Curtney, “Curtje” Doran a firma ku Boston Red Sox

WILLEMSTAD - Sr. Antonio, "Toncha" Simmons, èks-pelotero, dirigente di beisbòl di mucha i edukadó ta tambe skout di beisbòl den representashon di e organisashon di Boston Red Sox. "Toncha" tin algun tempu kaba scout di e organisashon ya ku hasta ela bai Serie Mundial riba invitashon di e tim di Boston dos aña pasá.

Den e dianan ku a pasa "Toncha" komo scout a firma su promé pelotero aki na Kòrsou ora ku e tim di Boston a firma Curtney, "Curtje" Doran. "Curtje" Doran ta yu di e konosido "Chado" Obispo i sra. Pòpi Doran, ku ta èks sòftbòlista di e tim di Blue Angels.
"Curtje" ku ta hunga outfield, tersera/base i pitcher a firma ku e tim di Boston primeramente komo outfielder, asina su tata sr. Richard, "Chado" Obispo a bisa Softballcuracao.com.
"Curtje' ta entre e hungadónan di Little League ku den representashon di Liga Pabou a hunga den varios kampionato Mun-dial. Doran a hunga dos Mundial di Little League, tambe Mundial di Senior League, na Bangor, Maine e aña ku a pasa.
"Curtje" su parti fuerte ta un tremendo brasa ku e ta poseé. Tambe e tin poder okashonal na bate i lo por bati pa averahe.
Den kombersashon ku Softballcuracao.com, "Chado" Obispo a bisa ku "Curtje" a haña garantia di e hendenan di Boston ku den e promé aña elo hunga regular den outfield.
"Curtje tin tremendo brasa", "Chado" ta bisa. E mes ta kere ku si "Curtje" haña chèns di hunga regular ku elo por bati tambe.
"Chado" Obispo a splika nos ku "Curtje" a hasi try-out ku varios ekipo i ku tabatin varios ekipo di Grandes Ligas ku tabata hopi serka di firma "Curtje".


Finalmente nan a tuma e desishon di firma finalmente ku e organisashon di Boston Red Sox.
"Curtje" kisas meskos ku su ruman Raynard Doran lo por wòrdu konvertí den pitcher despues, "Chado" ta splika.
"Curtje" ta bira e di dos yu di "Chado" i "Pòpi" ku ta firma. Raynard e ruman mayo a firma ku e orga-nisashon di Minnesota Twins. Despues di hunga dos aña na Santo Domingo Raynard lo bai e aña aki springtraining di Liga Menor na Florida ku e tim di Twins.
Ta e intenshon pa "Curtje" ku a firma kontrakt siman pasá ku e tim di Boston Red Sox move pa Santo Domingo kaminda elo bai pa ofisialmente kuminsá ku su preparashonnan ko-mo pelotero profeshonal.
Softballcuracao.com ta felisitá Curtney, "Curtje" Doran i naturalmente tambe nos amigu Richard, "Chado" Obispo i sra. "Pòpi". Nos deseo ta pa e soño di "Curtje" keda kumpli, esta di un dia por hunga beisbòl di Grandes Ligas.