Sera konosí ku Gustaaf ‘Taffy’ De Jongh

Taffy De Jongh un persona ku tur hende konosé den deporte na Kòrsou, deportista, dirigente tékniko, periodista deportivo tantu na radio komo den korant, relashonista públiko di Fundashon Sedreko,
Taffy de Jongh tin un trayektoria basta largu den deporte komo deportista i e último trinta piku añanan komo dirigente deportivo.
Taffy tin mas ku 34 aña den Sòftbòl di Kòrsou i Antia. Den e sekshon aki Softballcuracao.com lo laga abo lesadó sera konosí ku Taffy de Jongh.

TAFFY
Gustavo Enrico Martin de Jongh a nase na Kòrsou 25 di ougùstùs 1955 i ta biba na Laguinillasweg 6 (Monte Carmelo).
Taffy ta yu di Gustaaf de Jongh sr. (QEPD) i Gloria De Jongh (QEPD). Taffy tin un ruman muhé ku yama Giana i Taffy ta kasa ku Murielle Avastia i tin dos yu, Glorianne i Gustavo (Gustavito) de Jongh. Taffy su abuelo tambe yama Gustavo.
Taffy ta traha na Sedreko komo relashonista Públiko i entrenadó deportivo. Fuera di e trabou na Sedreko Taffy ta traha komo part-timer na Korant Nobo i Radio Hoyer.
Taffy su tata defuntu Gustaaf a praktiká deporte di peso i tiru.
Taffy: “Mi tata tabata masha hopi tempu di Federashon di Weightlifting, e tabata un di e fundadó nan di Sithoc, for di aña 1942 huntu ku Frater Andreas, despues mi tata a tira i tabata hopi aña kampion di Kòrsou ela afiliá na Komite Olimpiko Internashonal.
Un famia hopi deportivo mi tio Marcel Betrian ruman di mama, ta un entrenadó di peso di hopi aña.
For di chikí mi tabata bai Otrabanda mira treiningnan di tiru na Stadion di Rif, KSC hisamentu di peso beisbòl ets.
Mi a biba semper akinan, na Monte Carmelo mi a komprondé ku na chikí nos tabata biba na Domi Abou (Ojedastraat). Segun mi for di 4 pa 5 aña nos a bini kaminda mi ta biba aworakí.
Mi tata nunka no a hunga beisbòl, e no tabata gusta beisbòl ‘att all’ su deporte preferí tabata peso komo dirigente, e no a trein peso hopi, komo deportista ela praktiká tiru hopi. Mi mes a partisipá na un kompetensia internashonal di tiru, mi tata kier a hinka mi den tiru, pero mi no tabata gusta muchu. Mi a kompetí den trapshooting na Aruba, pero ya e deporte no ta atrae mi, e ta un deporte di hopi konsentrashon, hopi dedikashon otro, mas stail ta mas aktivo mi ta gusta move mas tantu.
Mi tata tambe tabata hopi aktivo komo redaktor deportivo ela traha pa hopi aña pa diferente korant Amigoe, Beurs en Nieuwsberichten na La Prensa i ela skibi buki tambe de Zwarte Makamba.
Mi señora Murielle ta move den Sòftbòl ta ahinda aktivo, mi ta hopi kontentu ku esei Mi ta kontentu ku ela mantené un salu ku te ahinda e ta moviendo.
Mi yu muhé mas grandi Glorianne ta move den Sòftbòl Senior League ku e ekipo di Buena Vista, E tabata den karate Kushinkai serka Henry Gougon i e tin blackbelt. Ela kuminsá ku karate na chikí. Mi no tabata dje interesá ei pa e hunga sòftbòl mi tabata ke pa e praktiká karate i bai Padvinderij. Poko poko ela kuminsá bai vèlt mi tabata e impreshon ku e no tabata gusta masha hopi pero el gusta i pero ahinda e ta den.
Mi a ripara ku ela haña mas smak último lunanan debí ku ora ami ku Gustavito ta trein tira bala ets e ta djòin nos. Esei ta un bon señal, mi ke pone bon kla ku mi no ke forsa mi yunan hasi niun deporte pasombra ami ta hasi deporte. Mi ke pa nan hasi nan bèst na skol i respetá hende esei semper mi a pone padilanti.”

