Kopa ABC&S na Sint Maarten probablemente riba otro fecha

WILLEMSTAD - Kopa ABC&S ku mester a tuma lugá riba e fechanan tradishonal, esta Aña di La Reina i Dia di Obrero na Sint Maarten lo tuma lugá riba un otro fecha.
Di fuentenan fededigno nos a risibí e informashon aki. E motibu prinsipal ta ku no tin lugá riba avion, no tin lugá pa keda i no tin sufisiente vehíkulo tampoko pa esnan ku bai kompetí i dibertí por move aden.

Tin indikashon ku lo pone ABC dia di Ascencion ku ta 21 di mei. E organisadónan di Sint Maarten no ta masha entusiamá ku kambiamentu di e fecha aki debí ku nan ke pa esnan ku bai ABC&S lo por disfrutá di e ambiente di Karnaval tambe.
Di Boneiru nos a risibí informashon ku Braves no ta bai mas debí ku nan no a haña lugá riba avion. La Sonrisa ta luchando pa yega Sint Maarten debí ku La Sonrisa i e ekipo Teremoto a partisipá na tur ABC i pa tradishon nan mester yega.
Na Aruba Calabas i Heineken ta luchando ku alma i kurpa pa por logra ku nan delegashon por yega Sint Maarten

SOLUSHON
Parse ku e solushon práktiko ta pa organisá e evento alrededó di Dia di Ascencion. Esaki ta trese kuné ku delegashonnan mester bai riba djarason 20 di mei, djaweps 21 di mei ta dia liber (Dia di Ascencion), i djabièrnè e ekiponan mester wak kon nan ta hasi logra un liber di nan trabou.
Organisadónan di ABC di Aruba, Boneiru i Kòrsou ta tratando na konvensé e organisadónan di Sint Maarten ( Windward Island Bank Lions) pa kambia e fecha debí ku hopi ekipo no ta biniendo kla ku buelo pa Sint Maarten. E organisadónan no ke pa e evento bira un flop mirando ku último 10 aña tur kopa ABC tabata tremendo i eksitoso.
Nos ta sigui e desaroyonan den kuadro di e Kopa ABC&S 2009 dj’aserka.