WILLEMSTAD -- Dia 12 di ougùstùs último, FEBEKO a risibí un karta for di NABAFE, kaminda ofisialmente e Federashon Antiano di Beisbòl ta pone Federashon di Beisbòl di Kòrsou na altura ku ta bai tin un torneo di beisbòl klasifikatorio pa mundial organisá pa COPABE (Confederacion Panamericano de Beisbòl), kaminda Antia Ulandes lo tin un ekipo ta partisipá. Konforme reglanan di NABAFE, lo mester hunga weganan eliminatorio entre distritonan Kòrsou i St. Maarten.
Federashon di Beisbòl di St. Maarten a duna di konosé ku nan ta dispuesto pa organisá e weganan eliminatorio aki dianan12, 13 i 14 di sèptèmber próksimo, loke ta trese ku n’e ku Kòrsou lo mester forma un selekshon pa defendé nos bandera.
Den un reunion di direktiva, FEBEKO unánimamente a bai di akuerdo pa primeramente nombra Raymond “Mompy” van Gurp komo manager di selekshon di Kòrsou.
Banda di esaki tambe, FEBEKO a bai di akuerdo pa instalá un komishon tékniko ku huntu ku Manager van Gurp lo mester hasi FEBEKO un proposishon di hungadónan ku lo forma parti di preselekshon di Kòrsou.
Direktiva di FEBEKO lo informá komunidat di Kòrsou riba e adelanto di preparashon di su selekshon ku na final lop konsistí di 25 hungadó.
No comments:
Post a Comment