KOMIENSO DEPORTE
“Straño ku ta parse mi a kuminsá hunga futbòl na Asiento serka dr. David ku 6 pa 7 aña. Ku 11,12 aña nos a kuminsá hunga bala banda di kas, mi ke men fangu den hanchi di kas i ku 14 aña mi a drenta un tim.
Nos a lanta un tim ku defuntu Ernst Smith, ami Cecil Garcia, Zef Flemming, Herbert Bulo, Lucien Oehlers, Chape Berardus, Henry Bernardus, i hopi di e muchanan di bario. Mi ta kòrda kla mi tabata mas chikí den nan, Cecil nan aki tur ta pasami mas o ménos 5 aña.
Mi a hunga den rightfield ku 14 aña mas yòn den e tim, bati di sinku bate. E tim tabata yama Superstrike, Super Shell a kibra, Lucky Strike tambe a kibra i nos a disidí di yama e tim Superstrike. Esei tabata mas o ménos aña 69 pa 70. Despues e tim a keda un par di aña, nos a hunga un par di aña abou. Mi a bai hunga 3 aña den e ekipo ei, pa despues bai hunga den Groot Kwartier Stars ku 17 aña den Dòbel A.
Den mi promé aña ku 17 aña mi a kai den selekshon di Kòrsou huntu ku defuntu Willie Pietersz, Henry Jones, Raffy Josefa i e otro mihó hungadónan di Kòrsou. Mi tabatin un gran aña ku Groot Kwartier e aña ei.
Lamentablemente problema ku brasa a pone ku mi mester stòp ku beisbòl.Mi a kuminsá traha anochi ku korant Extra, dia Extra a lanta. Korant ta sera te mardugá bo ta kai for di e drive. Mi a bai dòkter ku mi brasa na New York, i e dòkternan a konsehami ku... si bo no ta gana muchu plaka ku e beisbòl no ta bale pena forsa muchu. Mi a komprendé ku e brasa no tabata muchu bon mas.
Un di e deportenan ku semper mi a gusta ta bòkseo, kada bes ku mi haña un chèns mi ta trein i move un tiki. Mi a yega di trein ku Vicente Piña, Baba Quammi, Samucu, mi tin saku den kura. Mi gusta e deporte ei mes, i antes mi grandinan no tabata gusta e kos ei muchu. Mi a trein e deporte ei hopi aña”, Taffy ta konta Softballcuracao.com for di balkon di su kas na Laguilinaswega 6 na Monte Carmelo.
Taffy: “Sòftbòl tambe mi a hunga, Sòftbòl Fastpitch, den Rising Trotters, sigur tres pa kuater aña mi a trein e tim di Rising Trotters. Lucien Oehlers, Jo Peters, Andre Chance, Gigi Hooi, Payo Hooi, Chape Bernardus, Herny Bernardus, Herbert Bulo, Nelson Guitierez, mesun gainan di e tim Super Strike mas o ménos. Cecil Garcia si no a bai.
Mi ta kòrda kla mi tabatin ménos ku 14 aña i mi a para den right kontra Los Astros. Mi a para den right pa kompletá.”

IMPRESHONANTE
“Bon un hende ku tabata impreshonante sigur tempu di mi tempu tabata Antonio Keller pa loke ta trata beisbòl. Mi tabata gusta e beisbòl hopi mes tambe, e beisbòl di ántes. Ami ku Keller a bai skol huntu nos a hunga den selekshon di skol. Ami ku Keller tabata masha bon amigu nos a bai Aruba huntu ku selekshon di skol. Nos tabata bon amigu for di chikí pa kolmo dia mi a bira manager di Wild Cats ta Keller tabata picher estelar.
Te awe nos ta masha sera ku otro. Keller tabata segun mi, un kombinashon di picher ku batiadó e gai aki por a kambia henter un kampionato pa bo. Keller tabata bati masha bon mes, pa poder.
Ya.. ken mas mi por bisa, Andres Jones tabata kore hopi, bon hungadó ,Raffy Josefa hopi poder. Mi tabata gusta Pete Rose mes pa su forma di hustle den e wega. Mi tabata gusta Pete Rose su stail pa loke ta beisbòl internashonal.
Aki na Kòrsou mi tabata fanátiko di hopi hungadó i algun entrenadó mas.
Den mi promé aña mi ta kòrda mi tabatin un racha di 9 inning sin permití hit den relevo. Mi a yega di habri wega kontra Royal Scorpions laga e wega ganá 7-5, Raffy a dal mi dos homerun, Willy a dal mi un homerun. Mi tabata poncha hopi batiadó, mi no tabata tira kurva praktikamente mi tabata poncha hopi batiado riba rekta, mi tabata tira rekta so, dor di esei Willy i Raffynan aki si tabata dal mi bon pero e otronan mi tabata poncha.
Glenn Felida tabata un batiadó tambe ku tabata dal mi bon”, Gustaaf ‘Taffy’ De Jongh ta sigui konta Softballcuracao.com.

