WILLEMSTAD- Curaçao Little League Softball a tuma e desishon ku pa partisipá na e kampeonato di sòftbòl ku ta ouspisiá pa Curaçaose Sòftbòl Bònt nan miembronan mester tin 15 aña. Ku introdukshon di e regla aki un mucha ku ta hunga softball den Little League mester finalisá su aktuashon den Junior League pa por hunga den kompetensia di Federashon di sòftbòl lokal.
Sr. Cecil Garcia ku ta presidente di Curaçao Little League ta bisa ku e motibu dje desishon ta pa protehá e muchanan.
E presidente di Liga Soraida Juliana ta splika ku den Softball Little League tin algun regla pa protehá e muchanan. E ta referí na regla di: edat i tambe restrikshon pa loke ta picheo i sosiegu entre aktuashon.
E máksimo dirigente di nos Softball Little League ta mustra ku den baseball Little League porhempel ta te ora ku e mucha kaba di hunga den e kategoria Senior e por hunga den hubenil, klase A o dòbel A.
Ta bin aserka tambe ku Fundashon Sedreko ta supsidiá e mucha den Little League i tambe den hubenil, i si e mucha hunga otro klase nan tin di hasiele ei tambe loke ta kontra di e filosofia di supsidio di Fundashon Sedreko pa ku nos deportistanan.
E dirigente ta spera ku tin komprenshon pa e medida di Curaçao Little League Softball ku tin e bienestar dje mucha na pechu. “Ta pa e bon dje muchanan”, e ta agregá.
Den Little League tin protekshon pa e pichernan, den C.S.B. esei no ta e kaso. E mucha por picha tur dia mes.
Ta bin aserka ku mester protehá un mucha ku tin 12 o 13 aña di hunga kontra un hende grandi ku por tin muchu mas estatura i peso. Tambe den un dug-out di adulto lo por tin kòmbersashonnan ku ta mihó e mucha no ta metí aden.
No comments:
Post a Comment