Joudinay, “The hitting-machine” di Softbol Femenino Dobel A

WILLEMSTAD - "Despues di temporada pasá m'a bisa ku mi lo no hunga sòftbòl mas. No tabata bai dje bon ei, a pasa den mi kabes pa bai hasi otro deporte", na palabra Joudinay Wederfoort ku tabatin un kampaña realmente impreshonante den temporada regular di nos sòftbòl.
THE HITTING MACHINE
Wederfoort ku ta hunga pa e tim di The One a sali e di tres mihó batidó di kam-pionato ku un averahe di .424 den 59 turno ofisial na bate. Joudinay a bati un total di 25 hit. Su kantidat di 25 hit tabata "tops" di liga huntu ku Vanessa Winklaar i Jenny Kinburn.
E forma ku ela bati e temporada aki a pone ku pa Revista Deportivo Kòrsou "Joudi" ta "The Hitting-Machine".
Wederfoort no a respetá niun pitcher e aña, ela bati ku fasilidat kontra di tur. "Di bèrdat tabatin sigur dos pitcher ku mi tabatin hopi rèspèt p'é", Wederfoort ta splika. “E dos pitchernan aki ta Rozeline Kinburn i Suliviendra Hooi. Tur dos tabata dje bon ei ku nan por a deskontrolami ora mi tabata para bati. Kontra Rozeline Kinburn e temporada aki den mi promé turno na bate mi a konektá hit, esei a dunami hopi konfiansa. Kontra Suliviendra a bai mihó, m'a haña ku "Suli" e temporada aki no a tira ku e mes velosidat i efektividat. Mi ta sinti ku mi por batiele tur dia”, e ta agregá.
13 AÑA DEN SOFTBOL
Joudinay tin sigur 13 aña ta hunga sòftbòl. E ta konta ku ela kuminsá train sòftbòl riba e tereno di Amador Nita pegá ku Fundashon Sedreko huntu ku e tim di Hell Angels. "Joudi" no a hunga den Hell Angels sinembargo. E ta rekordá ku e tabatin 11 aña den klas-6 i huntu ku amiganan di bario manera Celeste Francisca, "Naiska" Francisca i Sigienne Windeveld ela kuminsá hunga sòftbòl.
E promé tim di Joudinay tabata e tim Collection Future, serka Ronny Inesia. Despues di bai ku selekshon Venezuela pa un kompetensia Interna-shonal di mucha na aña 1999, Joudinay a pasa pa hunga pa e tim di Sta. Rosa Angels huntu ku "Chu" Martis i Zulma, despues di Sta. Rosa Angels ela djoin e klup The One ku ya ta bai kumpli 5 aña.
"Ora ku The One a lanta m'a bai The One huntu ku coach Joel Angelista, Ruthmaye i Joshmaye Boulijn, Esterline Lindeborg, Dayanara Pieternella, Ismairy Ignacio i algun otro mucha mas", e ta splika.
E ta sintiele na kas mihó na segunda/base..
Joudinay ta konta ku su posishon mes ta segunda/base. “Na segunda/ base mi ta sintimi mas na kas.” Tambe e ta hunga den outfield. E simpátika hungadó di The One, alias "The Hitting-Machine" ta rekonosé ku e no tabata bati bon semper. “Semper mi tabatin poko fayo den mi mekánika. Mi tabata swing bon, pero mi kordinashon no tabata dje bon ei o mi tabata kita kara pa e bala.”


EMILE HASWELL
"The Hitting-Machine" ta duna krédito na su coach Emile Haswell bisando ku Emile a yudele masha hopi den batimentu e temporada aki. “Sin duda tabata mi mihó aña ofensivo”, e ta añadí.
Manera ela splika kasi ela stop di hunga sòftbòl paso e no tabata sintiele bon. Na momentu ku "Lando" Chirino a aserka "Joudi" pa bisa ku nan ta bai re- organisá e tim di The One, ela duda, pero despues di pensa, ela kombersá ku "Josi" kasá di "Lando", kompañera di tim i amiga di konfiansa, ela bisa: "Ta bon, mi ta bai p’é.
Mesora m'a pensa ku mi tin di hasi mas esfuerso tambe, train duru tur biaha ku mi por.”
Wederfoort ta rekonosé ku su coach Emile Haswell tabata tremendo p'é. “Emile a yudami hopi, ela bira manera un di dos tata pa mi. M'a kuminsá duna tur ku tin i pensa si ta mi último aña mi ta bai p'é tur ku tin. E trabounan a kuminsá bira mas duru. Mi tabata bai bati den tunel, swing bate hopi, hasta na kas. E seriedat ku mi a pone den e sòftbòl mesora a duna resultado. M'a kuminsá bati e bala bon kontra tur pitcher", e ta bisa. E di tres bate di The One ta bisa ku tur wega Emile Haswell ta bis'é ku e e no por bai "bashí", e tin di dal hit.

Den wega di dos di play-off semi-final kontra di Pichingolo Nissan Joudinay a bati dos biaha sin dal hit. A pasa den su kabes ku e no por bai kas bashí i ela konektá tambe di hit. Joudinay Wederfoort ta bisa ku e ta respetá tur pitcher. "Ora ku mi yega plato mi ta hinka den mi kabes ku tur pitcher ta Rozeline Kinburn. Rozeline ta nos mihó pitcher, ke men mi tin di pone mi pa bati Rozeline i tur ku bin."
TRAINING TA YUDA
E ta duna hopi krédito na training i ta splika ku trai-ning a yudele masha hopi mes. Hopi swing, keda traha riba kordinashon, konsentrá pa keda atras, swing "level", hinka e kosnan den otro pa asina logra algu bon, e ta remarká.
Pa Joudinay e kampionato a bai bon. E ta haña ku nan a hasi loke nan a primintí di hasi. E ta bisa ku nan no a balota niun tim. Di bèrdat nan a pèrdè dos wega kontra di Rising Trotters i mesora tin hende ta bisa ku ora ku nan hunga kontra di Pichingolo nan ta hunga ku mas inspirashon pa gana, pero no ta asina. Joudinay ta bisa ku ora nan topa ku Trotters, Trotters ta manda Moya Hooi kontra di nan.
Moya no ta tira dje fuerte ei i kisas nan no ta konsentrá bon pa hasi e trabou ku nan tin di hasi.
AINDA TIN CHENS
Joudinay ta haña ku e kampionato regular a bai bon.
Kontra di Pichingolo kosnan te ainda no a sali ma-nera nan a pensa, pero ku ainda tin tempu pa esei. "Nos lo keda "focus" i traha duru, paso nos tin tur chèns ainda", e ta opiná.

(Entrevista saká for di Revista Deportivo Korsou edishon 143)