BRASA
Taffy: “E brasa a daña pasobra ántes no tabata masha konosementu. Si mi tabata e konosementu ku mi tin awe 30 pa 40 aña pasa mi brasa lo no a daña.No tabatin pone mentu di eis, no tabata asuntu di strèch. Kontrali nan tabata bisa si bo brasa ta morde bo tin ku tira riba dje, ta mimu bo ta. Nan no tabata lesa hopi. Bo tabata tira awe tira mayan, bo ta tira ketu bai.
Nan no tabata lesa hopi, nan no tabata konta bala, bo ta bin trein nan ta pone bo tira. Wèl tabatin gainan manera Richard Moesker, ta gainan brasa di oro ku si a keda ku e bon brasa. Gainan ku a tira inkreibel hopi. Nos tabata tira muchu hopi i sin muchu konosementu. No tabatin beisbòl na televishon manera tin awor aki pa bo por tende kosnan bon. Asuntu di tira kada 4 pa 5 dia no tabata eksistí na Kòrsou. Si bo brasa ta morde ta mimu, bo tin ku tira pa bo bira hòmber.”

PROFESHONAL
“Sigur mi a pensa riba e kos ei tempu di mi tempu. Un biaha un tim de Merka di Springfield College a bini Kòrsou i mi a tira di relevo mi ta kòrda kla kla.
Robert Cuales tabata sekretario di CBA e tempu ei, Nan a puntra ki posibilidat tin ku mi por bai skol na Merka i hunga beisbòl. Mi a tira masha bon mes kontra e selekshon e dia ei. Komo mucha semper ta bo soño esei, mi no a tende nada mas di e kos ei ya... .
For di mi 15 aña mi a haña di regalo un buki di beisbol di regalo serka mi tata.
Un buki yama ‘How to Play Baseball di Walter Alston’. Ami huntu ku Cecil Garcia tabata sigui beisbòl hopi di aserka. Nos tabata sigi beisbòl di Venezuela, Cecil tabata mener di skol i ta bon den Ingles i a tabata lesa su kosnan. Nos tabata hunga beisbòl ku dow Cecil tabata tene tur sifra. Nos tabata spar karchi di beisbòl for di tempu di Mickey Mantle, Harom Killebrew, Bob Gibson, Juan Marichal, Carl Yazstremski i otronan.
Nos tabata skucha transmishon di Beisbòl Profeshonal Venesolano den bos di Misiu Le Cavalerie i Bon Cannel di Grandes Ligas na radio.”





PREMIO
“Komo deportista mi no a gana premio, no muchu kos, highlight tabata ku 17 aña den selekshon di Beibòl Dobel A i kompetí kontra Aruba. Mi no a picha hopi tempu. Mi no ta konsiderá mi mes komo deportista un gran kos, debí ku mi a hunga i mi a picha muchu kòrtiku. No ta kos di konta masha kos, komo deportista, e biaha di Aruba komo picher di selekshon di Kòrsou pa mi ta esei ta tur kos.
Komo dirigente si tabatin hopi premio ya.... esei tabata mas eksitoso.”

