Koraal Specht Op en Top pa promé biaha den Creme de la Creme

WILLEMSTAD - Esaki ta promé aña ku e ekipo di Koraal Specht Op en Top ta partisipando den e gran torneo Creme de la Creme i segun e manager Murat Leito, Koraal Specht ta bini pa pone rèspèt den e torneo aki.

Nan kuerpo tékniko ta konsistí di Murat Leito komo manager i Etiene Goeloe komo coach.
Segun Murat nan ekipo ta un ekipo hopi yòn i ta bini pa duna un bon presentashon.
E ta kere ku nan lo kontribuí na un tremendo espektákulo kaminda ku nan komo benjamin lo bin pone rèspèt riba vèlt i e públiko lo por gosa en grande di nan aktuashon.
Segun Murat nan lo tene kuenta ku tur ekipo i pa e, e partisipashon i di-bertishon sano di su muchanan lo ta na promé lugá.
Un invitashon na bario di Koraal Specht i besindario pa akudí den gran forma na Cirilo Chirino Ballpark pa asina apoyá e muchanan di bo bario i e otro ekiponan partisipante. Bini ku henter famia pa asina disfrutá di un tremendo torneo creme de la creme den ambiente familiar.
Pero kòrda semper bini ku hopi ánimo, amor, disiplina i prinsipalmente rèspèt, pa asina e muchanan por sinti ku nan ta wòrdu apresiá i respetá pa e esfuerso ku nan ta hasi riba vèlt.