Naai Hooi ta tira no hit no run kontra Catpower i klasifiká Trotters pa final

WILLEMSTAD - Rignald ‘Naai’ Hooi tabata hermétiko djamars anochi pa su ekipo Rising Trotters den e wega finalisimo di semi-final Liga 40 kontra Catpower.
Naai Hooi a tira un no hit no run kontra Catpower dilanti un bon públiko na Suvek.
E tremendo picher veterano aki a poncha 7 i embasá solamente 5 batiadó.
E wega a termina ku skor di 2-0 na fabor di Rising Trotters naturalmente.
Rising Trotters ta klasifiká pa e gran final i lo enfrentá Baranka djaweps awor den un serie mihó di tres.

NUMERITONAN
Rising Trotters a nota 2 kareda, bati 5 hit i hasi 1 eror.
Rignald ‘Naai’ Hooi a gana i Edwin Thielman a bati di 2-1.
Ingomar Jonis tambe a bati

di 2-1. Catpower no a bati hit i hasi 1 eror.
Wim Felicia a resultá e picher pèrdèdó.

RISING TROTTERS
E ekipo di Rising despues di e pèrdè e promé wega di e serie ku skor di 10-1 a bini fuerte bèk pa gana e di dos wega 7-4 ku picheo di Naai Hooi. E promé wega Rising Trotters a habri ku Norman Provence ku tabata e picher pèrdèdó.
Naai Hooi tabata grandi den wega number dos di e serie ganando 7-4.
Tabatin tur indikashon ku Naai Hooi mes lo a bini den e wega finalisimo pa derotá e ekipo Catpower.
E ekipo Trotters ku picheo di Naai Hooi ta faborito pa gana e serie final kontra Baranka.
Trotters tin un tremendo ekipo ku hungadónan manera Sharlon Noor, Marlon Noor, Lyndon Lourens, Eddie Thielman, Patrick Elisa, Michel Daou, Naai Hooi, Ingomar Jonis, Richenel Juliana, Jurgen Susana ets.
Tremendo ekipo ruman.

KONTINUASHON
E serie final ta start djaweps ku e promé wega entre Rising Trotters i Baranka.
E wega aki lo tuma lugá 9.30. Catpower i Jaws lo enfrentá otro den e wega bálido pa di tres i kuater luga.