WILLEMSTAD - Jorge Sulbaran, tata di e lansadó hóben Juan Carlos Sulbaran den kombersashon ku Softballcuracao.com i Revista Deportivo Korsou a splika ku tur kos a sali manera tabata planiá.
"Nos tabata ke pa Juan Carlos pitcha na Ulanda i pitcha kontra di Cuba pa tur hende por a mira Juan Carlos riba montíkulo", na palabra Jorge Sulbaran tata di e prospekto Juan Carlos Sulbaran.
Juan Carlos Sulbaran a pitcha den highschool na Merka i tabatin rekòrt di 11-0 ku un efektvidat magnífiko.
Su tata a bisa:"Juan Carlos no a haña hopi publisidat, poko hende tabata sa realmente kon bon Juan Carlos ta".
Su bon aktuashon kontra di e selekshon di Cuba mesora a pone ku wowonan a kuminsá habri i no a dura hopi ku e manager di e selekshon di Ulanda Robert Eenhoorn a informá pa Juan Carlos pa por hañele pa Olimpiada.
Sr. Jorge Sulbaran ta si-gurá ku su yu no a haña nada pa e pitcha pa selekshon ulandes. Ela aseptá di partisipá den e selekshon di Ulanda pasobra ta un previlegio di por pitcha den un Olimpiada i naturalmente lo tin hopi bista ku lo habri p'e.
Den kombersashon sr. Jorge Sulbaran a bisa ku e organisashon di Reds di Cincinati ku a draft Juan Carlos den di 30 'round' mesora a manda kambia e oferta ku nan a hasi i ya nan a ofresé Juan Carlos Sulbaran un rekòrt pa firma ku nan.
Personalmente Jorge ta kere ku su yu lo firma ku Reds promé ku Olimpiada, pero pa esei sosodé e oferta mester ta un ku nan ta aseptá.
"Si nan hasi nos un oferta ku nos por biba kuné Juan Carlos lo firma, si esei no sosodé Juan Carlos lo bai su skol normalmente", tata Sulbaran a deklará.
Tata dje pelotero ta bisa ku su yu lo hasi aworaki loke ta kumbiniele pa hasi.
"Hopi hende no tabata sa kon bon Juan Carlos ta, despues ku nan a mira Juan Carlos kontra di Cuba den Haarlemse Honkbal Week tur kos a kambia", asina e konosido Jorge Sulbaran ta bisa.
No comments:
Post a Comment