HOBI I OTRO KOSNAN
“Mi hòbi... ya ta deporte no, tambe kombersá dal un serbes”, Taffy ta sigui kontra bou di harimentu.
“Mi ta gusta deporte, mi famia ta hopi den deporte. E skibimentu den korant, e papiamentu na radio. Bo ta haña un sèn ku n’e, pero realmente mi gusta eseinan tambe, ta mi hòbi.
Mi ta gusta hopi mes. Semper mi a traha na Nobo, mi por a lanta korant riba mi mes pero mi ta bai kompetí ku korant Nobo kaminda mi tin hopi aña ta skibi. Ta prinsipionan ku mi no a laga kai.
Awor aki mi no tin tantu deseo mas pa logra muchu kos pero energia bai tereno tur dia.
Loke mi gusta kome ? Mi gusta kome bonchi, bonchi kòrá yambo, mi gusta sòpi, mi mes no ta kushina masha kos pero mi ta kushina sòpi si i mi gusta sòpi mes. Mi gusta guiambo i sòpi mondongo. Nada di ‘Fastfood’, mi haña un Chickenburger mi ta dal’é pero no ku mi ta masha amante.
Mi gusta kolo kòra i kolo blou pero,... kòrá mas tantu, e nestor pa loke ta trata redakshon deportivo na Kòrsou i Antia ta sigui splika Softballcuracao.com

MAL ESKPERENSIA
“Mal eksperensia por ta e brasa, pero mi no tin ‘hard feelings’ pa e kos ei. Nan ta bisa “no hay mal que por bien no venga’. E asuntu di e brasa ei por ta asina e mester a bai. Ela bai asina pa mihó tambe. Komo tékniko mi a kontribuí mas na mi komunidat, na hobennan, na peloteronan, na sòftbolista. Komo tékniko a bai mas mihó ke men e asuntu di brasa ei. Miéntras Dios duna mi bida i salu, mi tei, si mi ta malu mi no por hasi e kosnan ei.”

MENSAHE
Taffy: “Mi ta bisa asina aki, ora bo ta hasi deporte, si kos bai bon òf malu ban pa mayan. Buska moda di hasi mihó mayan. Kada dia di nobo traha duru. Mi sistema ta, mi no ta warda kasi nada, mi tabata tin masha hopi kopa ku mi no sa unda nan ta, mi no tin dato di mi logronan.
Bo saka un bon korant awe, mayan bo tin ku traha duru pa bo saka un mihó korant mayan. Bo a saka un bon revista awe, otro biaha bo tin ku sòru pa saka un mihó revista.
Tékniko hasi bo bèst tur dia, abo ta den servisio di e deportista. Ami ta bai vèlt tur dia. Ami no tin selekshon, mi ta trein tur selekshon, ayera un hóben den selekshon, Lenis a bisa mi pa mi bati poko rolling i flai pe. Mi ta bai hasié. Mi ta sinti mi hopi orguyoso si mi aportá i e hungadó bai bon. Si mi tin ku lanta 5’or di mardugá pa mi yuda e deportista mi ta hasié.”


