul) tin nan ekiponan. Tin Conference ku tin 16 tim, otronan tin 12, 8 òf 6 tim i e ganadó di kada Conference ta avansá.
Tin algun konferensia dje grandi i dje bon ei ku dos òf tres tim di un skol ta bai. Ta masha hopi tim mes tin den College Baseball.
Tin riba 300 tim, divishon 1 tin ku ta kompetí. Masha difísil pa avansá espesialmente nos ku ta Noord i no por trein masha. Debí na e frieu nos tin ku trein paden. Tòg mi ta haña ku nos a yega hopi leu 2005 i 2006.
Mi ta kòrda ora mi a kuminsá hunga na Maine ougùstùs i sèptèmber tabata kalor meskos ku Kòrsou, un tiki mas frieu anochi. Novèmber a kuminsá bira frieu, sneeuw a kuminsá kai ets. A bira -10 Farenheit ku ta _20 piku graden Celsius den e karedanan ei nèt promé mi bini Kòrsou e aña ei.
E aña aki ela yega mas o menos -50 graden Celsius. Tur hende ta para ketu keda kas.
Timnan ta skout meskos ku timnan di Grandes Ligas. Tin ta hasta kompetí ku timnan di Grandes Ligas den kaso ku mester firma un hungadó hóben i nan tambe ke e hungadó den College. Por ehèmpel e tim di Grandes Ligas ke firma e hungadó for di High School i e ekipo di Universidat (College) tambe ke e bon hungadó ei, nan ta duna e hungadó un scholarship ku insentivo ets", e ehemplar i talentoso pelotero profeshonal ta splika un ke otro di College Baseball"
MAMA DI CURT
Na final di e entrevista nos a entrevistá mama di Curt ku tabata klave den e eskohensia di skol riba firma profeshonal na aña 2003/2004.
Sra. Claudette Mourillon:
"E muchañan mester skucha nan mayornan. Komo mama bo tin ku splika e yu e ventaha i e desventahanan di tur kos. Den e kaso di Curt, e tabata kier a bai den direkshon di firmamentu mesora. Tur e muchañan kua hunga bala kuné tambe tur a firma. Pero ora mi a papia kuné i spliké kiko e kos ta i e oportunidat ku ela haña e mester a tuma, hasta un skout a bisa, ku Curt no por ninga loke e skol a duna.
Hopi Merikano mes tabata ke e kos ei, esta e Scholarship ei. No ta fásil. Si Curt por mi ta kere ku mas por. Bo por bai via Junior College tambe , dependé kon bo puntonan ta. Curt a habri kaminda pa otronan, esei tambe ta great. Ora mi a bai Merka tur hende ke konose mama di Curt.
Nan a bisa ku mi a hasi un bon trabou dor di konvensé Curt pa studia promè, kaba firma un kontrakt.
E skol ta 25 mil dollar pa aña, konta kuminda esei ta bira kasi 30 mil dollar pa aña i si konta den 4 aña ke men 120 mil dollar Curt a skapa di estudio.
Mi kier a gradisí Mike Kessoc tambe, nos ta hopi gradesido na dje. Ela hasi un tremendo trabou pa pone e kontaktonan. E tambe ta hopi kontentu ku Curt a saka su kara tambe. E tin hopi kontakto. Nos no por paga e suma ei. Si elo a bai pa firma e lo no a haña e sèn ei tampoko. Niun no a ofresé e sèn ei. Ku e diploma aworaki ku release ets. e ta keda ku su diploma den su man."
No comments:
Post a Comment