Ekiponan di Minor i Little League preparando fuerte pa play-off ku ta start djabièrnè awor

WILEMSTAD - Ekiponan Minor i Little League di Liga Pabou, Pariba i Willemstad ta preparando fuerte pa e fase final di play-off ku ta start djabièrnè awor na Little League Ballpark.
Kontrali na añanan anterior ekiponan Minor i Little a haña mas espasio pa train.

Nos lo komentá awe riba e play-off Little i Minor ku ta bai start djabièrnè awor.
Tambe nos tin numerito di e weganan di play-off Junior i Senior ku a tuma lugá djasabra i djadumingu último.

DIVISHON LITTLE
Tur fanátiko ta pendiente di e play-off aki ku naturalmen-te ta e creme de la creme di Little League.
Little League ku ta mucha-nan di 11 i 12 aña ta hala masha hopi atenshon espesialmente e evento grandi (World Series) ku ta tuma lugá na Williamsport.
E muchanan ku a biaha pa Williamsport ta haña un trato super speshal.
Tur mucha ku ta hunga beisbòl su soño ta yega Williamsport i hunga kam-
pionato Mundial.
Tur wega ta keda transmití pa rònt Mundu ku por dispone di e kanalnan ESPN.
Un eksperensia inkreibel pa e hobennan.

PARIBA LITTLE
Hopi komentá ku Pariba tin un Dream Team den Little League e aña aki.
Pariba ta disponé di e hobennan ku a bira kampion den Minor aña 2008 i 2009 bou di direkshon di Edmiro

‘Pancho’ Chirino.
Ta Pancho Chirino mes ta na kabes di e selekshon Little e aña aki.
Hopi ta papia di un ekipo imperdibel ku lo kibra e racha di 7 play-off ganá siguí di Liga Pabou ku sigur ta un rèkòrt. Pa kolmo 7 aña siguí e ekipo di Pabou a gana kampionato di Karibe.
Den kurso di siman nos lo tene entrevista ku manager di e ekiponan tantu Pariba, Pabou komo Willemstad.

PABOU LITTLE
Manager Charlton’ Charlie’ Cijntje no ta papia masha.
E tin sigur dos picher ku ta talentoso ku por wanta kualke ekipo, tantu na Kòrsou komo na nivel di karibe. Charlie a bisa nos na algun okashon ku su ekipo ta fuerte sin bai den muchu detaye.

WILLEMSTAD LITTLE
E ekipo ta entrenando fuerte.
Nos no a haña e oportunidat pa kombersá ku e manager i coachnan. Nos ta kòrda si ku aña pasá ta Willemstad Little a klasifiká na puesto number dos tras di Liga Pabou i a bira supkampion di e kampioanto di Karibe ku a tuma lugá na Kòrsou.

RESULTADONAN
Liga Pabou 11, Liga Willemstad 7
Liga Pabou a konektá 8 hit i hasi 1 eror. Junters Dosette a gana i Jairly Argus a bati di 2-2. Liga Willemstad a dal 7 hit i hunga sin eror. Fabian Susana a resultá e picher pèrdèdó i Sander Boeldak a bati di 4-2.
Liga Pabou ta titulá kampeon di playoff lokal i ta avansá pa Torneo Latinoamerikano ku lo tuma lugá na Guatemala di 24 di yüli pa 1 di ougùstùs próksimo.