DIRIGENTE TEKNIKO
“Laga mi bisa bo asina aki. For di skol mi tabata bai Ignatius College, meneer Leue tabata bai ku nos, pero ta mi tabata e lider. Ta mi tabata sa di sòftbòl.
Mi tabata huntu ku Bazjot Godfired, Antonio Keller ets. tur ta den klas, ta mi tabata e lider. Peter Stuyvestant meskos ta mi tabata e lider, Mi ta traha line-up hasi tur kos, ta mi tabata trein e muchanan.
Na 1972/73 mi a konose Zenaida Geerman. Zenaida a bisa mi ku nan tin un tim na Buena Vista ei i ku mi ke trein e muchanan. Mi tabata treinnan na skol tambe. Na desèmber di aña 73 ofishalmente, ami ku Chape (Taffy ta referí na Chape Bernardus naturalmente; RED). Mi di no laga nos pasa Buena Vista tira un bista riba e galiñanan ei promé ku nos bai Punda.
Nos bati bala duna e muchanan algu di gemnastik, mi tabatin 18 aña. Te ku dia di awe.
Pichingolo a lanta kaba tempu mi a drenta, Pichingolo a lanta na mei 73.
I ami a yega na desèmber 1973. Mi ta kòrda dia mi a subi vèlt ku unifòrm di Pichingolo pa promé biaha, Pichingolo tabatin rekòrt di 0 ganá i 6 pèrdí. Nos kaba kampionato ku 3 gana i 9 pèrdí. I siguiente aña e tim a bai klas A. E seisnan di mas ariba a bai dòbel A i e Pichingolo a keda den klas A. Tabatin un aña manera kos ku no tabatin kampionato promé i nan a organisá un kampionato pa kuminsá ku klas A i dobel A den 1974.
Ku 21 aña mi a bira manager di Wild Cats, i bira kampion. Mi ta kòrda kla na 1976 mi a sali kampion na Salvador ku selekshon femenino di Sòftbòl Sentro Americano i Del Caribe. Sam Bunting tabata manager di e selekshon i ami tabata coach di tersera. Clovis Lodwijs a gosa mi desempeño.
Clovis Lodewijs a aserka mi pa mi bira manager di Wild Cats. Mi a pensa ku ta Wild Cats hubenil. Clovis di ku mi Wild Cats dòbel A. Bo mes sa kon beisbòl tabata e tempu ei ku Willie Pietersznan aki tur i tur e streanan ei. Nos a yena stadion di Rif, yena stadion hasta ora di Spring Training, Torneo Tio Daou.
Wild Cats tabatin bon tim, pero ya bon tim tin ku trein si no bo no ta gana, mi tabata coach Sòftbòl di mucha muhé tambe e tempu ei naturalmente.
Den Wild Cats mi tabatin hungadónan manera Wenny Jacoba, Johnny Alberto, Cedric Kirindongo, Ushley Kirindongo, Richenel Daal, Glenn Felida, Lesley Welvaart, Johnny Alberto, Ashley Winklaar, Arie den Hartog, Payo Hooi, Melvin Thomas, Ronald Thomas, Antonio Keller, sigur bon tempu.
Mi a keda un aña so, tabatin algun kos ku mi no kier a bai den detaye. Bon tempu !!! Despues mi a tuma Blue Hawks pa 4 aña i keda 4 aña den bòm. Hopi mucha yòn, i timnan grandi tabata kue tur e mucha yònnan bai ku né. Bo no tabatin sèn pa kompetí. Mi a bai despues nan a buska mi bek.
Mi ta kòrda hungadónan manera Dino Anasagsti, Desmond Braithwaithe, Payo Faneyte, Kenneth Mongen, Floyd Garnette.
Nunka mi no a pensa di ta un tékniko profeshonal. Mi tin masha hopi buki mi ta aki algun karta (si karta ku algun moveshon ets. di picher) ku mi ta siña masha hopi for di dje. Mi ta traha preguntanan ‘multiple choice’ pa muchanan. Mi ta gusta e kos mi ta lesa hopi buki, pa mi ta altanto di e wega.


PICHINGOLO
“Na 1974 Pichingolo a bai klase A i sali kampion. Na 1975 Pichingolo a subi Dòbel A i sali kampion di Kòrsou. Di einan a keda bira kampion 10 aña sigui nos a pèrdè e kampionato na 1986 ku Cardenales i na 1992 ku Blue Angels i sobra añanan tur ta kampion. Ke men for di aña 1975 te ku awor ke men 30 pa 31 aña mas o ménos, dos aña so nos no a bira kampion.
Tabatin aña ku nos a sali kampion i sup-kampion pareu, Pichimgolo Kia i Pihcingolo Nissan, segun mi ta dos biaha esei a sosodé.
Mi ke menshona si ku e éskitonan aki mi no por logra nan mi so, e tim ku ta mi tras konsistiendo di Chape Bernardus, Cecil Garcia, semper e tei or abo mester di algu, Reynold Bloem ku no ta aktivo pero si bo mester di un fabor, un hòmber di kontakto, tal i tal kos ku mester bai hasi, den tim di mucha muhé no ta tur kos ta kos di papia. Último añanan Ralph Pereira, inkansabel. E tin mas energia ku mi mes, Ralph ta inkansabel mes. Bo ta konfrontá ku basta pida pida kos durante e añanan. Nos tabata buska mucha te na Fuik pa bin trein i hiba bek ora di wega tambe. Sin e gainan ei i sin e kontribushon di e hungadónan nos lo no a logra e kampionatonan impreshonante
Nos a logra hopi hopi, for di 75 te ku awor 2005/2006 ta dos biaha so nos a pèrdè. Ta impreshonante. Xaverianen i Sithoc tambe tabatin algun rekòrt pero esaki ta leu i ta impreshonante.
Mi a bira manager na 1974 di Pichingolo promé ku esei mi tabata coach i Regulo Montero tabata manager. Despues di un par di tempu ku mi a drenta mi a bira manager, segun mi 74/75 nan ei bo mes sa Regulo tabata si pida pida kosnan ei i Angel Keep a apuntá mi komo manager”, Taffy a bisa sonriente ora ela referi na Regulo su pida kosnan.

