“Sharlon, "Wecho" Schoop sin duda lo hunga den Grandes Ligas ku e tim di San Francisco Giants”, na palabra e skout di e tim na Kòrsou ku ta sr. Philip, "Lipo" Elhage.
Elhage tin ya varios aña den "skouting". Ounke e "skouting" p'e ta un hòbi, ela traha ya pa varios organisashon, entre nan pa Yankees, Tampa i tambe San Francisco Giants.
"Nos tin dos hungadó aktualmente di Kòrsou i mester bisa ku e tim ta kontentu ku tur dos", asina Elhage ta konta Revista Deportivo Kòrsou.
Fuera di Sharlon Schoop, Giants tin tambe Sudrendy Windster ku ta hunga den outfield i ku a aktua den "Dominican Summer League". Elhage ta pensa ku si tur kos bai manera mester ta ku Windster lo hunga próksimo temporada na Estados Unidos. "Windster a bai sumamente bon e aña aki. Ela kuminsá temporada poko slou, pero despues ela rekuperá i kaba sumamente bon. Windster ta un pelotero ku tin bon estatura, ku bon forsa, bon brasa i bon material pa yega leu. E tin di sigui traha fuerte i elo yega leu", sr. Elhage ta remarká.
Elhage: “Ta rekòrt ku Wecho Schoop a wòrdu firmá na aña 2004 huntu ku Shairon, "Shai" Martis. Martis entretantu a pasa pa e tim di Washington Nationals i ya ela start 3 wega den Grandes Ligas. SF Giants tabatin mester di un relevista slengu i nan a kambia Shairon Martis ku Nationals pa e Big Leaguer Mike Stanton. Beisbòl ta asina”, Elhage ta agrega.
Pa loke ta "Wecho" Schoop, Elhage ta splika ku e prospekto aki di 21 aña di edat ta hopi gustá den e organisashon di San Francisco Giants. Ela hunga 125 wega den short e temporada aki i haña e premio di mihó hungadó defensivo di San Jose Giants di klase A avansá.
E skout di San Francisco Giants ta pensa ku Schoop posiblemente lo start próksimo temporada den Dòbel A. "Ku tur probabilidat elo kuminsá den Dòbel A", asina Elhage ta bisa. E hendenan di Giants ta mira den Wecho Schoop un hóben hopi dediká, serio i profeshonal.
Defensivamente sigur Wecho Schoop lo no tin problema pa hunga den Grandes Ligas. E skout di Giants ta sigur ku elo bati tambe den Grandes Ligas. Si tur kos bai manera Elhage ta pensa e chèns ta bon ku otro temporada mes Schoop lo por ta entre esnan yamá ariba den sèptèmber. "Ora bo ta den Dòbel A bo ta hopi serka i tur kos por pasa.”
E temporada ku ta tras di lomba Schoop a bati pa averahe di .246, ela haña 398 turno ofisial na bate i konekta 98 hit, entre nan 18 doblete, 1 triple i 7 homerun. Ademas em-puhá 52 kareda. Schoop a poncha 88 biaha. Ela sali 10 biaha di robo i horta 7 base. E mihó luna ofensivo pa "Wecho" Schoop tabata luna di mei. Ela bati pa averahe di .269 i den luna di ougùstùs ela bati pa averahe di .268.
Schoop tabata impresho-nante ku koredó den posi-shon di anotá i 2 out kaminda ela bati pa averahe .356, di 45-16.
Den defensa e yu di Kòrsou tabata e di tres mihó den porsentahe di fildeo di liga ku porsentahe di .962. "Wecho" Schoop aktualmente ta na Estados Unidos kaminda ela wòrdu invitá pa asistí na "Instructional League".
"Ta trata aki di un mucha ku bon aktitut, i ku Giants tin hopi speransa den dje", asina e skout di San Francisco Giants, sr. Philip Elhage a bisa Revista Deportivo Korsou.
(Artikulo saka for di Revista Deportivo Korsou)
No comments:
Post a Comment