E kampionato ta start djasabra awor 17 di mei. Kuater miembro di e direktiva di Febeko tabata den e panel pa duna informashon na Prensa i ekiponan di e kampionato 2008. Softballcuracao.com tabata presente i tin e relato ku nos a risibí di direktiva di
Febeko.
Pa algun potret di konferensia di Prensa, klik riba potret i bai riba Beisbòl Kòrsou.
Franklin Confesor na palabra na nomber AJ Sports ku ta un di e sponsernan di Febeko.
INTRODUKSHON
Ya pa 74 aña, Kòrsou a bin ta disfrutá di un kampionato di beisbòl. 74 aña pasa, Curacaosche Baseball Asosiatie (CBA) a lanta ku e meta pa por organisá weganan di beisbòl riba nos Isla.
Despues di tempu, CBA a kambia pa FEBEKO (Federashon di Beisbòl di Kòrsou) ku nos tur konosé último tempu komo e Federashon ku ta organisá weganan di Beisbòl na e nivel di mas haltu riba nos Isla.
Algun miembro di direktiva di febeko na konferensia di prensa. Di robes pa drechi Jorge de Lira, Kenneth Pieter, Giovanni Atalita i Carlos Monk.
Pues, por mira ku na aña 2009, FEBEKO lo ta su fiesta selebrando 75 aña di eksistensia i for di awor aki nos por kuminsá anunsiá lo tin selebrashonnan grandi aki na Kòrsou.
Ta bon pa menshoná ku den 2008 aki, dos organisashon ta di fiesta. Ta trata aki di e organisashon di Sta. Rosa Indians ku ta selebrá 55 aña di eksistensia i tambe Sta. Maria Pirates ku ta selebrá 45 aña di eksistensia.
DIREKTIVA DI FEBKO
Dia 4 di aprel 2008, ekiponan miembro di Federashon di Beisbòl di Kòrsou a skohe miembronan di direktiva nobo ku lo mester sigui traha pa adelanto di e deporte ku tantu nos tur stima.
E direktiva aktual di FEBEKO ta konsistí di e siguiente personanan:
Sr. Armin Konket Presidente
Sr. George de Lira Vise Presidente
Sr. Giovanni Atalita Sekretario
Sra. Mable da Costa Gomez 2do Sekretario
Sr. Carlos Monk Tesorero
Sr. Kenneth Pieter Komisario
Sr. Egbert Bakmeijer Komisario
Sra. Sharine Antersijn Komisario
Sr. Gerald Mathilda Direktor di Kampionato
E direktiva aktual di FEBEKO tin un meta su dilanti i esei ta pa garantisá un desaroyo positivo di kampionato di Beisbòl di Kòrsou. Ya direktiva a tene vários reunion interno, kaminda a elaborá te den profundidat riba e meta ku a fiha pa loke ta trata Beisbòl di Kòrsou.
No kabe duda ku un di e metanan mas grandi di FEBEKO ta pa beisbòl di Kòrsou bira bek e deporte mas popular di nos Isla.
E direktiva aktual ta determiná pa traha riba un resultado sumamente positivo pa loke ta trata e deporte ku nos tur stima.
Organisá un kampionato di beisbòl no ta algu fásil. Komo Federashon bo mester ta bon prepará promé ku bo por ranka sali ku un kampionato.
Bo mester traha bo presupuesto pa entrega esaki, pero mas ku tur kos mester yega na :
• un akuerdo ku e parkenan kaminda beisbòl ta keda hungá,
• Akuerdo ku esnan ku ta bai operá "food and beverage"
• Mester yega na akuerdo ku umpire
Awor ku tur esakinan ta tras di lomba i p’esei mester gradesí Sr. Carlos Monk a tuma su tempu pa reuní ku tur e protagonistanan den beisbòl di Kòrsou, pa asina ei nos por start Sali ku un kampionato sin doló di kabes.
EKIPONAN DEN DOBLE A
E organisashonnan ku ta partisipá den kampionato Doble A na 2008 ta:
- Sta. Maria Pirates One Net (Kampion 2007)
- Sta. Rosa Indians Ennia (Sub Kampion 2007)
- Royal Scorpions Mr. Baseball Banco di Caribe
- Groot Kwartier Stars Mangusa
- Wildcats Fatum
- Blue Hawks Aqualectra/ CDM
- Curacao Yankees
Kampionato di Beisbòl di Kòrsou na nivel Doble A lo hunga den 2 stadion:
- Stadion Johnny Vrutaal na Rif
- Tio Daou Ballpark na Sta. Rosa
E dianan ku beisbòl Doble A lo hunga aki na Kòrsou ta:
Djaluna Tio Daou Ballpark na Sta. Rosa
Djamars Tio Daou Ballpark na Sta. Rosa
Djaweps Stadion Johnny Vrutaal na Rif
Djabièrnè Stadion Johnny Vrutaal na Rif (despues ku bini di HHW)
Djasabra Stadion Johnny Vrutaal na Rif
Djadumingu (atardi) Tio Daou Ballpark na Sta. Rosa
PREIS PA DRENTA BEISBOL
Pa motibu di oumentonan drástiko di gastu, FEBEKO ta hañ’é obligá ahustá preis di entrada pa públiko na 2008 E preis aki ta bira:
5 florin hende grandi
2 florin pa mucha te ku 12 aña i 60+
ORARIO DI WEGANAN
E aña aki a bin un kambio pa loke ta trata komienso di wega di beisbòl. Si aña pasa FEBEKO a kambia esaki pa 8 or pa asina ei e ekiponan por a tene un pre-game, e aña aki ta bai bek na 7:30 komo komienso di weganan di Doble A tantu djaluna, djamars, djaweps, djabièrnè i djasabra. Lo re-introdusi wega di beisbòl Doble A djadumingu bek. Weganan riba djadumingu ta kuminsá mitar di 5 di atardi.
