Preparashonnan pa e di 25 Kopa ABC a start e siman aki

WILLEMSTAD Preparashonnan pa Kopa ABC ku lo tuma lugá na Kòrsou ta kanando den gran forma. Softballcuracao.com a kombersá ku Chai Curie ku ta e fundadó i kordinadó Kopa ABC. Chai a bisa nos ku e siman aki a kuminsá hasi e kontaktonan pa e gran kopa ABC.

Chai: “Nos a drenta den kontakto ku Aruba, Boneiru i Isla Riba. Nos a manda mail pa nan. Ta 12 ekipo ta partisipá den Kopa ABC.
Tin lugá pa 4 ekipo di Aruba, 2 ekipo di Boneiru, 2 di Isla Riba (Sint Maarten) i 4 di Kòrsou. Sint Maarten ta bini hopi biaha ku un ekipo ku ta Windward Island Bank Lions, pero ta dos invitashon nan ta haña. Boneiru tambe por bini ku 2 ekipo i Aruba ku 4 .
Den kaso ku un òf mas ekipo di e islanan ariba menshoná kai afó nos lo yena ku ekiponandi Kòrsou. Swift i Teremoto manera tradishonal ta aden sigur. Nos lo manda invitashon pa Baranka i Buena Vista Power ku a yega di partisipá na Kopa ABC pafó di Kòrsou. Nos tin algun ekipo pendiente den kaso ku ekiponan di Aruba, Boneiru i Sint Maarten kai afó.”


Ekipo Teremoto, e ekipo ku tei den Kopa ABC for di den kuminsamentu