Royal Power lo enfrenta Blue Stars Plus Accountants den un “best out of three” den gran final Open Class

ORANJESTAD - Desde promer siman di mei a inicia e grandioso torneo di Open Class dirigi pa Comision Pro Softball Organisa unda cu equiponan tanto den double A pero tambe di A-Class por a participa. E siman aki ta drentando di 8 siman di torneo cu weganan organiza tres bes pa siman ta drentando su elapso final.

E gran equipo di Royal Power atrobe ta den final y e biaha aki e equipo di Mario Croes esta Blue Stars Plus Accountants ta esun cu nan lo bay enfrenta. Aña pasa den luna di october Royal Power a titula campeon di e campeonato regular pa di cuater aña consecutivo derotando Gess Power den un serie di best out of five den tres wega sigi pues un “Sweep” y apenas aña a bolter nan a logra elimina nan rival grandi esta Gess Power di Fenchie Leon y Eggy Rosina un biaha mas pa topa equipo di Mario Croes den final. Por bisa si cu Royal Power mester a traha mas duro e aña aki compara cu añanan anterior y esaki ta muestra cu equiponan a cuminsa mehora y ta mucho mas competitivo.

Blue Stars Plus Accountants vs Royal Power ta mustra di bira un tremendo serie ya cu Blue Stars Plus Accountants a reforsa nan staf di pitcheo door di adkeri dos pitcher habridor extra e temporada aki. Apesar di nan estalar Carlos Croes kende muy probablemente lo habri e promer partido diamars awor nan tin tambe Ricky Henriquez y Clay Shipley mustrando cu nan no tin problema pa bay den profundidad den cualkier partido. Royal Power kende lo start casi sigur cu nan A’s for di den baraha cu ta e fabuloso Johannes Poy Flanegin lo mester tene na cuenta den e segundo partido di anochi kende nan lo manda. Endy Croes a bisa nos cu e tin confiansa den su pitcher hoben esta Angelo Arnold yui di e gran pitcher Henk” De Spijker” Arnold kende lo mester dune un 4 pa 5 bon inning pa e di dos partido. Estefano Croes tambe al pareser a recupara for di un lecion y a ser yama for di triple A pa subi rooster di Royal Power pa e grandioso final. Diamars awor tur fanaticada di Sta Cruz ta keda invita pa baha bin kudawecha bin apoya Blue Stars Plus Accountants mientras cu Aruba henter ta keda yama pa ta presente pa apoya bo equipo preferi. Yega bo tin di yega!!!!!