KOPA DIA DI BANDERA
E aña aki pa di 4 biaha Beisbòl lo partisipá den Kopa Dia di Bandera. Ta trata aki di un kopa ku e ekipo Kampion i Sup Kampion di e aña anterior ta lucha pe. Resultado di e wega aki ta bálido pa kampionato. Mirando ku selekshon di Antia ta Sali pa Ulanda pa partisipá den weganan di Haarlemse Honkbalweek, e wega di Kopa Dia di Bandera lo tuma lugá djadumingu dia 28 di yüni 2008.
Djasabra dia 14 di yüni, e wega lo keda hunga na Tio Daou Ballpark, mirando ku Stadion Johnny Vrutaal na Rif ta okashoná preparando pa Schottegatloop e siguiente dia.
Te na e momentunan aki, djarason i djabièrnè ta keda dianan liber di beisbòl Doble A. Esaki primeramente pa laga selekshon di beisbòl lokal train. Despues ku selekshon bini for di HHW, lo kuminsa hunga riba djabièrnè tambe na Stadion Johnny Vrutaal na Rif. Djarason ta keda komo fecha di reserva.
Fechanan 2 pa 5 di yüni ta keda liber di moda ku selekshon por prepará pa un seri ku nan lo hunga kontra di Aruba (Mas despues lo bini detaye riba esaki)
Fechanan 24 pa 30 di yüni 2008 ta keda liber di moda ku selekshon por prepará pa Harlemse Honkbalweek na Ulanda. (Riba esaki tambe Nabafe lo duna informashon mas despues)
KAMBIO DEN PLAYOFF
Despues ku durante dos aña largu, FEBEKO a programa su weganan di play off den e sistema di Round Robin, e aña aki direktiva a tuma e desishon pa bai bek na e sistema konvenshonal i tradishonal, esta e sistema di 1 vs 4 i 2 vs 3 den primeramente un bèst òf five den semi final i bèst òf seven den gran final.
NA KEN OF KENDENAN TA DEDIKA KAMPIONATO
Lamentablemente awe nos lo no por anunsiá na ken òf esnan ku Kampionato 2008 di Beisbòl di Kòrsou ta keda dediká. Nos lo anunsiá esaki promé ku komienso di kampionato 2008.
EKIPONAN TA SAKA NUMBER
Manera boso por a tuma nota den e skèdjul ku tin huntu den nos buki di prensa, no tin nòmber di ekipo ta aparesé riba e skèdjul. Motibu di esaki ta pa duna tur ekipo e mes un oportunidat.
Ta asina ku mediante di 7 bolita di number di 1 pa 7, un representante di kada organisashon ta kue un bolita i e number ku ta aparesé riba esaki, ta e number ku ta korespondé ku nan ekipo.
Pa loke ta trata komienso di kampionato, esaki ta kuminsá ku e ekipo kampion di 2007, esta Sta. Maria Pirates One Net kontra di e ekipo Sub-Kampion di 2007, Sta. Rosa Indians Ennia. Konforme e number ku nan kue, lo djies kambia e fecha ku nan lo mester a topa otro i pone esaki komo e wega di apertura.
HIMO DI KORSOU
Himno di Kòrsou na apertura di Kampionato di Beisbòl Doble A lo ta na enkargo di Meliger (Boy) Thode.
ALL STAR GAME 2008
No kabe duna ku un dje high lightnan pa 2008, banda di weganan di play off lo ta e all star game. Esaki ta e enkuentro kaminda e super estreyanan di nos pelota lokal repartí den pariba i pabou ta topa otro dia 30 di ougùstùs den Stadion Johnny Vrutaal.
E ekiponan ta repartí den e siguiente forma
PABOU PARIBA
Sta. Maria Pirates Sta. Rosa Indians
Royal Scorpions Mr. Baseball Wildcats
Blue Hawks Groot Kwartier Stars
Curacao Yankees
AJ SPORTS KU PREMIO
E prestigioso empresa di deporte AJ Sports di e konosido yüli di Kòrsou di Liga Grandi Andruw Jones a pone un premio pa e hungadó di buèlta mas destaká. Pa esaki, representante di AJ Sports Frank Confesor ta duna mas detaye.
RIBS EXPRESS KU PREMIO
Direktiva di FEBEKO ku sumo plaser ta yama bon bini na Ribs Express den mundu di Beisbòl di Kòrsou. No solamente nan a pone awe tardi disponibel pa nos por organisá nos konferensha di prensa komo opsekio, pero nan ta drenta beisbòl tambe.
No comments:
Post a Comment