WILLEMSTAD - Vanessa Winklaar sin duda ta e batidó mas temibel di nos sòftbòl lokal femenino Dòbel A. Entre su kompañeranan di ekipo e tin e "apodo" di "Burdugu" pa su forma bestial di konektá e bala.
Vanessa no awor, pero for di dia ku ela kuminsá hunga sòftbòl femenino tabata un temibel batidó, pero e aña aki e tin mas homerun ku nunka, dor ku ya ela saka sinku for di parke i dal e bala na va-rios okashon den 'fence' di outfield ku fasilidat.
Vanessa no ta kere ku e bate ta yudabo dal bala leu. E ta pensa ku e motibu ku e aña aki e tin mas homerun konektá ta debí ku e tabata swing mas pa hit. E aña aki e ta konsentrá poko mas tantu i ta swing mas pa bataso largu. "Mi no ta kere ku bate ta hasi tantu diferensia. Bo mester konsentrá pa bo bati, swing bon i bo ta dal e bala bon ku kualke bate ku bo ta gusta", asina Vanessa ta remarká.
E orguyo di sra. Vivien Winklaar ta konta ku e tin 10 aña ta hunga sòftbòl kaba. “Mi a kuminsá hunga sòftbòl na 1998”, e ta splika.Vanessa no tabata gusta sòftbòl, simplemente ela hañ’é den sòftbòl na un manera straño.
"Mi ruman hòmber Djuric ku tabata bai hunga futbòl na Ulanda a bisa mi mama ku e tin di buska algu hinkami aden, pasobra mi ta sinta muchu na kas. Mi mama e ora ei a aserká Taffy de Jongh, pasobra yu muhé di Taffy de Jongh ku ta Glorianne tabata den su klas i ela puntra Taffy si mi por a train ku su muchanan", Vanessa ta splika.
Di e manera ei e karera di Vanessa Winklaar den sòftbòl mucha muhé a start. Vanessa a kuminsá train na Buena Vista i kuminsá hunga den hubenil. "Nos tabata hopi i a parti e hubenilnan na dos", e ta kòrda.
Vanessa despues a kuminsá hunga den e tim di Pichingolo Kia Motors i na 1999 ela djoin e tim di Pichingolo Nissan, e tim prinsipal di Pichingolo i te ku awe e ta hunga den e tim.
E sòftbòlista estrea ta haña ku sòftbòl femenino a kai poko. "Kompará ku dia ku mi a kuminsá sigur e sòftbòl a bai poko atras. Antes tabatin muchu mas aktividat tambe di sòftbòl", e ta añadí.
Winklaar ta kere ku nos dirigentenan tin di trata pa e hóbennan ku nos tin kuminsá haña e chèns atrobe pa hunga Internashonal den region. "Antes nos tabata bai kompetensia regional den U-17 i U-19, aworaki ta hunga Little League i ta Puerto Rico so e muchanan ta bai práktikamente", e ta opiná. E ta pensa ku si bin mas aktividat pa e hubentut, nan lo sinti nan mes mas mihó den e deporte i lo train i hunga ku mas smak.
Vanessa ta pensa ku mester traha tambe riba un selekshon di Kòrsou. "Nos mester reuní un selekshon i kuminsá train pa asina partisipá atrobe ku selekshon manera antes. Kisas e nivel a kai poko, pero nos mester por kuminsá abou i trata na lanta kabes", e ta haña. Vanessa tin 10 aña den sòftbòl femenino i a biaha pa varios pais ku e deporte. “Mi a hunga sòftbòl na Venezuela, Bahamas, Canada, Brazil, Puerto Rico, Ulanda, Mexico, El Salvador, Colombia i tambe Aruba.”
E slugger primera/base di Pichingolo Nissan ta di opinion ku e "paro" den sòftbòl femenino ta muchu largu. Lo tabata bon pa pensa kon pa hunga algun torneo entre e "break" ku tin pa asina e muchanan keda aktivo. E sòftbòl ta kaba i ta dura masha hopi dia promé ku temporada start. Lo tabata bon pa pensa riba algun torneo den e "pauza" ku tin, ya asina bo ta tene e deporte na "bida".
Vanessa ta pensa ku nos lo haña un final di kam-pionato interesante kaminda ku e públiko lo haña sòftbòl di hopi emoshon mira.
No comments:
Post a Comment