SELEKSHON
Taffy: “1976 den selekshon di sòftbòl mi tabata coach. Sam Bunting tabata tin su edat e tempu ei kaba. Sam a duna mi man liber pa traha i kosnan a kana bon i nos a bira kampion na aña 1976 na El Salvador. Mi a bira manager di selekshon aña 1978, Mi a bai ku Hubenil i bira kampion na Bahamas ku Hubenil.Nos a gana medaya di bròns i di plata Sentro Amerikano i Del Caribe, Nos Sali sup-kampion Panamericano ku Hubenil nos a Sali di kuater na Bahamas Panamericano ku 14 pa 16 klup entrenan Merka.
Nos Sòftbòl tin un historial inkreibel, nos a yega di pèrdè1-0 ku Merka na Indianapolis. No selekshon chikí di Merka pero un selekshon ku e mihó hungadónan di Merka.
Nos a bai masha hopi pais ku Sòftbòl Hapon Italia, Brasil, Canada, Peru, Merka, Hulanda no tin lugá ku tin sòftbòl ku nos no a bai. Te ku 97 nos tabata hunga bon sòftbòl. Nos tabata laga di sali kampion pero nos tabata duna bon wega. Awor aki nos sòftbòl di hende grandi kompetitivo a kai un tiki.
Bo ta bai Panamericano, yena stadion, hunga kontra Italia yena stadion. Yena stadion kontra Merka na Merka pero despues Merka ta pone preshon, despues di mas o menos 5 inning gana nos ya.. Merka ta Merka.”

ORGUYOSO
“Mi no ta gusta e asuntu di homenahe. ets. Mi ta kontentu ku mi por trein mucha, mi ta kontentu ku nan ta sigui mi na radio.
Ora e mucha ta bisa mi coach bon treinen, ki dia nos ta trein atrobe. Mi ta trein Rozelyn bon pa e bai Hulanda e ta yama bisami kon bon a bai na Hulanda, yama bisami ku wega a bai bon bisami danki pa e treinen.
Mi ta haña great ora un hende bisa mi e ta skuchami, no ta ami so ke men Radio Hoyer, Deporte Nobo, pero Z-86 tambe a hasi hopi pa deporte, La Prensa ta kompetí ku Nobo, Vigilante a bira bon ku nan deporte den mainta, Nobo a hisa su kantidat di página di deporte.
Mi ta hasi hopi kos tin ora mi ta sinti mi kansa pero e echo ku mi gusta nan ta pone ku mi no ta kansa. Mi ta skibi ‘popflai’ tur dia mi no ta kansa pasombra mi ta gusta e kos.
E asuntu di Sòftbòl Slowpitch di mucha muhé aki mi ta skibi di tur dos liga, mi no ke enemigu pa mi kurpa. Mi tin 50 aña i mi ke biba trankil rustig.
Un ehèmpel ta ántes Sòftbòl tabata kayente, Xiomara ‘Maya’ Geertruida, sòftbòlista di Cardenales kayente, awendia su yunan ta den Buena Vista. ta picha den Buena Vista. Solange van Gurp su yu ta prospekto di Buena Vista.”

KAMBIO
“Mi a kambia hopi atraves di añanan, mi tambe tabata hòtdòg, mi tambe no tabata tuma nada. Ta pa kiko mester pleita tantu asina. Ultimo añanan ku mi a sera konosí ku filosofia di Little League i mi a kambia masha hopi mes. Filosofia di Little League a kambia mi. Antes den Sòftbòl man tras di lomba pero protesta duru. Mi a kambia hopi hopi mes. Mi tabata mi klup so , awor aki mi ta wak mas e mucha i no mi klup so.Mi tabata protesta fuerte man tras di lomba. Mi a yega di haña ekspulshon segun mi 3 biaha den 30 aña.
Mi tin ku bai velt, mi tin ku traha mi ‘popflai’ promé. Si bo por sosega mèrdia un ora niun ora i mei e ta yuda masha hopi mes.”

