Boston USA a demanda un revancha y nan ta na caminda

ORANJESTAD - Royal Power softball organisation ta sigi cosecha éxito tras di éxito. Den nan promer salida den 2008 participando de e grandioso Open Class di fastpitch nan a titula campeon. Aña pasa den luna di mei Royal Power a logra un titulo hopi importante ganando e fuerte equipo di Boston USA den un tremendo final. E fuerte equipo di BOSTON USA di Angel Gonzales tabata den un gira titulando campeon tras di campeon den diferente torneonan grandi rond mundo entreotro, New York, Miami Florida, Sto Domingo, Corsow pa nombra algun y tabata tin casi dos aña sin perde un torneo. Sinenbargo ora nan a yega Aruba nan no tabata sa cu aki tambe tin un equipo fuerte cu mesun trajectoria cu nan cu a gana titulo na Hulanda, Corsow, Aruba den gran escala. Den un final sold out riba veld di Kudawecha e muchanan di Royal power a sa di para careda di BOSTON USA y ta propina nan un derota. Sinenbargo e cos no a caba eynan ya cu Boston USA consistiendo di diferente X-major league players a demanda un revancha y tur cos ta kla y nan ta na caminda pa e torneo di Royal Power “CHAMP of the CHAMPS cual lo tuma lugar dianan 3,4,5,6 di july proximo. Endy Croes a manda mensahe pa nan cu nan mester hunga pa yega final promer pa asina por tin un revancha ya cu di banda di Royal power nan lo hasi nan maximo esfuerzo pa ta den final un bes mas. Angel Gonzales a laga sa cu su honronero no por tabata tey aña pasa pa motibo di lecion pero e aña aki ta otro gay lo canta. Desde awor Aruba ta yama bonbini na Boston USA y tambe na tur otro equiponan cu ta den pleno preparacion entreotro Baranca di Corsow, Braves di Bonaire, Los Compadres campeon di Sto Domingo y Awo Awo di Hulanda. CHAMP of the CHAMPS e aña aki ta mustra cu lo ta all y mas cu claro cu Tsunami den cas. Fanaticada cuminsa prepara ya cu veld di Kudawecha lo wordo comberti den un centro di ambiente y competencia pa grandi y chikito. Reserva e fechanan aki bon, 3,4,5,6 di july.