Roger Bernadina i Yurendell de Caster ku Bravos de Margarita den beisbòl invernal Venezolano

WILLEMSTAD/CARACAS Yurendell de Caster i Roger Bernadina lo hunga den temporada di beisbòl invernal Venezolano 2008-2009 ku e tim di Bravos de Margarita. E tim di Bravos a konfirmá presensia di e dos yunan di Kòrsou den nan fila pa loke ta e temporada invernal ku ta start den luna di òktober próksimo.
Roger Bernadina tabatin un aña sensashonal den Liga Menor kaminda ela establesé un rekòrt pa loke ta hungadó di Liga Menor di Washington, Nationals hungando den Dòbe A i Triple A. Bernadina ta hunga den outfield.
Yurendell de Caster ku tin hopi eksperensia den beisbòl invernal di Venezuela ta un hungadó di utilidat. E por hunga tantu den outfield komo den infield i lo por suministrá poder na plato.