SBAB ta kontentu i ta gradisi tur ku e kopera ku e tremendo Torneo

WILLEMSTAD - Wikènt ku a pasa tabata e último wikènt pa loke a trata e tremendo torneo di SBAB SOCIAL SOFTBALL TOURNAMENT 2008. Dilanti un públiko rekòrt pa loke ta trata softball na Kòrsou durante e último 4 siman nan 56 ekipo a batayá formalmente, pero si den un esfera realmente sosial i spòrtif pa determiná kua di e 34 ekiponan maskulino i 22 femenino lo a titulá kampion. Un total di 155 partido a wòrdu hunga den e periodo aki, kual ta un rekòrt pa loke ta trata un torneo di softball den Antia i kisas asta den Karibe. Kuminsando 5 di aprel e partidonan a tuma lugá kombiná entre Suvek i Chirino Ball Park.



Esaki ta e di 3 SBAB SOCIAL SOFTBALL TOURNAMENT i ta remarkabel ku e torneo durante añanan a krese enormemente tantu na ekipo komo na fanatikada. E torneo su meta tabata pa organisashon nan por sera konosí ku otro i alabes dibertí den un forma deportivo i amikal. Nos ta sigur di a logra nos meta i ku despues di e torneo aki e laso interno den kada organisashon ku a partisipá a krese i wòrdu fortifiká.


Pa loke ta trata e ambiente tin ku bisa ku manera kustumbrá, tur kos a kana nechi, den un ambiente super gezellig, rondoná di fanátiko nan positivo i trankil. E último wikènt a konta ku animashon di SHOW i TUNE. Riba e anochi final djadumingu último, Cirilo Chirino Ballpark a konosé un rekòrt di asistensia di fanátiko nan ku a bini pa disfrutá di e wega nan final i tambe di e tremendo ambiente di TUNE.

Despues di mas ku un luna largu di bataya, djadumingu último e siguiente ekipo nan a titulá kampeon:

MAKULINO
Kampion: CDM
Subkampion: UNA

FEMENINO
Kampion: CITCO
Subkampion: UNA


Pa loke ta trata e sobra resultado nan tur lo wòrdu revelá djabièrnè 9 di mei 2008 den Facade, ora ku SBAB Softball Teams ta organisá e tan komentá fiesta titulá “Crazy Wig Party Part II”. Promé ku e fiesta aki, esta di 8or pa 10or lo tuma lugá e premiashon di e ekiponan, pa despues e fiesta inisiá i siguí te oranan lat di mardugá. Animashon na premiashon i tambe e fiesta dia 9 di Mei na Club Facade lo ta na enkargo di ERA, TUNE i tambe GIO. For di Europa tambe lo tei algun intérprete hóben super popular, esta Randy Cordelia i tambe Dwight Leoneta. E dos nan aki lo sòru pa tremendo ambiente interpretando huntu ku TUNE, nan hitnan di momento i tambe pasado. Pa e fiesta aki karchi nan ta na benta na SBAB, Mensing i BEEP BEEP den pre sale pa solamente Naf. 30,-. Asina ta buska bo karchi awor pa bo bin disfrutá di un tremendo ambiente den kual lo bo topa bo kolega i amigunan den nan wig (peluka) den Facade!!

Naturalmente pa organisá un torneo di e magnitut aki no tabata posibel sin ayudo i koperashon di diferente persona òf instansia. Pa medio di esaki nos ke mustra nos gratitut yamando danki na e siguiente persona nan i organisashon nan ku a hasi e torneo aki posibel.


Un danki ta bai na promé lugá na tur e team nan partisipante, sin boso e torneo aki lo no tabata posibel.
Un danki spesial ta bai na nos spònsernan kual ta: SBAB, AMSTEL, COCA COLA, HEINEKEN, FUNDASHON SEDREKO, KORTIJN IJS.
Un danki special na tur e siguiente kolaboradornan:
 Trahadónan di SBAB
 Scorer nan
 Umpirenan
 Sergio Leon di Suvek Ballpark
 Tetti Chirino i Julian Bito di Chirino Ballpark
 Maracucho Hellburg
 Kolaboradornan di tereno en espesial Yuana, Doi i Big Daddy (Elvis)

Sin boso sosten e torneo aki no tabata posibel. Un danki di kurason na kada un di boso!!


Komishon SBAB Social Softball Tournament 2008.