Skol promé despues Deporte !!!

Sr. Philip Elhage, direktor di Fundashon Sedreko:
“UNIKO KAMINDA SIGUR DEN BIDA TA ESUN DI SKOL”.....

WILLEMSTAD- Sr. Philip Elhage, direktor di Fundashon Sedreko, kende ta “master” den “physical education” gradua na Springfield College, tambe eks pelotero i eks dirigente eksitoso resientemente a durante un konferensia di deporte pa boluntarionan a papia tokante:, ”E pakiko edukashon ta mas importante pa e mucha”.
Sr. Elhage kende porsierto tambe ta skout vinkulá ku baseball profeshonal di Grandes Ligas a bisa bon kla ku e úniko garantia pa nos yunan ta enseñansa. Un kaminda sigur tin den bida pa nos yunan, esei ta esun di skol.
Sr. Elhage tabata kla i honesto splikando ku ora kubo firma profeshonal bo no tin garantia di nada i ku hopi biaha bo tin di bandoná bo skol pabo bai hasi deporte. “Mester splika esei bon kla na tantu e mayornan komo e muchanan”, e direktor di Fundashon Sedreko ta bisa.
Tin mucha ku ta logra:


Naturalmente tin mucha ku ta logra, pero basá riba porsentahe ta un hecho ku muchu ménos ta logra di yega Grandes Ligas. Sr. Elhage a bisa ku míles i míles ta firma, pero ku ta lugá pa mas o ménos 600 so tin den Grandes Ligas.
Hopi orguyoso:
E direktor di Fundashon Sedreko den e promé “workshop” organisá pa e departamentu di rekreashon i deporte a rekonosé ku e ta hopi orguyoso ku e proyekto di deporte den bario ku ta wòrdu kargá pa boluntarionan. Apesar di un “budget” abou, tòg masha bon trabou ta wòrdu hasi.
Komo prueba di esei ta, ku masha hopi ta e skoutnan di deporte profeshonal ku ta aserka nos muchanan pa firma komo profeshonal.
Deporte ta esensial:
Sr. Elhage a splika ku deporte ta esensial pa siña e mucha kon pa komportá i atendé ku kualke kos ku por presentá den su bida. Tur bo ta siña den deporte. Bo ta siña pèrdè, siña traha den tim, kon pa komportá den tur sorto di sirkunstansia. Bo tin di respetá bo mes i respetá desishon di “hues”. Bo ta siña ku mester hunga limpi.
Entrenadó ta klave:
E trabou di e entrenadó ku ta riba kancha ku e mucha naturalmente ta klave. E entrenadó ta esun ku tin di duna ehèmpel, ku tin di koregí.
Fundashon Sedreko ke pa tur hende haña chèns di práktika deporte:
E direktor di Fundashon Sedreko a bisa ku ta e deseo di Fundashon Sedreko pa tur hende ku ta deseá di práktika deporte por haña un oportunidat tambe pa hasiele i no únikamente esnan ku ta mas talentoso. Ela rekonosé ku den un komunidat chikí naturalmente esei no ta fásil, pero ku ta trata di hasi esei posibel via di federashonnan i tambe na skolnan i ku deporte den bario.
Popularidat di deporte:
Tambe ta asina ku e deportenan ku ta mas popular ta loke ku hopi biaha mas mucha ke práktika. Tur mucha ku ta hunga baseball su deseo ta pa ta un “Andruw Jones”. Den Little League tur mucha ku ta hunga baseball tin e deseo pa firma profeshonal. Nan soño ta pa bira un hungadó di Liga Grandi. Sinembargo esei no ta posibel ya ku ta un kantidat limitá ta logra e soño ei.
No defroudá e mucha:
“Nos komo lider deportivo mester perkurá di tin e abilidat pa guia e mucha di manera ku e no ta wòrdu defroudá, pero ku nan ta realisá ku den nan bida edukashon ta loke mas ta konta. Siña bon na skol i despues hasi bo deporte mas mihó ku ta posibel. Bo por siña bon na skol i hasi deporte bon tambe”, segun Sr. Philip Elhage.
Edukashon Fisko ta usa deporte i moveshon pa siña nos tur reglanan di bida. Naturalmente moveshon ta bon pa salú, pero mes importante ta pabo haña lès di bida den deporte, esei tabata e palabranan prinsipal di Sr. Philip Elhage.