WILLEMSTAD - 2008 tabata un aña di hopi malasuerte pa e tim di Sta. Rosa Angels. Ta manera kos ku nada no a sali e tim bon. Nan a pèrdè varios mucha, algun ku mester a bai studia, otronan ku a move. Huntu ku esei tabatin kosnan ku a pasa ku a laga un sabor amargo. Revista Deportivo Kòrsou a kombersá ku e máksimo dirigente di Sta. Rosa Angels ku ta sr. Eduard, "Chu" Martis.
Umpire mester a aktua vs The One.
E máksimo dirigente di Sta. Rosa Angels ta di opinion ku umpire mester a aktua kontra di e tim di The One na momentu ku nan a ripará ku nan no tabata hunga pa gana kontra di Soto ku e intenshon di perhudiká e tim di Sta. Rosa. "Un tim no mag di hunga e forma ei. M'a haña e loke a pasa hopi laf. Kon algun dirigente por pone poko mucha riba velt i instrui nan pa pèrdè", Martis ta bisa.
E tabatin un pensamentu ku algu asina lo a sosodé, paso segun e weganan tabata bai e tabata sa ku e wega entre The One i Soto lo a bira un determinante.
Chu Martis den entrevista ku Revista Deportivo Kòrsou ta resumí e aña di Sta. Rosa Angels i ta rekonosé ku kos no a bai bon.
Kos no a bai manera nan a pensa
"Tabata e intenshon ku nos lo a haña Janice Pieters i Daya Hersisia for di Ulanda. Janice no a bini mas i a bai The One. Sta. Rosa Angels tambe a sinti falta di Ana Francisca i Jerina Hieroms kendenan a bai Ulanda pa estudio", Martis ta añadi.
Ounke ku e kambio di Jenny Kinburn pa The One no a sorprendé nan, ela afektá e ekipo paso Jenny ta un tremendo hungadó.
"E pase di Jenny Kinburn pa The One no a sorprendé nos asina hopi, ya ku Jenny su aktuashon no tabata normal ya pa algun tempu", Martis ta splika. Ela bisa tambe ku Jenny Kinburn a wòrdu influensiá pa un persona ku ta yama su mes "agente" loke ta di lamentá. E pèrdida di Jenny tabata un sla duru pa e tim, pero sigur e no tabata un sorpresa.
Yamada pa duna yudansa
Chu Martis ta konta ku despues di a pèrdè Jenny Kinburn ela haña un yamada na kas di un hende ku a bis'é ku e tin bon kontakto na Venezuela i ku elo por haña algun refuerso pa nan. E dirigente e kontestá: "Mi mester di mitar tim."
Despues di pensa ela bai di akuerdo pa trese algun hungadó for di Venezuela basta nan lo por yuda nan ku e muchanan ku e organisashon di Sta. Rosa tin, loke a sosodé tambe. Mariela Espinosa ku a bin tin eksperensia den trai-ning di mucha, i naturalmente e tabata welkom.
Danki na tur ku a koperá
Chu Martis ta gradisí tur esnan ku a koperá ku Sta. Rosa Angels di manera ku e por a kubri e gastunan dje refuersonan for di Venezuela. Huntu ku Mariela Espinosa a bin for di Venezuela Lady Hurtado ku a hunga den short i na segunda/base.
Mariela a leshoná
E lider di Sta. Rosa ta bisa ku 2008 no tabata aña di Sta. Rosa ya ku Mariela a leshoná i no por a demostrá su mihó pitcheo. "Mariela a kuminsá impreshonante, pero ela leshoná den wega kontra di Eagles Softex, despues ela leshoná su pia tambe. Pa kolmo Mariela a haña blar na su dede i no tabata mes efektivo mas.
Malasuerte ta persiguí Sta. Rosa
E malasuerte di Sta. Rosa Angels a kontinuá, ya ku varios hungadó no por a train manera mester ta, algun pa motibu di trabou, otronan pa motibu di skol. Lisandra Ursulita ku ta pitcher tambe a leshoná skouder i simplemente kosnan no a bai bon.
A pensa na trese kètcher venezolano
Chu Martis den kombersashon ku Revista Deportivo Kòrsou a deklará ku dado momentu ora ku Mariela tabatin poko difikultat tambe pa por a adaptá ku e kètchernan di Sta. Rosa a pasa den nan kabes pa trese un kètcher Cubano ku ta na Venezuela pa e por kètcha Mariela, pero e idea ei no a kristalisá. Lo mester a buska mas yudansa pa kubri gastu i no tabata sigur ku e kètcher Cubana lo por a keda muchu dia.
Tin derota ku a pisa hopi Chu a rekonosé ku nan a pèrdè algun wega ku a pisa hopi. “Nos a pèrdè kontra di Rising Trotters i Soto ku tabata weganan ku nos mester a gana ku finalmente a bin pisa hopi pa nos.” Pa e máksimo dirigente di Sta. Rosa Angels nan mester lubidá 2008 lihé, e malasuerte tabata demasiado, pa kolmo awaseru a kai masha hopi i pone ku Mariela no por a train e muchanan ku ela bin pa train manera mester ta, ya ku vèltnan a daña.
No comments:
Post a Comment