WILLEMSTAD - E kampionato di sòftbòl di The Champions League a yega na su final ku The Champions, Kooyman i e kombinashon di Coca Cola/UTS komo e kampionnan di 2009.
The Champions Mercedes Benz kampion pa di 2 biaha.
Den e final di Liga, tabata for di djabèrnè ùltimo ku The Champions Mercedes Benz den un partido emoshonante ta anotá 3 kareda den kabes di e di 8 entrada pa gana di Nos Goso Girobank ku skor di 6-3 pa titulá kampion di The Champions Softball League 2009.
Pa The Champions den e wega aki a destaká Marelva Iltes ku a resultá e picher ganadó, Natalie Lourens ku a bati di 4-3 i Soraida Juliana ku a konektá un bataso di kuater skina.
Kooyman kampion pa di 2 aña konsekutivo.
Den e seri Komersial Feme-nino ku tabata mihó di 3 ku Kooyman dilanti den e seri, UNA den e di dos partido ta igualé na 1 pa motibu ku Kooyman a faya ku aplika-shon di regla di hungadó aktivo i ta pèrdè e wega. Den e partido desisivo ku tabata kargá ku emoshon Kooyman riba hit di Rixgaira Poulina ta laga UNA den tereno pa gana den forma dramátiko ku skor di 5-4 pa titulá kampion pa di 2 aña konsekutivo. Pa Kooyman den e wega aki 5 kareda, 7 hit, 2 eror. Ignadely Garcia a gana. Na bate Rixgaira Poulina di 3-2. Pa UNA 4 kareda, 7 hit, 2 eror. Farah Andrade a pèrdè. Na bate Jetsely Helmyr di 2-2.
Coca Cola/UTS kampion den Komersial Maskulino.
E seri ku a hala mas atenshon den e fin di siman último tabata e seri mihó di 3 entre Coca Cola/UTS i The Bear Armored. Djasabra e 2 ekiponan aki a splet nan programa dòbel ku nan tabatin kontra di otro. Tabata The Bear Armored ku a gana e promé partido 11-7. Picher ganadó den e wega aki tabata Jose Obispa i e pèrdèdó a resultá Heinrich Martina. Mas lat riba e mesun fecha Coca Cola/UTS ku picheo di Patrick Laken ta bin bèk pa gana di Jose Obispa i The
Bear Armored ku skor di 14-10 pa empatá e seri.
Den e wega desisivo ku tabata realmente un wega di tenshon kargá ku emoshon, Coca Cola/UTS den otro wega ku un final dramátiko ta gana The Bear Armored ku skor di 18-17 i titulá kampion pa di promé biaha den The Champions League. E euforia despues ku e último out a kai tabata inmenso serka di Coca Cola/UTS. Sigur un tremendo wega pa klousurá e kampionato di The Champions Softball League 2009. Despues di e wega tabatin un selebrashon total.
Pa Coca Cola 18 kareda, 17 hit, 3 eror. Heinrich Martina a gana. Na bate a destaká Shurandy Lourens bayendo 4-4. Pa The Bear Armored 17 kareda, 18 hit i 4 eror. Jose Obispa a pèrdè. Na bate Quintin de Cuba di 3-2.
Un pabien ta bai na e ekiponan kampion i supkampion ku nan título. Mesora despues di e ùltimo wega tabatin entrega di premio na e ekiponan komersial kampion i supkampion i tambe na e hungadónan ku a destaká durante di temporada. Un gradisimentu ta bai na tur esnan ku di un o otro forma a koperá pa e kam-pionato di The Champions Softball League 2009 tabata eksitoso i ku pa 2010 nos ta spera di lo por konta ku e mesun koperashon.
No comments:
Post a Comment