PERIODISMO
Taffy: “Mi a gusta e ‘popflai’ mas tantu den tur, e radio mainta a bira a bira un kos inkreibel. Mi a bisa Cecil Garcia un biaha ku mi ta bai stòp ku popflai, Cecil a bisami stòp di papia kos ku bo no por hasi.
Dia promé di yüli mi ta hasi 20 aña na radio Hoyer. Tempu ta bai, unda bo ta bai einan bo tin ku keda. Tabatin bentana deportivo, Palco di honor. Na televishon mi a bai ku beisbòl, bòkseo, televishon e asuntu di bisti bachi bai sinta ta kansami p’esei nunka mi no a wòri masha ku televishon pa loke ta redaktor deportivo.
Flus ora mi ta bai entiero mi bsitie.”

HONOR
“Mi a risibí e honor di Curacao Little League Sòftbòl. Mi kier a ninga, pero bo no por keda ninga, ta manera kos ku bo no ke nada nunka. Nò, mi a aspetá. Mi ta gradisí pa e honor naturalmente. Mi a bisa no hasi e kos ei pero ya.. Clovis Lodewijks a yega di aserka mi pa mi drenta Salon di Fama internashonal di Sòftbòl pero mi a ninga.
Último añanan aki mi ta hopi serka di Little League. Jef.. si nos apliká Little League manera e mester ta e kos di mas bunita pa nos por hasi pa nos hubentut. E muchanan ta bai kòrda semper di nan bida momentunan ku nan a pasa den Little League. Tur mucha mester hunga, formashon. Ántes ta bini ku un mucha gordo, nan ta bisé no. Tin mucha ku ta ménos bon ku gordo, Pero aworakí a mucha ta muchu gordo muchu flaku, aworakí e mester hunga e tambe ta partisipá e mucha ta haña chèns di hunga.
Little League no ta pone bo pensa riba ganamentu so. Little League a kambia mi. Little League Sòftbòl tin futuro pa e muchanan, nos ta bai yega leu.
Pa e parti di sòftbòl mester di mas tékniko, beisbòl tin vários tékniko, Sòftbòl mester di mas pa nos hisa nos nivel i mester treinnan.
E téknikonan mester haña mas formashon tambe. Nan ta yuda mucha 7 dia pa siman. Nan ta pèrdè di kapasitá nan mes. Nos mester tuma un pousa ban un ‘refreshment’. Si bo ta kapasitá bo ta yuda un hende bon, si bo no ta kapasitá bo ta yuda un hende sí, pero bo no ta yud’é dje bon ei.
Ora nos ta trein selekshon bo ta mira muchanan ta haña doló di brasa esei ta debí ku den trainingnan di nan tim nan no ta pone énfasis riba e mucha su manera di tira e bala.
Den sòftbòl tin e aspekto di pichamentu ku ta hunga un ròl masha grandi mes. Nos no tin tantu know how di pichamentu ta henteramente un otro téknika.
Si bo no tin picheo bo no tin ‘Sòftbòl Fastpitch’, Taffy ta sigi konta Softballcuracao.com.

BIDA PERSONAL
Taffy de Jongh: “Mi kasa Murielle no konosémi otro manera, e konosémi riba vèlt i e tambe ta konstante riba vèlt, e ta hunga den Paradise e ta hunga awor den Sòftbòl Veterano tambe. Pa kolmo mi yunan tambe ta hunga sòftbòl i beisbòl. Ta tur dia tin un kos. Por ehèmpel mayan (Taffy ta referí na djaweps dia 22 di yüni, e entrevista a tuma lugá dia 21 di yüni) mi ta bai yuda selekshon Little League, Glorianne tin ku trein 7 pa 9. Mi ta bisa Murielle bini ku Glorianne ariba p’ami, i mi ta bini despues pa mi trein e selekshon senior ei tambe. E ta bai ku Glorianne, ami ta bai ku Gustavito mi ta trein kunan un tiki na velt tambe. Tin komprenshon pa e tiki tempu, Murielle tambe ta gusta deporte hopi, mi ruman muhe Gianna no a práktika deporte nunka pero e ta bon fanátiko di deporte i den un kas di deporte.”

