Djabièrnè dia 8 di yüni 2007 tabatin apertura di e 2do kampionato di The Champions Softball League a sorpresá e públiko presente, introdusiendo un ambiente kultural festivo eksklusivo den Frank Curiel Ballpark. Ku kompañamentu di Los Carabelitos, e kabayeronan di e grupo di seú "Ambiente ta Tota" wapando a kompañá kada un tim di sòftbòl presente te riba fèlt kaminda damitanan di e grupo "Un Pinchi Un Galòn" tambe tabata presente.
Despues a sigui un show tur afó di baile di seú ku a bai kulminá despues pafó dilanti di tribuna prinsipal. Hopi original i un pabien na e organisadónan.
E promé wega di kampionato a bai entre The Champions i Warriors. E wega a kana pareu te den di 3 inning ora The Champions a nota 3 kareda. Warriors a bini bek i nota 2 kareda pero no a logra nota mas den e siguiente inningnan. The Champions sinembargo a amplia nan bentaha pa sali viktorioso. Pa The Champions 6 kareda, 7 hit, 3 eror. Picher ganadó Julia Pinedo. Soraida Juliana a hasi un bon 'comeback' despues di tabata ousente aña pasá i a bai di 3-3. Pa Warriors 2 kareda, 6 hit, 3 eror. Picher pèrdèdó Maris Obispo. Sharon Henriquez a bati di3-2.
Pa klousurá e anochi DOK a subi fèlt desidido kontra di BAB. E hitnan di DOK tabata skeiru di tur banda. DOK a tuma un bentaha for di tempran. Den e último inning BAB a menasá pero keda kòrtiku. DOK a bai ku e viktoria di 11 pa 10.
Pa DOK 11 kareda, 17 hit, 2 eror. Picher ganadó Carol Winklaar. Rashid Winklaar a bai di 4-4. Joandy Balentina i Derlison Ignatia a sòru kada un pa un homerun.
Pa BAB, 10 kareda, 10 hit, 1 eror. Picher pèrdèdó Raymond Fransiska. Mihó batidó pa BAB a resultá Stanford Landburg ku a bai di 2-2. Laishenel La Cruz, Sedwin Walle i Miro Daal kada un ku un homerun.
No comments:
Post a Comment