Shurella Merkies ku tremendo ‘come back’ den Sòftbòl Dobel A Femenino

WILLEMSTAD -Shurella Merkies despues di un ousensia di kasi 2 aña ta bèk i pichando den gran forma pa su tim nobo ku ta e tim di The One. Revista Deportivo Korsou a kombersá ku Shurella ku sin duda ta un dje sòftbòlistanan destaká di nos kampionato di sòftbòl femenino Dòbel A.
"Mi a regresá sòftbòl aña pasá, pero kasi mi no a hunga. Por bisa ku mi ta hunga sòftbòl atrobe despues di kasi 2 aña", asina Shurella Merkies ta konta.
Merkies ku aktualmente tin 28 aña di edat ta splika ku ela kuminsá hunga sòftbòl ku 10 aña serka "Shonpe" Hooi na Bandabou.
Ku 12 aña ela kuminsá kompetí den sòftbòl ku deporte den bario i ku 16 aña ela hunga sòftbòl hubenil.
E lansadó estrea a kuminsá ku e tim di Rio Magdalena i despues ku e tim di Soto.
Shurella ku ta un mucha di Bandabou ta rekonosé ku ela kambia tim ku duele na su kurason. "Mi tabatin poko diferensia di opinion, no ku manager, pero ku algun hungadó di klup, ya i kosnan a bai asina", Shurella ta konta.
Ela bisa ku den e tim di The One ta bayendo bon. E tin rekòrt di 5 ganá i 0 pèrdí, i e tim di The One ta na di dos lugá riba e standing.
"Mi ta train hopi, kasi tur dia. Ora mi no train na velt mi ta bai gym kaminda ku tambe mi ta train", e picher estrea ta splika. Merkies ta bisa ku e ta biba awor na Souax, poko mas serka ku Bandabou naturalmente. "Lelá” ta kontentu den e tim di The One i ta pensa ku nan lo hunga e final kontra di Pichingolo. E ta pensa ku kisas e trainingnan di The One por wòrdu poko mihó bishitá. E mes ta haña ku su velosidat a keda kasi meskos ku antes i ku mas e picha mihó e bira.
E picher tin deseo ku e nivel di sòftbòl femenino lo por lanta. "Nos mester sigui o traha riba mucha hóben ku smak. Bo ta mira ku ya e kompetensia di Little League a hasi su influensia paso tin hopi mucha hóben ku smak den sòftbòl", Merkies ta remarká. E ke mira mas picher. E ta pensa ku si Stephany Henriquez,15, ku ta hunga pa Pichingolo sigui traha ku smak e lo por bira bon picher den futuro.
"Nos tin di keda traha riba mucha hóben ku smak pa asina pone e deporte na un nivel haltu pa nos por kompeti Internashonalmente", Shurella Merkies a bisa den un entrevista ku Revista Deportivo Kòrsou.

Entrevista saka for di Revista Deportivo Korsou edishon sèptèmber 2008.