MAL EKSPERENSIA
“Mal eksperensia pa mi komo tékniko ta e envidia ku tin den deporte. Mi a kuminsá sintié ménos si, mi a kita for di manager i awor ta Chape ta manager. Mi ... mi no ta interesá den e ganamentu, mi ta mas interesá den e preparashon. Mi ke yuda e hungadó riba vèlt, mi a pasa hopi aña den e kos ei. Bo ta haña bo tin ora tristu, bo ta pensa kiko bo a hasi pa e hendenan tin rabia riba bo.
Simplemente bo tambe ta hasi esfuerso pa bo tim gana. Nan ta zundra bo insinuá kosnan ku no ta korekto.
Si un hende no ta gusta bo, e no ta gusta bo.Yaaa.. bo no por hasi nada. Si e ke papia malu di bo e ta papia sea den bo kara òf tras di bo lomba.
Mara mi a konosé Little League i e filosofia di Little League masha tempu 20 aña pasa lo mi yuda deporte muchu mas tantu enbèrdat.
Mi a kuminsá lesa Cecil a trese buki p’ami, mi e les’é i e buki a yudami.
Nos mester di e modelonan manera Payo Faneyte, ántes nos tabatin hopi entrenadó bon manera Frank Curiel, Eddie Daou, Gengoe Hooi, sierto momentu hopi hende ku a sigui despues a bisa ku ta esei ta e manera, podisé nan a mira Taffy De Jongh ku su man tras di lomba ta grita, no tabata bon.
Aworaki si tin un protesta mi ta trata di keda mas cool ,mas trankil posibel”, Taffy de Jong ta trata di splika mal eksperensianan ku e tabatin i kon e ta hèndel ku e deporte awor.


FUTURO
Miéntras tantu mi tin bida ku salu lo mi sigui ketu bai, te kaminda mi por. Mi ta kere por ta lo mi stòp ku korant nan aki, pero riba vèlt si te kaminda mi por.
Miéntras mi por kore mi hasi gemnastik i mentalmente mi ta bon, mi ke keda den moveshon, mi no ke djòin veterano ainda mi ke keda den e muchanan, bo ta tendenan papia nan kosnan. Bo ta keda hóben, nan ta skucha 88.3, bo tambe ta skucha, bo ta keda hóben. Mi ta pidi Dios bida ku salu energia i pa mi famia tambe. Bida ku salu pa mi famia tambe, si bo famia no ta bai bon e ta saka bo for di balans. Si tur kos ta bai bon, bo por yuda otro tambe, si bo mes no ta OK bo no por yuda hende masha.
By the way algu mas promé ku nos terminá.
Nos a bai sòftbòl na Venezuela, un traningscamp ku Pichingolo i ora nos a tabata trein algun periodista a yega vèlt i saka nos potret, nan a yama mi i puntra mi : ”director udstedes son profecionales berdat” Mi a bisa nan: “No somos profeshonales pero tomamos las cosas en serio.”
Esei sigur tabata un elogio grandi ku nunka mas mi no ta lubidá. Na Hulanda, último biaha ku nos a bai tambe nos tabata saliendo for di hotèl i e sra. a bisa ku boso no ta parse Antiano.
Bosnan moda di trata, bosnan moda di komportá etc. nota parse Antiano,esei a hasi Pichingolo semper grandi. Mi sintimi semper bon ku e kosnan ei.
Mi no ta hipókrita, mi ta gusta dal mi drinks. Mi ta dal mi drinks ora tur kos kaba i bai mi kas bai drumi. Nunka un mucha ku mi ta trein no por bisa mi tabata hole alkohòl.
Tabatin dia di 60 plusser ku Sedreko, mi mester a trein Pichingolo i mi no a bebe niun alkohòl.
Algu mas.... tempu di mi tempu mi tabata gusta Billy Martin, Billy Martin tabata fogoso, ya aworakí mas edat mas madurá mi ta gusta Joe Torre pa su manera trankil di atendé kosnan.
Tin kos ku mi ta tuma aworakí ku 25 aña mi no tabata tuma, lo mi a tira dos moketa. Tur loke e muchanan ta hasi awendia nos tambe a hasi nan na chikí. Aworakí e rèspèt si a bai i un tiki for di man, a bini arma den e asuntu.
Mara nos tur ku ta grandi por yuda e muchanan un tiki mas tantu. Hunga deporte di rekreashon slowpitch pero yuda anke ta un tiki”, Taffy e terminá e entrevista basta ekstenso ku Softballcuracao.com for di su kas na Lagullinasweg 6.