FLORIDA - E siman aki tabata un siman hopi grandi i importante pa Juan Carlos Antonio Sulbaran, ela kuminsá diadumingu 18 di Mei 2008, ku su graduashon na American Heritage Academy, kaminda e la risibí su diploma di High School, ku bon resultado. (B+ average). Mesora despues di su graduashon ela viaha ku su team American Heritage Patriots, bai Sarasota, Fl. Kaminda nan a hunga playoff final di estado di Florida.
Djaluna anochi Juan Carlos a tira e wega semi final pa gana su di 11 wega sigí i yuda Patriots klasifiká pa State Finals, pa promé biaha den historia di e skol. JC a tira 4 inning fuerte durante kual ela permiti unikamente 1 hit, ku tabata un homerun solitario. Den di sinku ela konfrontá problema ora ela hanja bral na su dede i mester a bandoná e wega gana komodamente 9-3. Finalmente Patriots a gana e wega 11-6.
Djamars anochi, algu promé ku AH Patriots a titulá kampion di estado ganando di Forth Pierce ku skore di 8-2, Miami Herald a anunsiá den su edishon di dia 20 di Mei, ku Juan Carlos a keda nominá pa resibi Miamai Herald Athletic Award, komo un di e mihó atletanan di Broward County.
Ku e título di estado logra pa American Heritage, mesora nan a keda nominá tambe komo e team di baseball number unu di HighSchool na merka. Nan a kaba temporada ku un record di 32-2.
JC dimes tabata klave den e eksito di su skol. Su tremendo aktuashon komo picher i tambe liderasgo komo team player a yuda hiba e team pa promé biaha na un titulo estatal. Tur su coachnan i kompañeronan di team a bin gradisí nos famia personalmente pa e hecho ku nos a permiti JC hunga pa nan skol i tabata danki na su aktuashon sobresaliente ku awe American Heritage Patriots ta kampion di estado i alabes e team number unu di Merka.
Diawebs mainta den un brunch organisa pa Miami Herald, Juan Carlos ta resibi e “Athletic Award”, komo “Player of the year – Baseball Pitcher 2007/2008”, di Broward County . Pa nos famia e premio aki tin un balor masha grandi mes. No solamente pa motibu ku Juan Carlos a presta bon riba tereno, pero mas ainda pa motibu di su komportashon, disiplina, esfuerso i prestashon na skol. Juan Carlos simplemente a demostrá ku no ta importá unda bo ta biba ni tampoko ki sorto di skol bo ta bai, mientras ku bo tin disiplina pa traha duru i hasi esfuerso, bo ta logra resultado positivo.
Nos famia ta konsidera ku Juan Carlos ta un ehèmpel pa pueblo di Kòrsou. No solamente pa nos hubentut, pero tambe pa nos mandatarionan, kendenan mester realisá ku invershon di rekurso finansiero i humano den deporte eskolar, ta duna resultado. Juan Carlos a logra resultado pa motibu ku ela hanja oportunidad di kombina su pashon pa baseball/Deporte, ku su edukashon eskolar. Un sistema di edukashon, kombiná ku deporte, no ta permiti otro kos,sino eksito. Bo ta hañabo obligá pa produsí bon resultado tantu den deporte komo den bo estudio. Na Merka bo ta wordu rekonose unikamente si bo logra bon resultado tantu riba komo pafo di tereno i si bo ta sirbi komo ehempel pa otro hobenan.
Mesora despues di a resibi su homenaje komo “Player of the Year”, Juan Carlos a viaha pa Sebrin Fl. kaminda diabierne anochi e ta hunga den e “All Star Game” di estado di Florida . JC a keda selekta den weganan di tur strea, komo e di tres hugador ku a resibi mas voto di e asosiashon di coachnan di Floirda. E ta wordu konsidera komo e miho pitcher di Florida .
Di e forma ki JC a konklui un temporada sensashonal kaminda ela gana tur loke tabatin pa gana.
Ekipo number UNU di merka. Kampeon di estado di Florida , Kampeon pitcher di Broward County ku 11-0 (JC no a perde ningun wega for di dia ela yega Merka na Augustus 2006). Kampeon di Perfect Game Wood Bat Tournament,(den e torneo aki JC a tira un blankeo den e wega semi final), Miami Herald Athletic Award komo Pitcher of the Year. Rawlings All American pre season third team. All Star Florida State ; Sport Illustrated top100. (Rankea na number 27 entre e miho 100 prospektonan di Merka) i finalmente e loke ta bal mas ku tur otro premio, un “Full Rights Scholarship” ku Universidad di Florida .
Awor ku temporada di skol ta tras di lomba JC tin pensa di bin Korsou dia 26 di mei, pa forma parti di e selekshon di NABAFE ku ta preparando pa partisipa na Haarlemse Honkbalweek na Hulanda.
Tambe JC ta pendiente pa e resultado di MLB draft dia 5 di juni. Despues di su tremendo temporada ku American Heritage e tin speransa ku elo por draft haltu. Den kaso JC no wordu di draft of no yega na akuerdo ku un team di MLB, e ta bai hunga baseball pa Universidad di Florida, kaminda e lo mester meldu dia 14 di ougustus 2008.
No comments:
Post a Comment