Ku tremendo relevo di Mayron Wijman, Buena Vista Power a gana Swift 13-12 djadumingu

WILLEMSTAD - Buena Vista Power sin Naai Hooi, sin Nonnie de Roon a gana Swift ku skor di 13-12 ayera na Suvek Ballpark.
Mayron Wijman a drenta di relevo pa Sherman Cras ku a bai filea na primera i dominá e ekipo di Swift relativamente fásil.

Swift tabata dilanti 12-8, pero riba un trankil Buena Vista Power ta aserká pa bòltu e skor. Gilbert ‘Gibi’ Juliet tabatin homerun feros di dos kareda den último inning. Skippy Sambo ta kore di primera te home riba doblete di Senny Petronella.
Swift (home-team) atras 13-12 den último inning ta embasá Jair Josepha i Dave Kirindongo riba base por bola. E siguiente tres batiadó -nan Julien Ignacio, Djurick Pieters i Jurgen Krondstadt ta faya ku flai den outfield pa terminá e wega.