Universal Trophy ta gana Bad Devils y ta clasifica mientras cu Gess Power ta suta Wild Boyz pa keda cu speranza

ORANJESTAD - Open Class a continua riba veld di Kudawecha unda equiponan ta bringando pa clasificación. Den Open Class tanto equiponan di Dobble-A y A-Class por a midi forza contra otro. Den e promer partido cual e ganador lo clasifica y perdedor por bay cas nos por a tuma nota cu e Buchanan di Tico Loopstok di Universal Trophy a bin por la goma cu un solo intencion pa clasifica y ta suta Bad Devils formalmente cu score di 17-1. Bad Devils sin embargo un equipo cu hopi muchanan hoben di sanicolas dirigi pa Johnny Rasmijn a mustra adelanto grande compara cu 2007.


Bad Devils a logra victoria importante contra Macuarima Papa Johns Pizza algun dia atrás pero a cay den otro contra Universal Trophy. Universal Trophy 17 careda, 19 hit, 1 error. Bad Devils 1 careda, 3 hit, 6 error. Alvin Pereira ta resulta pitcher ganador cubriendo henter e ruta. Jose Croes ta bay cas cu e derota recibiendo relevo for di Johnny Rasmijn den tercer entrada. Mihor bateadornan pa Universal Trophy ta Gregorio Geerman kende su bate tabata na candela a bay di 4-4, Gustavo Rincón 3-3, Sherwin Loopstok, Jorrick Briesen 1-1, Rafael Santos, Egduard Winterdaal y Geandrick Lacle tur di 4-2, Giovanni Dijkhoff 2-1. Pa Bad Devils Johnny Rasmijn himself a bay di 1-1. Den e di dos partido Gess Power tambe a bin cu mal intencion mirando cu nan tabata tin mester di un victoria pa por hunga un wega di desempate contra Honda y ta exactamente lokual nan a hasi. Gess Power 17 careda, 14 hit, 0 error. Wild Boyz 1 careda, 1 hit, 5 error. Efraim Fenchie Leon kende tabata mustra hopo nervioso promer cu wega a resulta pitcher ganador y a ricibi relevo for di Joy Orman den di cuater entrada. Victor Winterdaal a bay cas cu e derota. Randy Loopstok ni tampoco Davidson Eduards por a paga e candela tratando na yuda nan brother Victor. Mihor bateadornan pa Gess Power ta Mario Wester, Richard Krozendijk 1-1, Angelo Laurant, Arjen Mathilda 4-3, Jason Orman 3-2, Alvaro Maduro y Giovanni Lane di 2-1. Pa Wild Boyz Randy de Cuba a bati e unico hit pa nan equipo y a bay di 1-1. Diabierna anoche por a compronde cu Gess Power a gana Honda y asina ta clasifica pa pasa pa semifinal unda nan lo mester topa Royal Power diamars anochi 715pm riba veld di Kudawecha. Universal Trophy kende tambe a clasifica lo enfrenta Blue Star Plus Accountants cu a pasa ocupa puesto number un den nan pool. Remarkabel tabata manager di Blue Star Plus Accountants cu a cuminza bula di alegria tras di backstop na Kudawecha ora a bira conosi durante partido di Gess Power cu Gess Power lo topa Royal Power y no anan. Tico di Universal Trophy a manda mensaje mesora pa Mario Croes cu bo alegria no lo ta pa largo ya cu Tico di cu mi tin un sorpresa pabo. Na papiamento criyoyo e di mi tin bo cos pabo. Fenchie mientrastanto a prohibi tur su hungadornan pa sali for di cas desde diasabra y pues mester keda paden te cu diamars pa nan por concentra pa e partido contra Royal Power. E veterano Tony Warner a sinti diadomingo madruga un bus grandi ta lora rond di su cas y no por a mira e chauffeur y a pensa mesora cu ta un bus remote control pero na momento cu Tony kier a yama polis a resulta cu ta Gibi tabata cu e bus aki controlando si Tony ta na cas. Endy mientrastanto tabata completamente relaha observando wega pa asina saka puntonan debil di Gess Power pa e por probecha di esakinan durante playoff cu lo Start diamars awor. Pitcher estelar di Royal Power no por contene su mes y ta pura pa diamars yega y a duna e muchanan di Gess Power un tremendo show diabierna ultimo yen di “Ambiente” mustrando con pa baila “Bati Samba”. Bueno playoff ta inicia diamars awor na veld di Kudawecha.