Liga Pabou ta gana den Little i Senior, Liga Pariba number unu den Minor i Junior

WILLEMSTAD Play-off Beisbòl Little League 2009 a finalisá djadumingu ku weganan na Frank Curiel Ballpark i Tio Daou Ballpark. E kompetensia tabata fuerte e aña aki i no tabata fásil pa Pabou manera añanan anterior. Liga Pabou a gana den divishon Little (invikto) i a gana den Senior. Liga Pariba a gana den Minor i Junior (invikto). Den Minor i Senior desishon final a kai te den último wega.

RESULTADONAN
Djasabra 30 di mei
Frank Curiel Ballpark
Liga Willemstad 6, Liga Pariba 4 (Minor);
Liga Pabou 7, Liga Willemstad 3 (Little).

Tio Daou Ballpark
Liga Pariba 7, Liga Pabou 2
(Junior);
Liga Pabou 7, Liga Willemstad 3 (Senior).

Djadumingu 31 di mei
Frank Curiel Ballpark
Liga Pariba 7, Liga Pabou 6
(Minor);
Liga Pabou 7, Liga Pariba 2 (Little).

Tio Daou Ballpark
Liga Pabou 9, Liga Willemstad 4 (Junior);
Liga Pabou 10, Liga Pariba 6
(Senior).
MINOR
Minor League di Pariba ku a sali number 1 a gana dos wega siguí i pèrdè den e wega krusial djasabra kontra di Willemstad.
Ayera den un wega ku nan mester a gana a lucha fuerte pa finalmente gana e derechi pa representá Kòrsou na Aguadilla (Puerto Rico) di 1 pa 9 di ougùstùs.

LITTLE LEAGUE
Selekshon Little bou di direkshon di Vernon Isabella a bira kampion invikto ganando 4 wega stret. Nan lo hunga e kampionato di Karibe na Kòrsou di 17 pa 26 di yüli.

JUNIOR LEAGUE
Un ekipo sólido dirigí pa Chairon Isenia ku un tremendo staf tékniko tantu riba tereno komo tras di kortina a laga un tremendo impreshon atras ganado 4 wega siguí di un forma relatívamente fásil.
Nan lo kompetí na Monterrey Meksiko di 13 pa 21 di yüli.

SENIOR LEAGUE
E ekipo di Pabou ku manager Norwin ‘Sor’ Moesquit despues di a pèrdè e promé wega kontra Liga Willemstad a bini bèk fuerte i gana 3 wega siguí pa klasifiká i gana e derechi pa representá Kòrsou den Latino. Nan lo hunga Latino Amerikano na Yabucoa (Puerto Rico) di 10 pa 19 di yüli.