Harlem Power ta gana Suffisant Eagles pèrta 8-7 den apertura kampionato Sòftbòl Fastpitch Maskulino

WILLEMSTAD - Sòftbòl Fastpitch Maskulino a start ayeranochi na Suvek Ballpark ku dos wega. Un públiko akseptabel ku basta kara nobo a weta dos tremendo partido. Den e promé wega Harlem Power a gana Suffisant Eagles ku skor di 8-7 i despues Awa Limpi ta zona un kampanaso ganando Survivors ku skor di 9-4.

PROME WEGA
Den e promé partido Harlem Power despues di tabata dilanti kómodo 5-2 ta pasa den sustu ora Suffisant Eagles bai ariba 6-5 den di 4 inning. Kosnan ta bòlter atrobe den di 5 inning pa finalmente Harlem Power gana 8-7 di Suffisant Eagles.

NUMERITONAN
Pa Harlem Power 8 kareda, 8 hit i 2 error. Raichel Sambo tabata e picher ganadó. Mihó bate Arlyson Rodrigues 2-2. Emile Haswell Jr, Arlyson Rodrigues i Purcey Schoop a konektá homerun. Suffisant Eagles a nota 7 kareda, bati 8 hit i hunga sin eror. Norman Lucasius a pèrdè i Gideon Sambo a bati di 4-3.

Den e di dos wega Awa Limpi ta zona un kampanaso riba Survivors i ta gana sorpresivamente 9-4.
Awa Limpi a bati 10 hit i hasi 2 eror.
Rigenne Martina a gana i Shurendell Mujica a bati di 4-2.
Survivors a bati 7 hit i hasi 5 eror. (foei). Haime Margarita a pèrdè i Roderick Postina a bati di 3-2.